Filimon 1 - 阿美語聖經-新約附詩篇箴言

¹ Ci Pawlo kako, o marofoay to nano nika tayal ako ci Yis Kristoan kako. Patilid kako aci Timoti o salikaka ita i tisowanan, o kaolahan niyam a kapot Filimon

² ato masa'opoay i loma' iso a kiwkay ato fafahiyan a salikaka ci Apfiya ato kapot niyam a malasofitay ni Yis ci Arkipus.

³ Nanay, mapaini no Wama a Kawas ita ato Tapang ci Yis Kristo kamo to mikomi ato rihaday!

O Piti'er ato Olah ni Filimon

⁴ Filimonaw, yo mitolon kako i, maharateng ako kiso a mararid a miahowid i Kawas.

⁵ Nawhani matngil ako ko sowal to pakayniay i piti'er iso to Tapang ci Yisan ato nika olah iso to polong no mitooray.

⁶ Nanay pakayni i nika lakapot ita a miti'er i Kawas ko sakatongal a mafana' to nika manga'ay a malmed ko 'orip ita o malaccayay aci Kristo saan ko nipilongoc ako.

⁷ Salikakaaw, o olah iso ko sakalipahak ato sakahinom ako. Mapa'icel iso ko faloco' no mitooray.

O Pilongoc a Patado ci Onisimusan

⁸ O malcaday kita a mitoor ci Kristoan saka, kona caay ko kakangodoen ako kiso a palimo'ot to sapilahciaw iso to dadmaken.

⁹ Nikawrira, maolah kako i tisowanan saka, longoc han aca ako kiso. O marofoay kako ci Pawlo to saki ci Kristo Yisan i matini, tona o tarokos ni Kristo kako saka,

¹⁰ nanay tngilen iso ko pipatado ako ci Onisimusan a milongoc i tisowanan. O wawa ako cingra i tini i pitoor ci Kristoan. Yo marofo kako i, o pimamaan ningra kako to no 'adingoan.

¹¹ I 'ayaw nao awaay ko ^poc i tisowanan cingra. Nikawrira, anini sa i, o sakaci^poc ita cingra.

¹² Papinokayen ako cingra i tisowanan anini. Matiya o pipafli ako to faloco' ako i tisowanan.

¹³ Sapifo'otan kako i cingraan to sapatodongaw ningra i tisowanan a mipadang takowanan a matayal to saki Nga'ayay Ratoh i nika rofo ako.

¹⁴ Nikawrira, caay pipaci^ci kako to pipadama iso takowanan. O longoc no faloco' ako i, nanay nai nga'ayay a faloco' iso ko pilonok iso a mipadang takowanan. Ano caayho pihai kiso i, caayho pimaan kako.

¹⁵ O sapipacna' ni Onisimus a miliyas i tisowanan i, latek o sapida'ocaw ningra a maro' i tisowanan.

¹⁶ Caayto ko kalokoli cingra anini. Ikakaayto no koli cingra. O kaolahan a salikaka cingra. Tada o kalimlaan ako cingra. Mangalef i tisowanan, nawhani o koli iso cingra. O romasato, o malcaday ato kiso a mitooray to Tapang cingra. Saka, o kaolahan iso a salikaka cingra.

¹⁷ Orasaka, o kapot ako ci Pawlo, ano saan ko harateng iso i takowanan i, samatiyaen o nipihamham iso i takowanan ko pihamham i cingraan a militmoh.

¹⁸ Ano iraay ko tatiihay a dmak ningra i tisowanan, ano citadahay cingra i tisowanan i, kako sato ko citodongay.

¹⁹ Kako ci Pawlo ko mitiliday tonini a sowal. Kako ko papatiko i tisowanan to tadah ningra. (Ano caacaay ka somowal kako i tisowanan i, mafana' kiso to nika citadah iso takowanan to nano nipipa'orip ako to 'adingo iso!)

²⁰ Orasaka, salikakaaw, tona o mitooray kita to Tapang, saka, nanay tooren ko longoc ako. Pa'icelen ko faloco' ako tona o malcaday kita a mitoor ci Kristoan!

²¹ Paso'lin kako to nipido^do iso to sowal ako saka, patilid kako i tisowanan. Nawhani mafana' kako to nika ikaka no nilongocan ako ko nipilahci iso to dmak.

²² O romasato a longoc ako i, pipatala to ccay a pilafinan ako. Nanay mapaca'of no Kawas ko pitolon namo to sapiliyawaw ako a tayra i tamowanan.

O Sapaikor a Sowal

²³ Nga'ayho saan i tisowanan ci Ipafras o kapot ako a marofo tona mitoor ci Yis Kristoan.

²⁴ Mahaen ko sowal no kapot ako a matayal ci Maroko, ci Aristarkus, ci Timas aci Luka.

²⁵ Nanay, mapaini no Tapang a Yis Kristo kamo a mapolong to mikomi!