1 Tisalonika 2 - 阿美語聖經-新約附詩篇箴言

O Tayal ni Pawlo i Tisalonika

¹ Salikakaaw, mafana' kamo to nika o ci^pocay ko nipiliso' niyam i tamowanan.

² Mafana' kamo to nika pades niyam i 'ayaw a mapakangodo itira i Filipi. Ano iraira ko pacoliay i tamiyanan i, mapa'icel no Kawas kami. Saka, caay paska kami a pasowal i tamowanan to Nga'ayay Ratoh no Kawas.

³ Onini a pipa'icel niyam i tamowanan i, caay ko nano moraraway ato kaackan a faloco'. Caay ko misa'fitay.

⁴ O nilifetanto no Kawas kami a mipili' a mipatorod to Nga'ayay Ratoh. Saka, do^doen niyam ko nafaloco'an no Kawas a somowal. Caay ko sapalipahakaw to tamdaw, o sapalipahakaw to mafana'ay a mihapinang to faloco' ita a Kawas ko dmak niyam.

⁵ Mafana' kamo to nika tahanini caayho ka somowal kami to misa'fitay a sowal. Caayho pipakakawakawas kami to sowal a misimed to 'anof. O Kawas ko pawacayay tonini.

⁶ Caay pilongoc kami to nipipacakat namo ato nipipacakat no tao to ngangan niyam.

⁷ Tona o tarokos ni Kristo kami saka, O mama^deng kami a o kakangodoan no tamdamdaw. Yo i tiraho kami i tamowanan i, samatiyaen niyam o pidipot no ina to wawa ko dmak niyam a damsay a midipot tamowanan.

⁸ Tona maolah kami i tamowanan saka, caay ka deng o Nga'ayay Ratoh no Kawas a ccay ko sapaini niyam i tamowanan. Halo'orip han niyam a kinafalah to saki tamowanan saan ko harateng niyam. Nawhani tadamaolah kami i tamowanan.

⁹ Salikakaaw, maharateng namo ko nika roray niyam a matayal. Yo itira kami i tamowanan a mipatnak to Nga'ayay Ratoh no Kawas i, matayal kami a milifon to romi'ad to dadaya to saka'orip niyam to saka^caaw pakaroray niyam i cimacimaan namo.

¹⁰ Kamo o paso'linay ci Kristoan ato Kawas ko pawacayay to nika korac no faloco' niyam ato nika mo^cel no dmak niyam ato nika awa no patlac niyam i ka'ayaw namo.

¹¹ Mafana' kamo to nika matiya o pidipot no mama to wawa ningra ko pidipot niyam i tamowanan o kahaccaccay.

¹² Pa'icelen, hinomen, palimo'oten niyam kamo to sakatatodongaw no dmak namo i nafaloco'an no Kawas, oya mitahidangay i tamowanan a papikapot to pikowan ato 'dil Ningra.

¹³ Yo patnak kami to sowal no Kawas i tamowanan i, mitngil kamo, paso'lin kamo. O sowal no Kawas konini, caay ko no tamdaw saan kamo. So'linay konini. O Kawas ko matayalay i tamowanan o paso'linay. Onini ko roma a sakararid niyam a mikansiya i Kawas.

¹⁴ Salikakaaw, matiya o dmak no i Yutayaay a kalokiwkay no Kawas a mitooray ci Yis Kristoan ko dmak namo. Matiya o nipipasemsem no Yutaya a tamdaw i cangraan ko nipipasemsem no finacadan namo i tamowanan.

¹⁵ Patayen nonini a Yutaya a tamdaw ko Tapang ci Yis ato pali'ayaway to sowal no Kawas. O romasato, kari'angen nangra kami. Caay ko kahmekan no Kawas cangra. Mala'ada no tamdaw a ma^min cangra.

¹⁶ Milalang cangra to nipipatnak niyam to sapa'orip a sowal no Kawas i roma a finacadan. Mahaen ko nika rarid nangra a mitaring to raraw nangra. Saka, caayto ka samadah ko kter no Kawas a pasayra i cangraan a tahada'oc.

Sapiliyawan ci Pawlo a Miliso' to Tisalonika a Kiwkay

¹⁷ Salikakaaw, pacna' kami a mapaliyas i tamowanan. Nikawrira, caay ka laliyas ko faloco' ita. O tireng a ccay ko malaliyasay. Wata: ko nika 'ilol niyam tamowanan. Sapinengnengan kami i tamowanan.

¹⁸ Orasaka, sakatayraan kami i tamowanan. Kinatosato kako a sakatayraan i tamowanan. Nikawrira, matna' ni Satan kami.

¹⁹ Ano miliyaw a tayni ko Tapang ita ci Yis i, caay ka o kamo ko kacifaloco'an ato sakalipahak ato sakasneng a tamohong niyam hakiya?

²⁰ Kamo ko sakatadamaan niyam ato sakalipahak niyam!