2 Timoti 4 - 阿美語聖經-新約附詩篇箴言

¹ Tona o tatalahkal ci Kristo a milahci to pikowan Ningra, saka tahatangic kako i ka'ayaw no Kawas aci Yis Kristo oya mamisawkit to ma'oripay ato mapatayay a palimo'ot i tisowanan.

² Patnaken ko Nga'ayay Ratoh, ano kanga'ayanto, ano katatiihanto a romi'ad i, patnaken! Ka o tadakodaitay a faloco' a pasifana', po'lacen, pa'icelen, pasifana'en.

³ O mamaraodto ko romi'ad to kana'ayan no tamdaw a mitngil to so'linay a sifana'. O tatooren nangra ko niharatengan nangra a mitahidang to singsingsi to matatodongay a tngilen nangra ko sifana'.

⁴ Mipoet cangra to tangila caay pitngil to so'lin a sowal, 'arawhani pasayra i awaay ^poc a kimad.

⁵ Nikawrira, kasinanot kiso i masamaamaanay a dmak. Hadidien ko pades, katayal tona patnakay, lahcien ko tatayalen iso to no Kawas.

⁶ Maraodto ko romi'ad to pikinafalahan ako to 'orip ako a malasapacakat. Maraodto ko romi'ad to piliyasan ako tonini a hkal.

⁷ O cacikayen ako i, malahcito ako a comikay. O piti'er ako ci Kristoan i, ma'imerto ako.

⁸ Mapatala ito i matini ko sapakaolah takowanan a mo^celay a tamohong, o mo^celay a misawkitay a Tapang ko papafli i takowanan toya sapakaolah i piliyawan ni Kristo a tayni. Caay ka ako a ccay ko mamapakaolah. O mamapakaolah a ma^min ko hinatalaay a tamdaw to sakatalahkalaw no Tapang.

O no Tked a Palimo'ot

⁹ Ano mama^deng kiso i, kalamkamen a tayni i takowanan.

¹⁰ Maolah ci Timas to no hkalan a dmak. Saka, laliw han ningra kako. Tayra cingra i Tisalonika. Tayra ci Krisken i Kalatiya. Tayra ci Titus i Talmatiya.

¹¹ Dengto ci Luka ko i tiniay i takowanan. Tamitaen ci Maroko a tayni. Nawhani o sakaci^poc no tayal ako cingra.

¹² O niocoran ako ci Tikikus a patayra i Ifiso.

¹³ Ano tayni kiso i, hawikidento koya nisidayan ako a kafafang i ci Karpusan no Troas ato cudad ako. O kalimlaan ako i, oya rafir a cudad.

¹⁴ Pato^si ko piri'ang noya misafodawananay a tamdaw ci Aliksantor i takowanan. O mamatfoc no Tapang cingra to nano dmak ningra.

¹⁵ Pina'on ko miso i cingraan. Nawhani tadapacoliay cingra to sowal niyam.

¹⁶ Yo sa'ayaway ako a pa'ading to tireng i, awaay ko padamaay takowanan. Milaliw cangra a ma^min i takowanan. Nanay caay pa'orongen no Kawas i cangraan konini a raraw.

¹⁷ Nikawrira, mikapot ko Tapang i takowanan itiya a pa'icel. Orasaka, malahcito ako a misongila' a patnak a patngil ko sowal no Kawas i roma a finacadan a ma^min. Saka, mapa'orip kako a mapaliyas nai ngoyos no layon.

¹⁸ Caay ka ^ca o papaliyasen no Tapang kako nai masamaamaanay a tatiihay a dmak. O romasato, o kakriden Ningra kako a tayra i kakarayanay a Kitakit. Nanay, caay ka citolas a mapahmek Cingra! Amin.

O Saikoray a Licay

¹⁹ Nga'ayho han a paratoh ci Priskila aci Akuila ato paro no loma' ni Onisiforus.

²⁰ Ira i Korinto ci Irastus. Adada ci Trofimus. Saka, siday han ako cingra i Militus.

²¹ Ano mama^deng kiso i, ka i 'ayaw no kasi^nawan a tayni. Nga'ayho saan i tisowanan ci Yupulus aci Putins aci Linus aci Klautiya ato romaroma a salikaka a ma^min.

²² Nanay, mikapot ko Tapang i tisowanan! Nanay, mapaini no Kawas kamo to mikomi!