1 Yohani 4 - 阿美語聖經-新約附詩篇箴言

O So'linay a 'Adingo ato Palafoay

¹ Kaolahan ako a salikaka, aka patdo a paso'lin toya, o maaro'ay no Fangcalay 'Adingo kako, ya sanay. Hapinangenho a mipalita ko nika o nai Kawasay hakiya? Caay hakiya? Nawhani 'aloman ko mangah a pali'ayaway to sowal no Kawas a masadak a talacowacowa.

² O maan ko kacipinangan namo to 'Adingo no Kawas saw? O patalahkalay a somowal to nika o malatamdaway ci Yis Kristo sanay i, o maaro'ay no 'Adingo no Kawas. Pakayni tonini ko sakafana' namo to nika so'linay 'Adingo no Kawas koya maro'ay i cingraan.

³ Caay ko malatamdaway ci Yis, sanay i, caay ko maaro'ay no 'Adingo no Kawas. O misa'adaay ci Kristoan ko maro'ay i cingraan. Matngilto namo ko nika o aira ko matiniay a dmak. Irato i hkal i matini ko matiniay a dmak.

⁴ Wawaaw, o wawa no Kawas kamo saka, malowidayto namo koya mangah a pali'ayaway to sowal no Kawas a singsi no hkal. Nawhani ikakaay no 'icel no maro'ay i cangraan a 'adingo ko 'icel no maro'ay i tamowanan a Fangcalay 'Adingo.

⁵ O no hkalan koya singsi. Orasaka, o pakayniay i nohkalan a dmak ko sowal nangra. Mitngil ko no hkalan a tamdaw to sowal nangra.

⁶ Nikawrira, o no Kawasto kita. Saka, mitngil to sowal ita ko mafana'ay to Kawas a tamdaw. Caay pitngil to sowal ita ko caay ko no Kawas a tamdaw. Onini ko sakafana' ita to kasasiroma no so'lin a 'Adingo ato palafoay a 'adingo.

O Olah ko Kawas

⁷ Kaolahan ako a salikaka, kasasiolaolah kita, nawhani o nai Kawasay ko olah. O ciolahay a tamdaw i, o wawa no Kawas, o mafana'ay to Kawas cingra.

⁸ Saka, o awaay ko olah a tamdaw i, caay ka fana' to Kawas, nawhani o olah ko Kawas.

⁹ Ocoren no Kawas ko dengan a Wawa Ningra a patayni i tini i hkal. Pakayni i Cingraan ko sakaci'orip ita to mida'ocay a 'orip. I tini a mahapinang ita ko olah no Kawas i titaanan.

¹⁰ Caay ka o kita ko maolahay to Kawas. O Kawas ko maolahay titaanan a miocor to Wawa Ningra to sakahpol no raraw ita. Onini ko olah hananay.

¹¹ Kaolahan ako a salikaka, hatiniay ko olah no Kawas i titaanan saka, o mamasasiolaolah aca kita.

¹² Awaayho ko paka'araway to Kawas. Nikawrira, ano masasiolaolah kita i, ira ko Kawas titaanan. Mapalahci a misongila' i faloco' ita ko olah Ningra.

¹³ Mapaflito no Kawas kita to 'Adingo Ningra, saka, mafana' kita, ira ko 'orip Ningra i titaanan, ira i titaanan ko 'orip Ningra.

¹⁴ Ocoren no Wama ko Wawa Ningra a malaPa'oripay to tamdamdaw i hkal. Ma'araway niyam konini a dmak. Saka, pawacay kami i tamowanan tonini.

¹⁵ O Wawa no Kawas ci Yis, ano saan ko tamdaw a patalahkal i, ira ko 'orip no Kawas i titaanan, ira i titaanan ko 'orip no Kawas.

¹⁶ Mafana' kita, o paso'linay kita to nika olah no Kawas i titaanan. O olah ko Kawas. Saka, o kala'orip sanay to olah a tamdaw i, ira ko 'orip no Kawas i cingraan, ira haca i cingraan ko 'orip no Kawas.

¹⁷ Mahaenay saka, mapalahci a masongila' ko olah i faloco' ita. Ta caay ka talaw kita i pisawkitan a romi'ad. Nawhani mafana' kita to nika matiyato ci Kristo ko pinangan ita i tini i hkal.

¹⁸ Caay ka talaw ko ciolahay a tamdaw. Nawhani mapalasawad no masongila'ay a olah ko talaw. O matalaway a tamdaw i, o mamatfoc kako saan cingra. Nawhani caayho ka songila' ko olah i faloco' ningra.

¹⁹ I 'ayawto ko nika olah no Kawas i titaanan saka, ciolah kita.

²⁰ <> sanay a tamdaw, ano mi'intel cingra to salikaka i, o misamangahay cingra a somowal. Ano caay ka ciolah cingra to ma'araway ningra a salikaka i, mangalef ko nika ^ca ka olah ningra to caay ka 'araw a Kawas.

²¹ O maolahay to Kawas a tamdaw i, o mamaolah to salikaka. Mahaen ko limo'ot ni Kristo i titaanan.