1 Tisalonika 4 - 阿美語聖經-新約附詩篇箴言

O Palipahakay to Kawas a Dmak

¹ Saikorayto i, salikakaaw, o naminanamayto kamo i tamiyanan to nika samaanen ko dmak a palipahak to Kawas. O mahaenayto ko dmak namo. Pakaynien niyam i ngangan no Tapang ci Yis ko pipa'icel i tamowanan, nanay haenen ko dmak namo a misa'icel.

² Nawhani mafana' kamo, o nano limo'ot no Tapang ci Yis i tamiyanan ko sapalimo'ot niyam i tamowanan.

³ O nafaloco'an no Kawas i, o nika korac namo ato nipiliyas namo to ma'odangay a dmak.

⁴ Kamo o mararamoday, ka o fangcalay makoracay ko faloco' namo a mi'met to tireng no niyah.

⁵ Aka ka matiya o mafokilay to Kawas a roma a finacadan a pakonira to 'anof no tireng a miolatek a mikalona.

⁶ Caay ko hahaenen a mipararaw, a misamsam ko malcaday ato kiso a mitooray a salikaka. Mahaen ko papina'on niyam i tamowanan i 'ayaw a pasowal to nika o mamatfoc no Tapang ko matiniay a dmak a ma^min.

⁷ O pitahidang no Kawas i titaanan i, o sakakoracaw ita. Caay ko sapidmakaw ita to kaackan.

⁸ Orasaka, o mifalahay tonini a sowal i, caay ko tamdaw ko nifalahan ningra. O mifalahay cingra to pafliay tamowanan to Fangcalay 'Adingo a Kawas.

⁹ O maanho ko papatiliden ako i tamowanan to pakayniay i kasasiolaolah namo o salikaka. O nipasifana'an no Kawas kamo to sakasasiolaolahaw.

¹⁰ Mahaen ko dmak namo a maolah to i Makitoniyaay a salikaka a ma^min. Saka, salikakaaw, pa'icel kami i tamowanan, nanay matongal a matongal ko pisa'icel namo tonini.

¹¹ Do^doen ko limo'ot niyam i 'ayaw i tamowanan a masinanot ko dmak namo. Aka pikihar to no tao a dmak. Katayal to saka'orip no tireng.

¹² Onini i, o sakahmekaw no mafokilay to Kawas a tamdaw to dmak namo, ta caayto pikitado kamo to no tao.

O Piliyaw no Tapang a Tayni

¹³ Salikakaaw, nanay mafana' kamo to pakayniay i mapatayay a tamdamdaw. Ta caay ka matiya o awaay ko pafaloco'an a romaroma a tamdaw kamo a mararom.

¹⁴ Paso'lin kita to nika patay ni Yis ato nika lomowad Ningra a ma'orip nai patay. Saka, o hahaenento no Kawas a mikrid a papihaklong i ci Yisan ko mitooray ci Yisan a mapatayay a tamdaw.

¹⁵ O nano sowal no Tapang ko sapasowal niyam tamowanan. Kita o ma'oripayho tangasa i nipiliyaw no Tapang a tayni i, caay ko mamiki'ayaw to mapatayayto a tamdamdaw.

¹⁶ Nawhani ano ira ko lkal no palimo'otay ato ngiha' no kakridan no coyoh ato soni no la^pa no Kawas i, itiya a ma^pod ko Tapang nai kakarayan. Ta malasa'ayaway a lomowad ko mitooray ci Kristoan a mapatayay.

¹⁷ Do^do sa i, kita o ma'osaway a ma'orip ko mamikapot i cangraan a makakoy a tayra i to'em a malalitmoh ato Tapang i fatad no kakarayan. Saka, o mamida'oc kita a mikapot to Tapang.

¹⁸ Orasaka, kaonini a sowal ko sakasasihinom namo.