3 Yohani 1 - 阿美語聖經-新約附詩篇箴言

¹ Patilid kako o ciwlo i tisowanan, Kayus, o kaolahan ako a salikaka. So'linay o kaolahan ako kiso.

² Kaolahan ako a salikaka, nanay mapalmed ko polong no dmak iso. Nanay tanektek ko tireng iso a matiya o nika tanektek no salo'afang iso saan kako a mitolon.

³ Ira ko papinapina a salikaka a tayni a paratoh i takowanan to nika pisarocod iso to so'lin ato marariday a o patosokan no 'orip iso ko so'lin, saka, tadalipahak ako.

⁴ Ano matngil ako ko nika'orip no wawa ako i so'lin i, awaayto ko roma a dmak to ikakaay nonini a sakalipahak ako.

O Pihmek ci Kayusan

⁵ Kaolahan ako a salikaka, so'linay ko dmak iso a malalok a matayal to saki palafangay a salikaka.

⁶ Naparatohay cangra to i tiniay a kiwkay to pakayniay i olah iso. O nipido^do to nafaloco'an no Kawas a patono i cangraan ko nga'ay.

⁷ Nawhani, o saki ci Kristoan ko nika lomowad nangra a patnak. Caay pilayap cangra to maan aca a pipadang no mafokilay to Kawas a tamdaw.

⁸ Orasaka, o hahamhamen ita ko matiniay a tamdaw. Ta malamikihatiyaay kita i cangraan a matayal to saki so'lin.

Ci Tiyotrifis aci Timitrius

⁹ Namapatilidto ako ko kiwkay. Nikawrira, caay pikihar to sowal ako koya mangalayay a malakakridan a tamdaw ci Tiyotrifis.

¹⁰ Orasaka, ano tayra kako i tamowanan i, patalahkal han ako ko nano dmak ningra. Nawhani milokes cingra i tamiyanan a mitongangan. Caay konini a ccay, caay pihamham cingra to tayraay a salikaka. O romasato, lalangen ningra ko sapihamhamananay cangraan a salikaka a milaplap nai kiwkay.

¹¹ Kaolahan ako a salikaka, aka pitodong to tatiihay a dmak. Ka o nga'ayay a dmak ko tatodongen. O nga'ayay ko dmak a tamdaw i, o wawa no Kawas. O tatiihay ko dmak a tamdaw i, caay ka fana' to Kawas.

¹² O kahmekan no tamdamdaw ci Timitrius. O mipawacayay ko so'lin i cingraan, halo ami aca a mipawacay i cingraan. Mafana' kiso to nika o so'linay ko sowal niyam.

O Sapaikor a Sowal

¹³ Adihayho ko sasowalen ako i tisowanan, nikawrira, caay ka ngalay kako a pakatilid a pasowal i tisowanan.

¹⁴ O harateng ako i, nanay kalamkam kako a tayra i tisowanan a minengneng, ta masasi'ayaw kita a masasowal.

¹⁵ Nga'ayho saan a paratoh ko widawidang iso. Nga'ayho han a paratoh ko kahaccaccay no i tiraay a widang niyam. Sanga'ayento ko miso.