Filipi 1 - 阿美語聖經-新約附詩篇箴言

¹ O koli ni Yis Kristo kako ci Pawlo aci Timoti. Patilid kami i tamowanan o malaccayay aci Yis Kristo a finawlan no Kawas ato kakrikridan ato mipadangay to kiwkay itira i Filipi.

² Nanay, mapaini no Wama a Kawas ita ato Tapang ci Yis Kristo kamo to mikomi ato rihaday!

O Pitolon ni Pawlo to Saki Salikaka

³ Yo maharateng ako kamo i, miahowid kako to Kawas ako,

⁴ yo mitolon kako to saki tamowanan a ma^min i, salipahak sa ko faloco' ako.

⁵ Nawhani nai satapangan no tayal ako i tamowanan tahanini ko nika dadama ita a patnak to Nga'ayay Ratoh.

⁶ Oya misatapangay to nga'ayay a tayal i faloco' namo a Kawas ko mamilahci tonini tangasa i piliyawan ni Yis Kristo a tayni saan ko pipaso'lin ako i tamowanan.

⁷ I faloco' ako kamo to romi'ami'ad saka, matatodongay ko nika matini no piharateng ako to saki tamowanan. Nawhani yo marofo kako, yo patnak kako to Nga'ayay Ratoh a pa'ading a patanektek to faloco' no mitngilay i, halo amo a mikapot takowanan a citodong to nano nipaflian no Kawas i takowanan a tayal.

⁸ Mafana' ko Kawas to nika talolong no faloco' ako to saki tamowanan a ma^min. O nano olah ni Yis Kristo konini. O so'linay ko sowal ako.

⁹ Mitolon kako to saki tamowanan. Nanay malcad to nika so'lin no nika fana' namo ato nika fana' namo a mipalita ko nika lomahad no olah namo.

¹⁰ Ta mafana' kamo a mipili' a mido^do to sanga'ayay a dmak. Ta makorac kamo, awaay ko tatoro'en a raraw namo i piliyawan ni Kristo a tayni.

¹¹ Ta masafaco ni Yis Kristo i faloco' namo ko mo^celay a dmak. Ta makahmek no tamdaw ko Kawas to nika tadamaan Ningra.

O Saki ci Kristoan a 'Orip

¹² Salikakaaw, nanay mafana' kamo to nika o malosakatnak no Nga'ayay Ratoh ko nika matini ako a marofo.

¹³ Saka, halomisimaway to loma' no hongti a mikifikifiay a tayring a ma^min ato romaroma a tamdaw i tini a mafana' to nika o nano nika tayal ako ci Kristoan ko sakarofo ako.

¹⁴ O romasato, pakayni i nika rofo ako ko sakatanektek no faloco' no 'alomanay a mitooray to Tapang a salikaka saka, caay ka talaw cangra. Mangalef a mangalef ko nika ^ca paska nangra a patnak to sowal no Kawas.

¹⁵ O romaroma a tamdaw i, o nano 'inap ato kacacoli nangra ato tao ko sakapipatnak nangra to pakayniay ci Kristoan. O romaroma a tamdaw i, o nano nga'ayay a faloco' ko sakapipatnak nangra.

¹⁶ O nano olah no faloco' nangra ko sakapipatnak nangra. Nawhani o nipatirengan no Kawas ci Pawlo to malopapa'ading to Nga'ayay Ratoh saan ko nika fana' nangra.

¹⁷ Oya romaroma a tamdaw i, caay ko nano so'linay a faloco' ko pipatnak nangra to pakayniay ci Kristoan. O nano misatkeday a faloco' ato nika podoh nangra ko sakapipatnak nangra. Onini i, o sapitongalaw nangra to roray ako i tini i nika rofo ako.

¹⁸ Nikawrira, onini ko mimaanay. Ano o pacfaayto, ano o so'linayto i, o pakayraan a ma^min a mipatnak to pakayniay ci Kristoan. Saka, lipahak kako tonini. O mamararid kako a lipahak.

¹⁹ Nawhani mafana' kako to nika pakayni i nipitolon namo ato nipipadama no 'Adingo ni Yis Kristo ko saka caay ka ^ca o mamatdal kako a masadak sa kako.

²⁰ O tata'angay a longoc no faloco' ako i, nanay awaay ko kangodoan to sikining ako. Ta matiya o ha:tiniay ko nika ^ca paska ako anini a pasowal. Ta ano nika 'oripto, ano nika patayto ako i, o sapa'dil ci Kristoan ko polong no mako.

²¹ Ci Kristo ko patosokan no nika 'orip ako. Saka, ano o nika patayto ako i, o sakaci^poc ako.

²² Nikawrira, ano o sakalahci no kakalimlaan a tayal ko nika rarid ako a ma'orip i, o nika 'oripho ako ko nga'ay. I cowa ko papili'en ako hakini? Mafokil kako.

²³ Ma'atem nonini a tosaay kako. O longoc ako i, o sapiliyasaw tonini a hkal a mikapot ci Kristoan. Onini ko nga'ay ako.

²⁴ Nikawrira, tona pa'ayaw kako tamowanan saka, o nika 'oripho ako ko kakalimlaan.

²⁵ Mahaenay ko nipipaso'lin ako saka, caay ko mamapatay kako. O mamararid kako a ma'orip a mikapot i tamowanan a ma^min to sakaci'icel no piti'er namo ci Kristoan ato sakalipahak namo saan ko harateng ako.

²⁶ Ta ano miliyaw kako a tayra i tamowanan a mikapot i, matongal ko nika lata'ang namo i takowanan pakayni i nika laccay namo aci Yis Kristo.

²⁷ O kakalimlaan i, nanay mahapinang i 'orip namo ko nipido^do namo to Nga'ayay Ratoh ni Kristo. Ta ano tayrayra kako a minengneng tamowanan, ano ^ca i, ano caacaay ka tayra kako i, matngil ako ko nika laccay no faloco' namo a tanektek ato nika laccay namo a misa'icel a pa'ading to nipaso'linan namo a Nga'ayay Ratoh.

²⁸ O romasato, aka ka talaw kamo to misa'adaay i tamowanan. Sa'icelen ko faloco', o pahapinangay kamo to o mamatekop cangra, o mamapa'orip kamo, nawhani o pidmak no Kawas konini.

²⁹ Nawhani o sakapitoro' no Kawas i tamowanan a papitoor ci Kristoan i, caay ko pipaso'lin namo Cingraan a ccay. O mamilifet kamo to pades tona mitoor Cingraan.

³⁰ Manga'ay kamo a mikihatiya takowanan anini a milood. O pilood ako anini i, malcad to ma'araway namo i 'ayaw. Mato nikatngilan namo anini ko nika rarid ako a milood toyanan to.