Filipi 3 - 阿美語聖經-新約附詩篇箴言

O So'linay a Mo^celay a Dmak

¹ Salikakaaw ako, saikoray a sasowalen ako i tamowanan i, kalipahak kamo i nika laccay namo ato Tapang. Patilid kako to malcaday to nipatilidan ako i tamowanan i 'ayaw. Caay ka lifot kako, o sakaci^poc no dmak namo konini.

² Pina'on to tatiihay ko dmak a tamdaw. Matiya o waco cangra. Pina'on cangraan o paci^ciay a papikrit to tireng a tamdaw.

³ O so'linay a mido^doay to krit a lisin kita, caay ko cangra. Nawhani pakaynien ita i 'Adingo no Kawas ko nipita'ong ita to Kawas. Ci Yis Kristo ko kalata'angan ita. Caay piti'er kita to no tamdawan a lkakawa.

⁴ Ano notamdawan ko tati'eren ita i, caay ka awa ko no mako. Ma^deng kako a miti'er to no tamdawan a lkakawa, ano saan ko cima i, mangalef ko no mako.

⁵ Nahofocen saka falo a romi'ad i, makritay kako. O finawlan no Israil, o ngasaw ni Pinyamin, o so'linay a Hipray a tamdaw kako. Ano pakayniay i nika 'imer to Rikec no Yutaya i, o Farisay a tamdaw kako.

⁶ Ano pakayniay i nika lalok ako a mitoor to Kawas i, o mikari'angay kako to kiwkay. Ano pakayniay i nipido^do ako to Rikec ni Mosi i, o mo^celay kako, awaay ko tatoro'en a raraw ako.

⁷ Nikawrira, onini a nao kakalimlaan a dmak ako a ma^min i, tona o mitooray kako ci Kristoan anini saka, awaayto ko ^poc nonini a ma^min saan ko faloco' ako.

⁸ Caay ka orira a ccay. O kakalimlaan ako a ma^min i, malomaanho saan ko harateng ako. Nawhani o nika fana' ako to Tapang ako ci Yis Kristoan ko satadamaanay saan kako. O nano olah ako ci Kristoan, saka, falah hanto ako konini a ma^min. O lakaw konini saan ko harateng ako. Onini i, nga'ay marpet ako ci Kristo.

⁹ Ta mahapinang ko nika laccay ako aci Kristo. Caayto ko nano pido^do ako to Rikec ko sakanga'ay ako a malayap no Kawas. O nano piti'er ako ci Kristoan o nano Kawas a nisanga'an ko sakanga'ay ako a malayap Ningra o sanay ako.

¹⁰ O sakasaan ako i, nanay mafana' kako ci Kristoan. Nanay malifet ako ko 'icel no nika lomowad Ningra a ma'orip nai patay. Nanay mikapot kako to pades ni Kristo a milcad to faloco' Ningra a mapatay.

¹¹ Nanay halo ako a lomowad a ma'orip nai patay saan ko faloco' ako.

Pamoteken ko Patosokan

¹² Malahciayto ako konini a dmak. O masongila'ayto kako, caay ka saan kako. Deng o pisa'icel ako to sapilahciaw to patosokan no nipipili' ni Yis Kristo i takowanan.

¹³ Salikakaaw, malahciayto ako konini, caay ka saan ko harateng ako. Deng ccay ko sasarocoden ako a misa'icel. Tawalen ako ko mata'lifay a dmak. Pamotek han ako ko patosokan ako a tala'ayaw.

¹⁴ Pasayra ko faloco' ako i patosokan a comikay to sapilayapaw to sapakaolah, oya nipitahidang no Kawas a panokay takowanan i kakarayan pakayni i ci Yis Kristoan.

¹⁵ Orasaka, kita o mato'asayto ko faloco' a mitoor ci Kristoan a ma^min i, haenen ko harateng. Nikawrira, ano ira i tamowanan ko misaromaay ko harateng i, o Kawas ko papahapinang i tamowanan tonini.

¹⁶ Saka, ano hakowaay ko nilahcian ita a mitoor i, hatiraen ita ko dmak a tala'ayaw.

¹⁷ Salikakaaw, kararid kamo a mitodong i takowanan. O romasato, nengnengen ko pi'arawan namo a mitodongay takowanan a tamdamdaw.

¹⁸ Nawhani kinapinapinato kako a pasowal i tamowanan. Talalosa' haca kako anini a pasowal to nika 'aloman ko misa'adaay to ciwcika ni Kristo pakayni i dmak nangra.

¹⁹ O pahrekan no 'orip nangra i, o nika tkop. Nawhani malakawas nangra ko tiyad nangra. O kakangodoan a dmak ko kalata'angan nangra. O nohkalan a dmak a ccay ko niharatengan nangra.

²⁰ Nikawrira, itira i kakarayan ko kika ita. O halamhamay kita a mitala to nika sadak no Pa'oripay titaanan a Tapang ci Yis Kristo nai kakarayan.

²¹ Itiya i, o 'icel ni Kristo a papitoor to ma'oripay a ma^min ko sapifalic Ningra to tadancaay a mamapatay a tireng ita a palcad to tadamaanay a tireng Ningra.