2 Korinto 2 - 阿美語聖經-新約附詩篇箴言

¹ O nihapinangan ako i, o saka^caaw piliyaw ako a pakasmer i tamowanan a miliso'.

² Nawhani ano o nipipakasmer ako i tamowanan ko piliso' ako i, cimaho ko papalipahak i takowanan saw? Deng kamo o nipakasmeran ako ko papalipahak i takowanan.

³ O nika matira no nipipatilid ako i 'ayaw i, ano tayra kako i tamowanan i, o saka^caaw pakasmer namo i takowanan, o sapalipahakaw namo i takowanan. Nawhani o lipahak ako i, o sakalipahak namo a ma^min saan ko pipaso'lin ako.

⁴ Nano pades ato tangic no faloco' ako saka, talalosa' sa kako a patilid i tamowanan i 'ayaw. Onini i, caay ko sapakasmeraw i tamowanan. O sakafana'aw namo to nika olah ako i tamowanan.

O Pihpol to Ciraraway

⁵ Ano ira ko pakasmeray a tamdaw i cimaanan namo i, caay ko kako ko nipakasmeran ningra. Kamo ko nipakasmeran ningra. O sakasaan ako a somowal i, caay ka ngalay kako a miples i cingraan.

⁶ Ma^dengto ko nipitoro' no 'alomanay to matiniay a tamdaw.

⁷ O nipihpol namo to raraw ningra a mihinom i cingraan ko nga'ay. Ano caay ka haenen namo i, latek mapakinali ko nika smer ningra.

⁸ Orasaka, milongoc kako i tamowanan to sapipahapinangaw namo to nika olah namo i cingraan.

⁹ O sakasaan ako a patilid i 'ayaw i tamowanan i, o pilifet ako i tamowanan a mihapinang to nika so'lin no dmak namo a mitoor to sowal ako.

¹⁰ Ano hpolen namo ko raraw no nima i, halo ako a mihpol to raraw noya tamdaw. Ano ira ko hahpolen ako a maan a raraw nima i, patado kako tamowanan i ka'ayaw ni Kristo a mihpol to raraw noya tamdaw.

¹¹ Onini i, o saka^caaw ita ka safana' ni Satan. Nawhani mafana' kita to nisahalakaan ni Satan.

O Rawraw ni Pawlo

¹² Yo tayra kako i Troas a patnak to Nga'ayay Ratoh to pakayniay ci Kristoan i, mafohatto no Tapang ko fawahan no malotatayalen ako.

¹³ Itiya i, marawraw ko faloco' ako, nawhani caay ka lalitmoh kami aci Titus a salikaka. Saka, liyas sato kako to i tiraay a tamdaw a tayra i Makitoniya.

Mapakapot ci Kristoan a Milowid

¹⁴ Orasaka, o kakansiyaen ko Kawas. Nawhani mararid Cingra a mikrid i tamiyanan o mapalitay ni Kristo a papikapot i ci Kristoan a papilowid. Pakaynien no Kawas i tamiyanan ko sapalosiyang i cowacowa to sakafana' no tamdamdaw to fangsis ni Kristo.

¹⁵ Matiya o fangsisay a nipacakatan ni Kristo i Kawas kami a mapalosiyang i mamapa'orip ato mamatkop a tamdaw.

¹⁶ I mamatkop a tamdaw i, o sakapatay a sanek. I mamapa'orip a tamdaw i, o saka'orip a sanek. Cima ko matatodongay a matayal to matiniay a tayal hakiya?

¹⁷ Caay ka matiya o 'alomanay a tamdaw kami a patdo sa a pasowal to sowal no Kawas. Nawhani o niocoran no Kawas kami. Saka, so'linay ko sowal niyam i ka'ayaw no Kawas a matayal to ni Kristo.