2 Pitiro 3 - 阿美語聖經-新約附詩篇箴言

O Niktonan a Sowal to Nipiliyaw ni Kristo a Tayni

¹ Kaolahan ako a salikaka, o saka tosa a nipipatilid ako i tamowanan konini. I tini tonini a tosa a sapatilid ako i tamowanan i, o mipalowaday kako to sakakorac no faloco' namo a papiharateng tonini a dmak.

² Mangalay kako a papiharateng tamowanan to nano sowal no fangcalay a pali'ayaway to sowal no Kawas i ti:yaho ato sowal no tarokos namo to nano limo'ot no pa'oripay a Tapang.

³ Kafana' kamo to kakalimlaan a dmak. I pahrehrekan no hkal i, o aira ko milokesay tamowanan a tamdaw. O mapalitay no 'anof no tireng cangra.

⁴ Sowal asa cangra, <> saan.

⁵ Paci^ci asa cangra a mapawan to nano dmak no Kawas. Nawhani pakaynien no Kawas i sowal ko nipisanga' to kakarayan ato sra. Nai nanom a masadak ko sra a masafaco. Pakayni i nanom ko sakalahci nonini.

⁶ O romasato, o nanom ko sapilenlen to iti:yaayho a hkal a mitkop.

⁷ Nikawrira, oyananto a sowal no Kawas ko sapipalihaen no Kawas to aniniay a kakarayan ato hkal. Tangasa i pisawkitan, pitodohan a mitkop to caay pitoor to Kawas a tamdamdaw ko nipipalihaen Ningra tonini.

⁸ Kaolahan ako a salikaka, o sa'osi no Tapang i, mato ccay a patek (1,000) no mihcaan ko ccay a romi'ad. Mato ccay a romi'ad ko ccay a patek (1,000) no mihcaan. Aka ka pawan kamo tonini.

⁹ O harateng no roma a tamdaw i, <> saan cangra. Nikawrira, caay ko nika osoy no Tapang a milahci to nano sowal Ningra. O mihadidiay Cingra tamowanan a mitala. Nawhani mangalay Cingra to sakasasiyoraw no faloco' no tamdaw a ma^min a miliyas to raraw. Caay ka ngalay Cingra to nika tkop no ccaccay aca a tamdaw.

¹⁰ Nikawrira, o mamatiya o mitakaway a tamdaw koya romi'ad to nipiliyaw haca no Tapang a fahal sa tayni. Itiya a romi'ad i, o mamalahdaw ko kakarayan i tata'angay a harengheng, o mamatodoh a maprar ko i laloma'ay no kakarayan, o mamalasawad a ma^min ko sra ato maamaan a pinasanga' i hkal.

¹¹ Tona mahaen a o mamalasawad konini a maamaan saka, ka o fangcalay ko dmak namo a masarocod i Kawas.

¹² Halamhamen a mitala ko nika ira noya romi'ad no Kawas. Sa'icelen ko faloco' namo to sakaranikayaw noya romi'ad a ira. Itiya i, o mamatodoh a maprar ko kakarayan. O mamatodoh a malaso'or ko i laloma'ay no kakarayan a maamaan.

¹³ Nikawrira, mitala kita to nano nisowalan no Kawas a fa^lohay a kakarayan ato fa^lohay a sra. Mararid ira ko mo^cel itira.

¹⁴ Kaolahan ako a salikaka, o halamhamay kamo a mitala tonini a dmak. Orasaka, sa'icelen ko faloco' namo to sakakorac no faloco' namo, ta awaay ko tatoro'en no Kawas a raraw namo, ta malarihaday kamo ato Cingra.

¹⁵ O nipihadidi no Tapang ita i, o sakanga'ay niyam a mapa'orip han ko harateng. Mahaen ko nipipatilid no kaolahan ita a salikaka ci Pawlo i tamowanan to nano nipaflian no Kawas cingraan a taneng.

¹⁶ O sowal ningra i tilid ningra a ma^min i, o pakayniay tonini a dmak. Ira ko kafokilan no tamdaw a miharateng to nitilidan ningra. Matiya o pipacfa no mafokilay, mapawpaway ko faloco' a tamdaw a mitadtad to romaroma a sowal no Fangcalay Cudad ko nipipacfa nangra a mitadtad tonini a sowal ni Pawlo a palowad to sakatkop nangra.

¹⁷ Kaolahan ako a salikaka, kafana'anto namo konini. Orasaka, pina'on kamo. 'Arawi makayhid no mararaway a dmak no pacfaay a tamdaw kamo to saka^caaw ka lasawad no nika tanektek no faloco' namo.

¹⁸ Ka o mikomi no Tapang ita a Pa'oripay ci Yis Kristo ato nika fana' namo i Cingraan ko sakato'as no faloco' namo a mararid. Nanay, nai anini a tahada'oc a mapa'dil Cingra! Amin.