1 Yohani 3 - 阿美語聖經-新約附詩篇箴言

O Wawa no Kawas

¹ Nengnengen, wata: ko nika olah no Wama titaanan. O wawa no Kawas han Ningra kita a mitahidang. So'linay o wawa Ningra kita. Orasaka, caay ka fana' ko no hkalan a tamdaw i titaanan. Nawhani caay ka fana' cangra to Kawas.

² Kaolahan ako a salikaka, o wawato no Kawas kita i matini. Talacowa caayho ka hapinang ita ko nika o mamasamaan kita, nikawrira, mafana' kita ano talahkalto ci Kristo i, itiya a miringi kita ci Kristoan. Nawhani itiya a ma'araw ita ko so'linay a tireng Ningra.

³ O iraay ko pafaloco'an to katalahkalan ni Kristo a tamdaw i, o mamikorac to tireng no niyah, matiya o nika korac ni Kristo.

⁴ O ciraraw a tamdaw i, o miliyangay to rikec no Kawas. Nawhani o piliyang to rikec ko saka ciraraw.

⁵ Mafana' kamo to nika o sapipalasawadaw to raraw ko nika talahkal ni Kristo a tayni. Awaay ko maan aca a raraw Ningra.

⁶ Orasaka, ano mararid ko tamdaw a misiket ci Kristoan i, caay ka rarid cingra a ciraraw. O marariday a ciraraw a tamdaw i, o caayho paka'araw, o caayho ka fana' i ci Kristoan.

⁷ Wawaaw, aka ka sawi no nimanima kamo. O mido^doay to mo^cel a tamdaw i, matiya o nika mo^cel no pinangan ni Kristo ko nika mo^cel no pinangan ningra.

⁸ O marariday a ciraraw a tamdaw i, o mikitiraay i Palafoay. Nawhani o raraw ko pinangan no dmak no Palafoay nai satapangan. Orasaka, talahkal ko Wawa no Kawas a tayni to sapalasawadaw to dmak no Palafoay.

⁹ O malawawaayto no Kawas a tamdaw i, caayto ka rarid a ciraraw. Nawhani iraayto ko 'orip no Kawas i cangraan. Tona o Wama nangra ko Kawas saka, caayto ko mamararid cangra a ciraraw.

¹⁰ O caay ka pido^do to mo^celay ato caay ka olah to salikaka a tamdaw a ma^min i, caay ko wawa no Kawas. Saka, itini a mahapinang ko kasasiromaroma no wawa no Kawas ato wawa no Palafoay.

Kasasiolaolah

¹¹ Kasasiolaolah kamo yasanay a sowal i, o matngilay namo nai satapangan no nipitoor namo.

¹² Aka ka matiya ci Kainan kita. O mikitiraay cingra to Palafoay. Saka, patayen ningra ko safa ningra. Nawiro patayen ningra ko safa ningra hakiya? Nawhani tatiih ko dmak ningra. O mo^cel ko dmak no safa ningra.

¹³ Salikakaaw, aka ka fahka' kamo to nipi'intel no hkal a tamdaw i tamowanan.

¹⁴ Mafana' kita, matiyato o lomowaday a ma'orip nai patay kita a ma'orip anini. Pakayni i nika olah ita to salikaka a mafana' kita tonini. O caay ka olah a tamdaw i, matiya o mapatayay cingra.

¹⁵ O mi'intelay to salikaka a tamdaw a ma^min i, o mipatayay to tamdaw. Mafana' kamo, o mipatayay to tamdaw i, caay ka ci'orip to mida'ocay.

¹⁶ Kinafalah ci Kristo to 'orip Ningra to saki titaanan. Pakayni tonini ko sakafana' ita to olah hananay. Orasaka, o mamikinafalah kita to 'orip ita to saki salikaka.

¹⁷ Ano ma'araw no cidafongay a tamdaw ko cango'otay a salikaka, ano caay ka sini'ada cingra i, maanen ningra ko nika somowal to nika o maolahay kako to Kawas saan saw?

¹⁸ Wawaaw, aka ka o ngoyos aca ato sowal ko nipiolah namo to tamdaw. Ka o so'linay a faloco' ato nga'ayay a dmak ko nipiolah namo.

Caay ka Talaw i Ka'ayaw no Kawas

¹⁹ Orasaka, pakayni tonini a mafana' kita, o no so'lin kita, o rihakedayto kita i ka'ayaw no Kawas.

²⁰ Ano iraira ko pipakokot no nga'ay a faloco' ita i, nikawrira, mararid a mafana' kita to nika ikakaay no mita ko faloco' no Kawas, a pakata'sel Cingra to kalomaamaan.

²¹ Orasaka, kaolahan ako a widangaw, ano awaay ko pipakokot no nga'ay a faloco' ita i, awaayto ko kakatalawan ita i ka'ayaw no Kawas.

²² Ano o maan ko ningitangitan ita i, mapafli no Kawas. Nawhani o mido^doay kita to limo'ot no Kawas. O romasato, o palipahakay Cingraan ko dmak ita.

²³ O limo'ot no Kawas hananay i, o nipipaso'lin ita to Wawa no Kawas ci Yis Kristoan ato nipido^do ita to limo'ot ni Kristo a masasiolaolah.

²⁴ O mido^doay to limo'ot no Kawas i, o misiketay i Kawas. Misiket ko Kawas cingraan. O maan ko kafana'an ita to iraay i laloma' ita ko 'orip no Kawas saw? Pakayni i nipaflian Ningra i titaanan a Fangcalay 'Adingo ko sakafana' ita to nika o misiketay kita i Kawas.