1 Tisalonika 3 - 阿美語聖經-新約附詩篇箴言

¹ Tona caayto pakahadidi kamo saka, kita a tatosa ko mamasiday i Atin saan ko kton no faloco' niyam itiya.

² Saka, ocoren niyam ko salikaka ita ci Timoti, o kapot niyam a matayalay to no Kawas a patnak to Nga'ayay Ratoh to pakayniay ci Kristoan. O sakapiocor niyam cingraan i, o sapa'icelaw niyam a patanektek to piti'er namo i Kawas.

³ Ta caay ka ngiyangi ko faloco' namo tona mapades. Mafana' kamo to nika o airaira aca ko matiniay a pades.

⁴ Yo i tiraho kami i tamowanan i, o mamapades kita saan ko nipipali'ayaw niyam a somowal i tamowanan. Mato nika fana' namo, lahci sato anini.

⁵ Mahaenay saka, caay pakahadidi kako itiya. Masamaanay ko piti'er nangra to Kawas hakini? Nanay caay ka sawi no Palafoay cangra, ta caay ka lasawad ko nitayalan niyam saan ko harateng ako. Saka, ocor han ako ci Timoti a patayra i tamowanan.

⁶ Nikawrira, anini sato minokayto ci Timoti nai tamowanan a paini to nga'ayay a ratoh i tamiyanan to pakayniay i piti'er namo to Kawas ato olah namo. Paratoh cingra to nika rarid namo a miharateng tamiyanan ato nika lcad no harateng ita to sakasaso'arawaw.

⁷ Orasaka, salikakaaw, o piti'er namo i Kawas ko sakahinom niyam i tini i nipisemsem ato nika pades niyam to masamaamaanay.

⁸ Nawhani ano tanektek ko faloco' namo a malaccay ato Tapang i, o mamapaki^mel kami a ma'orip.

⁹ Mararid kami a mikansiya i Kawas to pakayniay i tamowanan. Nawhani kamo ko sakalipahak niyam i ka'ayaw Ningra.

¹⁰ Misa'icel kami to romi'ad to dadaya a mitolon to sakanga'ayaw niyam a minengneng i tamowanan. Ta nga'ay mapa'icel niyam ko piti'er namo to Kawas.

¹¹ Nanay, makrid no Wama ita a Kawas ato Tapang ita ci Yis ko sakatayraaw niyam i tamowanan!

¹² Nanay, mapa'icel no Tapang, kamo ta matiya o nika olah niyam i tamowanan ko nika tongal no kasasiolaolah namo ato olah namo to tamdamdaw.

¹³ Nanay, mapatanektek no Tapang ko faloco' namo, ta ano miliyaw a tayni ko Tapang ita ci Yis a malahaklong ato mitooray i, makorac, masongila' kamo i ka'ayaw no Wama a Kawas ita.