Filipi 4 - 阿美語聖經-新約附詩篇箴言

O Pipalimo'ot ni Pawlo

¹ Kaolahan ako, ka'ilolan ako a salikaka, o kalipahakan ako, o kalata'angan ako kamo. Haenen ko nika tanektek namo a malaccay ato Tapang.

² Salikaka Yuotia aci Sintiki, nanay palaccayen ko faloco' namo a mitoor to Tapang.

³ O romasato, o so'linay a kapot ako, milongoc haca kako i tisowanan to pipadama tonini a tatosaay a fafahiyan. Nawhani o nano mikapotay takowanan a maroray a mipatnak to Nga'ayay Ratoh cangra aci Klimin ato romaroma a kapot. Matilidayto ko ngangan nangra i pitilidan no Kawas to ngangan no ma'oripay.

⁴ Kararid kamo a lipahak to nika laccay namo ato Tapang. Miliyaw kako a pasowal i tamowanan, kalipahak kamo.

⁵ Nanay mahapinang no tamdamdaw ko nika damsay no faloco' namo. Mangatato a tayni ko Tapang.

⁶ Aka ka rawraw ko faloco' namo to maamaan a dmak. I masamaamaanay a dmak i, pitolon kamo. Pakaynien i nipiahowid no faloco' namo ko pipatalahkal to ngangitangiten namo i Kawas a milongoc.

⁷ Ta oya ikakaay no niharatengan no tamdaw a nano Kawas a rihaday ko mamisimaw to faloco' ato harateng namo pakayni i nika laccay namo aci Kristo Yis.

⁸ Salikakaaw, o saikorayto a sowal ako i, ano o sakalatamdamdaw, ano o kakahmekan no faloco' to so'linay a dmak, o fangcalay a dmak, o mo^celay a dmak, o makoracay a dmak, o kakaolahan a dmak, o tadamaanay a dmak i, o papakifaloco'en namo konini a ma^min.

⁹ Oya nipakafana'an ako ato nipatorodan ako tamowanan atoya nitngilan namo a sowal ato ninengnengan namo a dmak ako i, lahcien a mido^do. Ta mikapot ko parihadayay a Kawas i tamowanan.

O Pikansiya a Sowal

¹⁰ Tata'ang ko lipahak ako to nika laccay ako ato Tapang. Nawhani talahkalto anini ko sapipadangananay a faloco' namo i takowanan. Talacowa sapipadangan kamo to hatiniay, nikawrira, awaay ko kanga'ayan namo a romi'ad.

¹¹ O sakasaan ako i, caay ko nika cango'ot ako. Nawhani o nano milifetay kako to masamaamaanay a dmak a mafana' a rahker.

¹² Mafana' kako to no cango'otay a 'orip. Mafana' kako to no kadofahay a 'orip. Ano masamaamaanay a nika 'orip, o nika fcol ato nika cahiw, o nika kadofah ato nika cango'ot no 'orip i, o nano milifetayto kako tonini a ma^min.

¹³ Pakayni i 'icel ni Kristo o pa'icelay takowanan ko sakapakafilo ako a misi'ayaw to masamaamaanay a dmak.

¹⁴ Nikawrira, yo cango'ot kako i, mipadang kamo i takowanan. Nga'ayay konini a dmak namo.

¹⁵ Mato nika fana' namo o Filipi a tamdaw, yo miliyas kako to Makitoniya i sa'aya'ayawho ako a patnak to Nga'ayay Ratoh i, dengan o kiwkay namo ko mipadangay takowanan. Lcad sa kamo takowanan a macahiw ano ^ca i, marnec.

¹⁶ Yo i tiraho kako i Tisalonika i, caay ka kinaccay, kinapinapi:na kamo a patayni to maamaan a mipadang to kacango'otan ako.

¹⁷ O sakasaan ako i, caay ko nipilongoc ako to sapafli namo i takowanan. O kangalayan ako i, o nika tongal no nika lmed namo.

¹⁸ Adihayto ko nipaflian namo i takowanan. Marnecto kako a milayap to nipataynian ni Ipafrotitus a sapafli namo. O ccay no fangsisay a sapacakat namo i Kawas konini, o kalipahakan, o karahkeran no Kawas a milayap.

¹⁹ O romasato, o papakaynien no Kawas i iraay i ci Yis Kristoan a tadamaanay a dafong ko sapipafli Ningra to kacango'otan namo a ma^min.

²⁰ Nanay, caay ka citolas a mapahmek ko Wama ita a Kawas! Amin.

O Sapaikor a Sowal

²¹ Nga'ayho han a paratoh ko kahaccaccay no malaccayay aci Yis Kristo a mitooray. Nga'ayho saan i tamowanan ko kapot ako a mitooray.

²² Nga'ayho saan i tamowanan ko i tiniay a mitooray a ma^min. Mahaen ko i loma'ay no hongti no Loma a tamdaw a ma^min a nga'ayho saan i tamowanan.

²³ Nanay, mapaini no Tapang ci Yis Kristo kamo to mikomi!