1 Timoti 6 - 阿美語聖經-新約附詩篇箴言

¹ O kakangodoen no koli ko tapang ningra a tamdaw, ta caay ka lokes no tao ko ngangan no Kawas ita ato sifana' ita.

² Ano o paso'linay ci Kristoan ko tapang no koli i, o salikaka ito ko tapang ako, caay ko sasaan ko koli a misakahmaw to tapang ningra. O nika lalok nangra a matayal ko nga'ay. Nawhani, o kaolahan nangra a paso'linay ci Kristoan a tamdaw ko milayapay to nano nitayalan nangra. Onini a dmak ko papasifana'en ato papa'icelen iso.

O Pacfaay a Sifana' ato So'linay a Nika Cidafong

³ Ano ira ko pasifana'ay to roma a sifana' ato caay pihaklong to so'linay a sowal no Tapang ita ci Yis Kristo ato caay ka tatodong i pitoor ita to Kawas a sifana' i,

⁴ o misatakaraway cingra, o caay ka fana' to maan aca. Ciadada cingra to nika laliyaliyang ato nika cacolicoli ningra ato tao to pakayniay i sowal. Pakayni tonini ko sakaira no 'inap ato kacacoli ato pilokes ato mahinapecay

⁵ ato caay ka citolas a kacacolicoli. O mahaenay a tamdaw i, maapato ko faloco' nangra. Caayto ka fana' cangra to so'lin. O pili^tanan ako ko pitoor ako saan ko harateng nangra.

⁶ Hai, ano caay ka 'anof ko mitooray i, tadaci^tanay ko pitoor ningra.

⁷ Awaay ko nitatoyan ita a maamaan a tayni i hkal. Caay pitatoy kita to maamaan a miliyas tonini a hkal.

⁸ Ano iraho ko kakaenen ato riko' ita i, ma^dengto kita.

⁹ Nikawrira, o sakacidafongananay a tamdaw i, masa'fit a matilo no maapaay a faloco' ato tatiihay a 'anof ningra. Onini a 'anof ko sakatfad no tamdaw a matkop.

¹⁰ O lamit no masamaamaanay a tatiihay ko nika 'anof to payso. Onini ko sakapisawad no romaroma a tamdaw a miti'er ci Kristoan, ta mapades a mararom ko faloco' nangra to masamaamaanay.

O Sapalimo'ot ci Timotian

¹¹ Nikawrira, kiso o matayalay no Kawas i, liyasen konini a dmak. Ka o mo^celay a faloco' ato miringiay to Kawas a pinangan ato miti'eray a faloco' ato olah ato kodaitay ato damsayay a faloco' ko sasa'icelen iso.

¹² Samatiyaen o malalifetay a comikay ko faloco' iso a mitoor ci Kristoan. Alaen ko sapakaolah tisowanan a mida'ocay a 'orip. Onini ko patosokan no pitahidang no Kawas i tisowanan yo mipatalahkal kiso to nipipaso'lin iso i ka'ayaw no 'alomanay a minengnengay a tamdaw.

¹³ So'linay, o mahaenay ito ko pipawacay ni Yis Kristo i ka'ayaw ni Pontius Pilatoan to nga'ayay a patalahkal. Saka, i ka'ayaw no pa'oripay to maamaan a Kawas ato ci Yisan kako a palimo'ot i tisowanan.

¹⁴ Do^doen ko limo'ot. Ka'imeren konini a makorac, ta awaay ko tatoro'en a raraw iso tangasa i katalahkalan no Tapang ita ci Yis Kristo.

¹⁵ Ano maraodto konini a nipatonekan no Kawas a romi'ad i, o papatalahkalen Ningra ci Kristo. O hahmeken, o dengan a mikowanay, o Hongti no hongtingti, o Tapang no tapatapang konini a Kawas.

¹⁶ Dengan Cingra ko caay ko mamapatay. Itira i caay ko mamaraod no tamdaw a 'dil a maro' Cingra. Awaayho ko paka'araway Cingraan. Caay ko mama'araw no tamdaw Cingra. Nanay makahmek Cingra, mida'oc ko pikowan Ningra! Amin.

¹⁷ Palimo'oten ko cidafongay to no aniniay a hkal to saka^caaw pisatakaraw nangra ato saka^caaw ka pasayra no faloco' nangra i caay ko tatadi'ecen a dafong. Ka o nipitadi'ec nangra toya palmeday, pakadofahay, palipahakay titaanan a Kawas ko nga'ay.

¹⁸ Palimo'oten cangra to sapidmakaw nangra to nga'ayay. Aka ka 'idi kamo a pafli. Kararid kamo a palada'.

¹⁹ Ano haenen nangra i, o ccay no pisoped nangra to nga'ayay a dafong a mipatala to tanetkay a paranaan, ta pakaala cangra to so'linay a 'orip.

²⁰ Timotiaw, 'imeren ko nipaconohan i tisowanan. Liyasen ko caay ka ngodo to Kawas a kasasowasowal ato pacfaay a kalaliyaliyang to pakayniay i <> hananay.

²¹ Nawhani, o mafana'ay kako to so'linay a fana', saan ko romaroma a tamdaw. 'Arawhani, pakayni tonini a fana' nangra ko sakamoraraw nangra a miliyas to so'linay a pitooran nangra. Nanay, mapaini no Kawas kamo to mikomi!