2 Korinto 8 - 阿美語聖經-新約附詩篇箴言

O Pipadahof no MisaKristoay

¹ Salikakaaw, nanay mafana' kamo to nika masamaan ko dmak no Kawas to nano sini'ada Ningra to i Makitoniyaay a kalokiwkay.

² I tini i nika pades nangra to masamaamaanay a mapalifet no Kawas cangra. Nikawrira, tadalipahak cangra. Talacowa o pakoyoc cangra, nikawrira, maolah cangra a padahof.

³ Pawacay kako to pikinafalah nangra a pafli, nawhani, lonok saan cangra a padahof, ikaka haca no iraay i tireng nangra ko nipipadahof.

⁴ Mingitangit cangra i tamiyanan to sakanga'ayaw nangra a mikapot to pipadahof a mipadang to mitooray i Yutaya.

⁵ Ikaka no niharatengan niyam ko pipadahof nangra. I 'ayawen nangra ko pipacakat to tireng i Tapang. Ta tooren nangra ko nafaloco'an no Kawas a mipadama tamiyanan.

⁶ Tona misatapangto ci Titus tonini a nga'ayay a tayal saka, papipa'icelen niyam cingra to sapilahciaw namo tonini a mipadahofay a tayal.

⁷ Tadamaan ko nipiti'er namo ci Kristoan, mafana' kamo a somowal, tadamaan ko fana' namo, maolah kamo a mipadang to tao, maolah kamo i tamiyanan. Saka, haenen ko dmak namo tonini a mipadahofay a tayal.

⁸ Onini a sowal ako i, caay ko palimo'otay tamowanan. Mangalay kako a pahapinang to so'linay a olah namo a mipadang. Saka, patinakoen ako kamo to no tao a lalok.

⁹ Mafana'to kamo to mikomi no Tapang ita ci Yis Kristo. Nano tadamaanay ko 'orip Ningra. Nikawrira, malapakoyoc Cingra to sakalmed namo. O sakasaan i, pakayni i nika lapakoyoc Ningra a malacidafongay kamo.

¹⁰ Pasowal kako to niharatengan ako to pakayniay tonini a padahofay a dmak. Nawhani o sakaci^poc namo konini. I roma a mihca kamo a misatapang tonini a dmak. O namilongocay kamo to sapilahciaw tonini.

¹¹ Orasaka, kaimatini kamo a milahci tonini. Samatiyaen o nipisahalaka namo i 'ayaw yo misatapang ko nipilahci namo tonini a mipadahof. Pakaynien i kinaira namo ko nipilahci a mipadahof.

¹² Ka o tatodong no kinaira no tireng ko sapasadak namo. Ano o nai faloco'ay namo ko nipipadahof namo i, o karahkeran no Kawas konini. Aka ka o nipaci^cian konini a dmak.

¹³ Pakarorayaw ako cangra. Ta matdal ko roray no tao, caay ko nika saan ako.

¹⁴ O sakalalen namo a madadama konini a dmak. Nawhani kadofah kamo anini. Saka, o papadangen namo ko cango'otay a tamdaw. Nikawrira, ano cango'otto kamo, ano makadofahto cangra i, o papadangen nangra kamo. Ta malalen kamo a madadama.

¹⁵ Mato sowal a matilid i Fangcalay Cudad, <> saan.

Ci Titus ato Kapot Ningra

¹⁶ O aahowiden ko Kawas. Nawhani pakarokroken Ningra ko faloco' ni Titus a matiya o no niyam a midama to saki tamowanan.

¹⁷ Caay ko nipihai ningra a ccay to longoc niyam. Tona o malalokay a tamdaw cingra saka, o nai faloco'ay ningra ko sakatayra ningra i tamowanan.

¹⁸ Ocoren niyam ko ccay a salikaka a papihaklong cingraan. Tona matayal konini a tamdaw to Nga'ayay Ratoh saka, o kakahmekan no kalokiwkay cingra.

¹⁹ Caay korira a ccay. O nipili'an no kalokiwkay cingra a mipatireng a papikapot i tamiyanan a mirakat a matayal tonini a padahofay a dmak. O sapahmek to Tapang ato sapahapinang to olah no faloco' niyam a mipadang konini a dmak niyam.

²⁰ Mina'on kami to saka^caaw pilikaf no tao to pitatoy niyam tonini a sapadahof a payso.

²¹ Onini i, caay ko sakanga'ayaw no dmak a tapalen no Tapang a ccay. O sakanga'ayaw a tapalen no tamdamdaw saan ko harateng niyam.

²² Orasaka, ocoren haca niyam ko ccay a salikaka a papihaklong i cangraan. Malifet niyam ko lalok ningra i masamaamaanay a dmak, mafana' kami to nikalalok no faloco' ningra a halipadama to cimacimaanan i masamaamaanay a dmak. Anini sato i, tanektek ko paso'lin ningra i tamowanan, caloh sa to sapipadangan i tamowanan.

²³ Ci Titus i, o kapot ako a matayal a mipadang i tamowanan. Oya tatosa a mihaklongay cingraan a salikaka i, o taypyaw no kalokiwkay cangra. O pa'dilay ci Kristoan ko tayal nangra.

²⁴ Orasaka, pahapinangen ko olah namo i cangraan. Ta mafana' ko kalokiwkay to nika o so'linay ko nika lata'ang niyam to pakayniay i tamowanan.