2 Korinto 9 - 阿美語聖經-新約附詩篇箴言

O Sapipadahof i Mitooray

¹ O pakayniay i pipadahof to mitooray itira i Yutaya i, awaay ko sasowalen ako a patilid i tamowanan.

² Mafana' kako to lalok no faloco' namo. <> han ako a somowal a pasneng ko i Makitoniyaay a tamdaw to dmak namo. Onini a lalok namo ko sakangiyangi no faloco' no 'alomanay itira.

³ O sapiocor ako tonini a papinapina a salikaka i, o sakaci^pocaw no nipipasneng ako i cangraan to pakayniay i tamowanan. O romasato, o sapido^doaw namo to sowal ako a mipatala to sapadahof.

⁴ Ano caay haenen namo i, ano malahaklongto kami ato Makitoniya a tamdaw a tayra i tamowanan, ano mahapinang nangra ko nika caho pipatala namo, tona hatini ko pipaso'lin niyam i tamowanan i, malakangodoanto ita konini.

⁵ Orasaka, tona maktonto namo ko sowal i 'ayaw saka, kalah han ako ko salikaka a paki'ayaw ako a patayra i tamowanan a papipatala toya sapadahof namo. Ta caay pisa'idi'idi kamo a pasadak, ta o nano lipahak namo ko pipatala saan ko harateng ako.

⁶ Haratengen, o caay ka hakowa ko nipalomaan i, caay ka hakowa ko nilitodan. O adihayay ko nipalomaan i, adihay ko nilitodan.

⁷ Orasaka, ka o nihapinangan no faloco' no kahaccaccay ko sapasadak. Aka ka o nisa'idi'idian, aka ka o nipaci^cian a faloco' ko sapasadak. Nawhani o lipahakay a pafli i, o kaolahan no Kawas.

⁸ Ma^deng ko Kawas a pafli to adihayay a sakalmed namo. Ta ma^deng kamo. Caay konini a ccay. Cirafas kamo to sapadama i masamaamaanay a nga'ayay a dmak.

⁹ Mato sowal a matilid i Fangcalay Cudad, <> saan.

¹⁰ Pafli ko Kawas i mifolsakay a tamdaw to sapaloma ato malokakaenen nangra a ^pang. Onini a Kawas ko papafli i tamowanan to adihayay a sapaloma a palahad a patongal to hci no nga'ayay a dmak namo.

¹¹ O mamararid haca ko Kawas a mipakadofah i tamowanan to masamaamaanay. Ta mararid kamo a halipadahof. Ta pakayni tonini a padahofay a dmak namo ko sakafana' no 'alomanay a tamdaw a miahowid to Kawas.

¹² Caay ko sapipadang to cango'ot no mitooray a ccay konini a padahofay a tayal namo. O sapalowadaw to faloco' no 'alomanay a tamdaw a papiahowid to Kawas.

¹³ Onini a nga'ayay a dmak o ccay no wacay, to sakafana' no 'alomanay a tamdaw to pihaklong namo ci Kristoan, ato nika so'lin no faloco' namo a mido^do to nipatnakan a Nga'ayay Ratoh, halipalada' haca to pakoyocay a tamdaw, ta mipa'dil cangra to Kawas.

¹⁴ O romasato, tona tadamaan ko mikomi no Kawas a mapaini i tamowanan saka, o mamaolah cangra i tamowanan, o mamitolon cangra to saki tamowanan.

¹⁵ O aahowiden ita ko Kawas! Caay ko mama^min a sowalen ko mikomi Ningra!