1 Yohani 1 - 阿美語聖經-新約附詩篇箴言

O Sakaci'orip a Sowal

¹ Patilid kami i tamowanan to pakayniay i Sakaci'orip a Sowal. Onini a Sakaci'orip a Sowal hananay i, o iraayto i 'ayaw no nika sanga' no hkal. Yo talahkal konini a Sakaci'orip a Sowal i, matngilayto no niyam.

² Ma'arawayto no mata no niyam. Manengnengayto no niyam. Nikapaanto no kamay niyam Cingra. Saka, pawacay kami a paratoh i tamowanan to pakayniay i mida'ocay a 'orip. Onini a mida'ocay a 'orip i, o nano mikapotay ci Wamaan. Tayni Cingra a pahapinang i tamiyanan.

³ O sakapiparatoh niyam i tamowanan to nano ma'araway ato nano matngilay no niyam i, o sakalaccayaw ita. O nika laccay ita hananay i, o nika laccay ita ato Wama ato Wawa Ningra ci Yis Kristo.

⁴ O sakapipatilid niyam i tamowanan tonini i, o sakatata'ang no lipahak ita.

O Likat ko Kawas

⁵ O likat ko Kawas. Awaay i Cingraan ko mamamamang aca a to'man. O nano nitngilan niyam ci Kristoan konini. Saka, paratoh kami i tamowanan.

⁶ Malaccayay kako ato Kawas ano saan kita a somowal, nikawrira, ano i to'manay ko dmak ita i, o misamangahay kita, o caay pido^do to so'lin a dmak.

⁷ Nikawrira, ano matiya o nika i likat no Kawas ko nika i ta^ngaday ko dmak ita i, o malaccayay kita. Ta o rmes no Wawa Ningra ci Yis ko mikoracay titaanan a mipalasawad to polong no raraw ita.

⁸ Awaay ko raraw ako ano saan kita a somowal i, o misamangahay kita to tireng, awaay to ko pikihar no so'lin i titaanan.

⁹ Ano patalahkal kita to raraw no tireng i ka'ayaw no Kawas i, hpolen Ningra ko raraw ita a mikorac titaanan nai polong no tatiihay a dmak. Nawhani o so'linay a mo^cel ko dmak no Kawas. Do^doen Ningra ko nisowalan Ningra a milahci.

¹⁰ Ano caay ka ciraraw kako ano saan kita i, o pakomangahay kita to Kawas. Awaay i faloco' ita ko sowal Ningra.