2 Korinto 7 - 阿美語聖經-新約附詩篇箴言

¹ Kaolahan ako a salikaka, tona ira i titaanan ko matiniay a niktonan no Kawas a sowal saka, liyasaw ita ko paacekay to tireng ato salo'afang ita a dmak a mikorac to tireng. Ka o nano ngodo to Kawas ko sapisongila' ita a mikorac.

O Lipahak ni Pawlo

² Kahalamham kamo i tamiyanan a mipatala. Awaay ko tatiihay a dmak niyam i cimacimaan. Awaay ko nikari'angan niyam, awaay ko nisafana'an niyam a tamdaw.

³ O sakasomowal ako tonini i, caay ko pitoro' ako to raraw namo. Mato sowal ako i 'ayaw, Wata: ko nika olah niyam i tamowanan. Ano nika 'oripto, ano nika patayto ita i, mararid kita a malakapot han ako kamo kiyami.

⁴ Tanektek ko pipaso'lin ako i tamowanan. Saka, o kalata'angan ako kamo. Saka, mahinom ko faloco' ako. Ano mapadepades kako to masamaamaanay i, tata'ang ko lipahak ako.

⁵ Natahira kami i Makitoniya i, awaay ko karihadayan niyam. Mapades kami to masamaamaanay. Ira ko kacacoli niyam ato tao. Ira ko talaw no faloco' niyam.

⁶ Nikawrira, o mihinomay a Kawas to matoleday a tamdaw i, hinomen Ningra kami pakayni i nika ira ni Titus.

⁷ Caay ko nika ira ni Titus a ccay. Pasowal cingra to pakayniay i nipipa'icel namo i cingraan. O sakahinom niyam konini. Maparatoh ningra kami to nika 'ilol namo takowanan ato nika rarom namo to pakayniay i tamiyanan ato nika lalok namo a pa'ading takowanan. Saka, matongal a matongal ko nika hinom ako.

⁸ Talacowa mapakararom ako kamo pakayni i nipipatilid ako i 'ayaw, nikawrira, caay ka ksem kako tonini. Yo mahapinang ako ko nika rarom namo to pinapina a romi'ad pakayni toya nipipatilid ako i, maksem kako itiya.

⁹ Nikawrira, lipahakto kako i matini. Onini a lipahak ako i, caay ko nano nikararoman namo. O nika rarom namo a mifalic to faloco' ko sakalipahak ako. Mapakatayal no Kawas konini a rarom namo to sakaci^poc namo. Caay ko mikari'angay kami i tamowanan.

¹⁰ Nawhani o matatodongay i nafaloco'an no Kawas a rarom i, caay ko kakseman, o mifalicay to faloco' a pa'orip konini. Nikawrira, o sakapatay ko kalorarom no tamdaw.

¹¹ Haratengen ko dmak no Kawas a pakatayal to nika rarom namo. Pakayni tonini ko sakalalok namo a pahapinang to nika awa no raraw namo. Wata: ko nika kter namo. Mackok, miharateng, malalok kamo a mitfoc to caay ka mo^cel. Saka, mahapinang ko nika awa ko tatoro'en a raraw namo to pakayniay toya fangafang.

¹² Orasaka, o pipatilid ako i 'ayaw i tamowanan i, caay ko pipa'ayaw ako toya moraraway ko dmak a tamdaw. Caay ko pipa'ayaw ako toya makari'angay a tamdaw. O sapahapinangaw ako i ka'ayaw no Kawas to nika talolong no lalok namo to saki tamiyanan.

¹³ Orasaka, mapa'icelto kami itiya. Caay konini a ccay. Lipahak kami to nano lipahak ni Titus. Nawhani mapadama namo cingra to sakalipahak ningra.

¹⁴ Pasneng kako a pasowal i ci Titusan to pakayniay tamowanan. Caay pakangodo kamo takowanan. Mato nika so'lin no nika somowal niyam i tamowanan ko nika so'lin no nipipasneng niyam ci Titusan.

¹⁵ Maharateng ni Titus ko nipitngil namo to sowal ningra ato nika ngodo namo a mihamham i cingraan. Saka, matongal ko nika olah ningra i tamowanan.

¹⁶ Salipahak sa kako i tamowanan. Nawhani tanektek ko pipaso'lin ako to dmak namo.