2 Korinto 5 - 阿美語聖經-新約附詩篇箴言

¹ Ano matastastas ko i tiniay i hkal a todong no cahong ita a tireng i, mafana' kita to nika ira ko nipatalaan no Kawas to nisanga'an Ningra a mida'ocay a malokamaro'an ita a loma' i kakarayan.

² Tomangic kita anini i tini tonini a todong no cahong ita a tatirengan a milongoc to sapica'dongaw ita to i kakarayanay a loma' o todong no fa^lohay a tireng ita.

³ Ano ca'dongen ita konini i, caay ko salo'afang a ccay, o citirengay kita.

⁴ Kita o i tiniay tona cahong i, matiya o mi'orongay to kartengay a tomangic. Caay ko nika ngalay ita a mihlong tonini a cahong. Mangalay kita a mapaca'dong no Kawas to i kakarayanay a tireng. Ta mapatisod to ma'oripay ko mamapatay a tireng ita.

⁵ O Kawas ko mipatalaay to sakanga'ay ita a mafalic. Cingra ko pafliay i titaanan to Fangcalay 'Adingo to malokacipinangan ita to nika o mamalahci ko nisowalan Ningra i titaanan a ma^min.

⁶ Orasaka, mararid a ki^mel ko faloco' niyam. Mafana' kami, yo i tiniho tonini a tatirengan kami i, caayho ka itira kami i nipatalaan no Tapang a loma'.

⁷ Nawhani caay ko ma'araway ko pi'arawan niyam. O nano piti'er niyam ci Kristoan ko sapidmak niyam.

⁸ Ki^mel ko faloco' niyam. Saka, o piliyas tonini a tatirengan a mikapot to Tapang ko nga'ay saan ko harateng niyam.

⁹ Nikawrira, caay ko kakalimlaan ko nika i tini niyam i tatirengan ato nipiliyas niyam to tatirengan. O patosokan no faloco' niyam i, o sapalipahakaw to Tapang.

¹⁰ O tatayra kita a ma^min a tomireng i ka'ayaw ni Kristo a masawkit. Ano masamaan ko dmak no paytmek ita yo i hkalho, ano o nga'ayayto, ano o tatiihayto i, pakayni tonini ko pilayap ita to tatodong no dmak ita.

O Nika Lali'ay ita ato Kawas Pakayni ci Kristoan

¹¹ Tona mafana' kami to nika o kakangodoan ko Tapang saka, soloten niyam ko faloco' no tamdaw a papipaso'lin. Mafana' ko Kawas to dmak niyam a ma^min. Nanay halofaloco' namo a mafana' takowanan.

¹² Caay ko miliyaway kami a pakafana' i tamowanan to pakayniay i tamiyanan. Deng o longoc niyam i, nanay ira ko kalata'angan namo to pakayniay i tamiyanan. Ta ira ko sapaca'of namo toya mahmekay to papotal aca, o caay ko pinangan no tamdaw ko ninengnengan.

¹³ Ano so'linay o maapaay kami a nengnengen namo i, o nano nika tayal niyam to no Kawas konini. Ano masatamdaway kami a nengnengen namo i, o sakanga'ay namo konini.

¹⁴ O makowanay no olah ni Kristo kami. Nawhani mafana'to kami, mapatay ko ccay a tamdaw to saki polong no tamdaw. Saka, o mapakapotay ko polong no tamdaw ci Kristoan a mapatay.

¹⁵ O nika patay Ningra to saki polong no tamdaw i, o saka^caawto pido^do no tamdaw to no tirengan a harateng. O sakapido^doaw nangra to faloco' noya mipatodongay cangraan a mapatay a lomowaday a ma'orip nai patay.

¹⁶ Orasaka, i ikor nonini caayto samatiyaen niyam o pinengneng no kalotamdaw ko pinengneng niyam to sakafana' to tamdaw. Ano matiyatiya o pinengneng no kalotamdaw ko nipinengneng niyam ci Kristoan i ti:yaho, nikawrira, caayto ka haenen niyam ko pinengneng i Cingraan anini.

¹⁷ Ano mapalaccay aci Kristo ko cima a tamdaw i, o fa^lohayto a tamdaw cingra. Malasawadto ko matlangay a pinangan ningra, ta masafa^lohto cingra.

¹⁸ O nano Kawas a dmak konini a ma^min. Pakaynien no Kawas i ci Kristoan ko sakalali'ay ita ato Cingra. Patoroden Ningra i titaanan ko sakalali'ay Ningra ato tamdaw a tayal.

¹⁹ Pakaynien no Kawas i ci Kristoan ko sakalali'ay Ningra ato tamdamdaw. Caayto haratengen no Kawas ko raraw nangra. O romasato, patoroden Ningra i tamiyanan konini a sakalali'ay Ningra ato tamdaw a sowal.

²⁰ O tarokos ni Kristo kami. Pakaynien no Kawas i tamiyanan ko nipipa'icel i tamowanan. Saka, patadoen niyam ci Kristo a milongoc to sakalali'ayaw namo ato Kawas.

²¹ Awaay ko raraw ni Kristo. Nikawrira, ci Kristo ko nipastekan no Kawas i raraw to nano raraw ita. Ta pakayni i nika laccay ita aci Kristo a malamilcaday kita to mo^celay a pinangan no Kawas.