2 Tisalonika 1 - 阿美語聖經-新約附詩篇箴言

¹ Ci Pawlo kako, patilid kako aci Silas aci Timoti i tamowanan o i Tisalonikaay a kiwkay no Wama ita a Kawas ato Tapang ci Yis Kristoan.

² Nanay, mapaini no Wama a Kawas ita ato Tapang ci Yis Kristo kamo to mikomi ato rihaday!

O Pisawkit ni Kristo i Piliyawan a Tayni

³ Salikakaaw, tona matongal ko piti'er namo i Kawas ato nika sasiolaolah namo a ma^min saka, o papararid kami a mikansiya i Kawas to pakayniay i tamowanan. O matatodongay ko pihaen niyam.

⁴ Orasaka, pasneng kami i kalokiwkay to Kawas to pakayniay i tamowanan. O nika rarid namo a mihadidi ato nipipaso'lin namo to Kawas i masamaamaanay a kari'ang ato pades namo ko kalita'angan niyam.

⁵ Onini i o kacipinangan to nika o mo^celay ko pisawkit no Kawas, ta pakayni a o mamatatodong kamo a mirenec i Kitakit no Kawas. Onini ko saka rarid namo a mihadidi to pisemsem saki tonini a Kitakit.

⁶ O mamidmak ko Kawas to mo^celay saka, o caco'ayen Ningra to pades ko mikari'angay i tamowanan.

⁷ O hahdalen Ningra kamo o mapadesay a tamdaw. Halo ami a matdalay Ningra. Itiya ano malahaklong ko Tapang ci Yis ato ci'icelay a coyocoyoh Ningra a pa'araw Cingra i marengrengay a namal nai kakarayan a milahci tonini.

⁸ Itiya a matfoc no Tapang ko caay ka fana' to Kawas ato caay pido^do to Nga'ayay Ratoh to pakayniay i Tapang ita ci Yisan.

⁹ Ano miliyaw ko Tapang a tayni, o mamatfoc ko matiniay a tamdaw, mida'oc a matkop, mapala'ed nai ka'ayaw no Tapang ato o mamapaliyas nai ma'dilay a 'icel Ningra.

¹⁰ Itiya toya romi'ad i, o mamapa'dil no mitooray Cingra. O mamakahmek no polong no miti'eray Cingra. Halo kamo a mikapot i cangraan a mapahmek itiya tona paso'lin kamo to sowal niyam.

¹¹ Onini ko sakararid niyam a mitolon to saki tamowanan. Yo mitolon kami to Kawas i, nanay matatodong i niharatengan no mitahidangay tamowanan a Kawas ita kamo. Nanay pakayni i 'icel Ningra a malahci Ningra a ma^min ko nilongocan namo to sakanga'ay no pinangan namo ato dmak no nipiti'er namo Cingraan.

¹² Ta pakayni tonini a mapa'dil namo ko ngangan no Tapang ita ci Yis, ta pakayni i Cingraan a pakalayap kamo to 'dil. O sakalahci nonini i, o nano mikomi no Kawas ato Tapang ci Yis Kristo.