1 Timoti 4 - 阿美語聖經-新約附詩篇箴言

O Pacfaay a Singsi

¹ Nikawrira, pahapinang ko Fangcalay 'Adingo a somowal to nika i saikoikoray nonini a hkal i, o mamisawad ko tamdaw a miti'er ci Kristoan. O papasayra ko faloco' nangra i sifana' no palafoay a mitoor to misafana'ay a kawakawas.

² Mapatnak no misa'fitay ko matiniay a sifana' saka, matiyato o macedetay no fa^detay a marad ko nga'ayay a faloco' nangra.

³ Palimo'ot ko matiniay a tamdaw to saka^caaw ka ciramod no tamdaw ato saka^caaw ka komaen to romaroma a kakaenen. Nikawrira, o nisanga'an no Kawas konini a kakaenen a pafli i tamdaw. O kakansiyaen no paso'linay ato mafana'ay to so'lin, ta komaen tonini.

⁴ O nga'ayay ko nisanga'an no Kawas a ma^min. Awaay ko fafalafalahen. O kakansiyaen ko Kawas a milayap tonini.

⁵ Nawhani pakayni i sowal no Kawas ato pitolon a malamakoracay konini.

O Nga'ayay a Matayalay ni Yis Kristo

⁶ O papalahaden iso ko salo'afang iso to nano pipakifaloco' iso to papiti'eray tisowanan a sowal no Kawas ato nano pido^do iso to so'linay a sifana'. Ta ano pasifana' kiso tonini i salikaka i, malanga'ayay a matayalay ni Yis Kristo kiso.

⁷ Liyasen ko awaay ko ^poc a caay ka tatodong i pitoor to Kawas a kimad no mato'asay. Pananamen ko tireng iso to sapiringiaw iso to Kawas.

⁸ Ci^pocay to mamang ko piyatayat to tireng. Nikawrira, tadaci^poc i masamaamaanay a dmak ko nipipananam ita to faloco' to saki Kawas. Nawhani pakayni tonini a mapalmed ko i matiniay ato aira a 'orip ita.

⁹ O so'linay konini a sowal. O tadapapaso'linen konini.

¹⁰ Orasaka, maroray, misa'icel kita a matayal, nawhani o ma'oripay a Kawas ko kacifaloco'an ita. O pa'oripay Cingra to polong no tamdaw. Mangalef ko pipa'orip Ningra to paso'linay Cingraan.

¹¹ Palimo'oten, pasifana'en cangra tonini a dmak.

¹² Aka ka o kacangalan no nimanima ko nika mamangho no mihcaan iso. Ka o malopi'arawan no paso'linay ci Kristoan a tamdaw ko sowal iso ato dmak ato nika olah ato nipiti'er ato nika korac no faloco' iso.

¹³ O piasip to Fangcalay Cudad i ka'ayaw no salikaka ato pipakimad ato pipasifana' to mitooray ko sasarocoden iso tangasa i katahiraan ako.

¹⁴ Aka palasawaden koya no 'Adingoan a rocek iso, oya niparocekan i tisowanan a rocek pakayni i nipali'ayawan a sowal no Kawas yo mikapa ko ciwlo a patireng i tisowanan.

¹⁵ Sarocoden ko faloco' iso a midmak tonini ta mahapinang no 'alomanay ko nika cakat no tayal iso.

¹⁶ Pina'on to tireng iso ato pipasifana' iso. Kararid a misa'icel tonini, ta mapa'orip iso kiso ato mitngilay to sowal iso.