1 Timoti 3 - 阿美語聖經-新約附詩篇箴言

O Kakridan no Kiwkay

¹ Ano mangalay ko tamdaw a malakakridan no kiwkay i, o milongocay cingra to tadamaanay a tayal. So'linay konini a sowal.

² O mamalakakridan no kiwkay i, ka o awaay ko tatoro'en a raraw ningra, o ccayay ko fafahi, o mina'onay, o paka'metay to tireng, o masatamdaway ko dmak, o halilafangay, o mafana'ay a pasifana',

³ o caay ka hali^pah, o caay pi'odot, o damsayay, o caay ka cacoli ato tao, o caay ka 'anof to payso,

⁴ o nga'ayay ko pidipot to paro no loma', o palatamdamdaway to wawa a pasifana' a papitoor, ta mafana' ko wawa ningra a mangodo cingraan.

⁵ Nawhani ano mafokil cingra a midipot to paro no loma' ningra i, samaanen ningra ko pidipot to kiwkay no Kawas saw?

⁶ Aka ka o fa^lohayho a mitooray a tamdaw ko mamalakakridan no kiwkay. Nawhani latek misatakaraw cingra to faloco' a matiya o Palafoay a matfad i raraw a matfoc.

⁷ O romasato, ka o nga'ayay ko lihaf a tamdaw i finawlan no niyaro', ta caay ka lokes a matilo no Palafoay cingra a mapakangodo.

O Mipadangay to Tayal no Kakrikridan no Kiwkay

⁸ Ka o mahaenay ko mipadangay to tayal no kakrikridan no kiwkay. O nga'ayay ko pinangan, o so'linay ko sowal, o caay ka hali^pah, o caay ka 'anof to payso,

⁹ o tingalaway a nga'ayay a faloco', o ma'imeray to so'linay a sifana' no mitooray ci Kristoan.

¹⁰ O lalifetenho namo cangra a mihapinang, ta ano awaay ko maan a raraw nangra i, nga'ayto a patirengen cangra.

¹¹ Ka o mahaenay ko fafahi nangra a o nga'ayay ko pinangan, o caay pilikaf, o mina'onay to tireng ato so'linay ko dmak i masamaamaanay a tayal.

¹² O mamipadang to tayal no kakrikridan no kiwkay i, o ccayay ko fafahi, o nga'ayay ko pidipot to wawa ato paro no loma'.

¹³ Malasakacakat no mipadangay to tayal no kakrikridan no sa'opo no mitooray ko nika nga'ay no tayal nangra. Ta caay paska cangra a pawacay to pakayniay i piti'er nangra i ci Yis Kristoan.

O Tadapakakmoday a Dmak

¹⁴ Yo patilidho kako i, minanay ko faloco' ako a macaloh to sakatayraaw i tisowanan.

¹⁵ Nikawrira, latek manayar ko nika tayra ako i tisowanan. Saka, patiliden ako kiso i matini to sakafana'aw iso to malodadmaken ita o paro no loma' no Kawas. Onini a loma' haw i, o kiwkay no mida'ocay a ma'oripay a Kawas, o hcek ato paranaan no so'lin.

¹⁶ Kafana'anto no 'alomanay ko nika o tadamaanay ko kmod no pitooran ita. Malatamdaw Cingra a talahkal. Mapahapinang no Fangcalay 'Adingo ko nika o mo^celay Cingra. Ma'araway no coyoh Cingra. Mapatnakay Cingra i kasakitakit. Mapakaso'linay no tamdamdaw Cingra. Makakoyay Cingra a talakakarayan.