2 Pitiro 1 - 阿美語聖經-新約附詩篇箴言

¹ O koli ato tarokos ni Yis Kristo kako ci Simon Pitiro. Patilid kako i tamowanan o milcaday tamiyanan a miti'er to Kawas. O nano nika mo^cel no pinangan no Kawas ita ato pinangan no pa'oripay a Tapang ci Yis Kristo ko sakatadamaan no nipiti'er ita.

² Nanay, pakayni i kafana' namo to Kawas ato Tapang ita ci Yisan, ko sakapakalayap namo to makadofahay a mikomi ato rihaday!

O Nipitahidang ato Nipipili' no Kawas

³ O nano 'icel no Kawas ko saka mapafli i titaanan ko polong no sakanga'ay no 'orip ita a mitoor to Kawas. Mafana' kita tonini a mitahidangay titaanan a Kawas. Mangalay Cingra a papikapot titaanan i 'dil Ningra ato nika tadamaan Ningra.

⁴ Pakayni tonini a 'dil ato nika tadamaan Ningra a mapafli i titaanan ko tadamaanay a nisowalan Ningra a sapalmed. Ta pakayni tonini a maliyas namo ko mitkopay to tamdaw a 'anof i tini i hkal. Ta milcad kamo to pinangan no Kawas.

⁵ Orasaka, sa'icelen ko namo. Tongalen to tadamaanay a dmak ko piti'er namo to Kawas. Tongalen to fana' ko tadamaanay a dmak namo.

⁶ Tongalen to paka'metay a faloco' ko fana' namo. Tongalen to kodaitay a faloco' ko paka'metay a faloco' namo. Tongalen to miringiay to Kawas a pinangan ko nika kodait no faloco' namo.

⁷ Tongalen to kasasiolah namo to salikaka ko miringiay to Kawas a pinangan namo. Tongalen to no Kawas a olah ko kasasiolah namo to salikaka.

⁸ Onini ko kakalimlaan namo. Ano matongal a matongal konini a dmak namo i, ci^pocay ko dmak namo a mafana' to Tapang ita ci Yis Kristoan.

⁹ O awaay ko matiniay a dmak i, o mapohaway, o ingataay a ccay ko ma'araway ningra. O matawalay ningra ko nika sawsawto no i 'a:yaway a raraw ningra a makorac.

¹⁰ Orasaka, salikakaaw, sa'icelen a pahapinang i dmak namo ko nika o nitahidanganto, o nipili'anto no Kawas kamo. Nawhani ano haenen namo i, caay ko mamisawad kamo a mitoor.

¹¹ Pakayni tonini ko sakanga'ay namo a micomod i mida'ocay a Kitakit no Tapang ita o pa'oripay ci Yis Kristo.

¹² Orasaka, ano mafanafana' kamo tonini a dmak, ano ci'ice'icel kamo a mitoor to nipatorodan tamowanan a so'lin i, mamararid kako a papiharateng tamowanan tonini a dmak.

¹³ Yo ma'oripho kako anini i, o tayal ako konini a mipalal to faloco' namo saan kako.

¹⁴ Mapakafana'to no Tapang ita ci Yis Kristo kako to nika mangatato kako a miliyas to mamapohed a tireng. Mahapinangto ako konini.

¹⁵ Orasaka, o mamisa'icel kako a misanga' to saka^caaw ka tawal namo a miharateng tonini a dmak i ikor no patay ako.

O Pawacayay to 'Dil ni Kristo

¹⁶ Caay ko nano nisanga'an no tamdaw a kimad ko pitngilan niyam to malosapakafana' niyam i tamowanan to pakayniay i 'icel no Tapang ita ci Yis Kristo ato nika tayni Ningra. O nano minengnengay kami to nika tadamaan Ningra.

¹⁷ Yo palatadamaanen no Wama a Kawas Cingra a pa'dil i, ira kami itiya. Pangiha' sa Cingra o tadamaanay ko 'dil a Kawas a somowal, <> saan.

¹⁸ Itiya i, mikapot kami i ci Yisan itira i fangcalay a lotok. Saka, kami ko mito^toay a mitngil tonini a nai kakarayanay a ngiha'.

¹⁹ Orasaka, matongal ko nika tanektek no faloco' niyam a paso'lin to nano sowal no iti:yaayho a pali'ayaway to sowal no Kawas. O nika 'imer namo tonini a sowal ko nga'ay. Nawhani matiya o dawdaw konini a pata^ngad to to'manay tangasa i kaniharan noya romi'ad. Itiya i, o mamasadak ko sapata^ngad a fo'is a pa'dil to faloco' namo.

²⁰ Kafana' kamo to kakalimlaan a dmak. Aka ka o no tireng a harateng ko dado^doen a mitadtad to ccaccay aca a nipali'ayawan a sowal to matiliday i Fangcalay Cudad.

²¹ Nawhani caay ko nano nafaloco'an no tamdaw ko sakaira no nipali'ayawan a sowal. O mangiyangiay no Fangcalay 'Adingo ko faloco' no tamdaw a papipasowal to nai Kawasay a sowal.