1 Timoti 2 - 阿美語聖經-新約附詩篇箴言

O Pita'ong i Kiwkay

¹ O sa'ayaway a sapa'icel ako tisowanan i, pilongoc, pitolon, pipatado a mitolon, pikansiya i Kawas to saki polong no tamdaw ato

² saki hongti ato romaroma a mikowanay. Ta masinanot, rihaday ko dmak ita a ma'orip i tini i hkal. Ta mo^cel ko dmak ita a mita'ong to Kawas.

³ O nga'ayay konini, o matatodongay i nafaloco'an no pa'oripay titaanan a Kawas.

⁴ Mangalay ko Kawas to sakafana'aw no polong no tamdaw to so'lin, ta mapa'orip Ningra cangra.

⁵ O na so'lin hananay i, deng ccay aca ko Kawas. Ccay ko pakayakayay to Kawas ato tamdaw, oya malatamdaway a Kristo ci Yis.

⁶ Kinafalah sa Cingra to tireng a malasapatfoc a patodong to saki polong no tamdaw. Pakayni tonini a mapahapinang i nipatonekan a romi'ad ko sapa'oripaw no Kawas to tamdamdaw.

⁷ Orasaka, mapatireng kako a malapasifana'ay i roma a finacadan a malapatnakay a malatarokos to saka paso'lin ato sakafana' nangra to so'lin. Caay ko misamangahay kako. O so'linay ko sowal ako!

⁸ Ano masa'opo i cowacowa ko mitooray i, nanay mitolon ko fa'inayan. Nanay o so'linay ko faloco' nangra a pakamay a mitolon. Nanay caay ka kter, caay ka cacolicoli cangra.

⁹ O romasato, kamo o fafahiyan i, nanay caay pisatadamaamaan ko nika ciriko' ato nika ^res namo. Aka pakinalien ko piporong to fokes namo. Aka pakinali a mica'dong to tada^kim ato cinco. Aka pakinali a mica'dong to matkesay a riko'.

¹⁰ Ka o nga'ayay a dmak ko saka^res no tireng namo. Onini ko matatodongay a dmak no so'linay a mitooray to Kawas a fafahiyan.

¹¹ Aka ka caciyaw kamo o fafahiyan i sa'opo. Sapo^neren ko faloco' namo a minanam.

¹² Caay pihayda kako to pipasifana' no fafahiyan ato pikowan no fafahiyan to fa'inayan. O nika tomrep nangra ko nga'ay.

¹³ Nawhani i sa'ayaw a masanga' ci Atam. I ikor a masanga' ci Ifa.

¹⁴ O romasato, caay ka ci Atam ko masafana'ay. Oya fafahiyan ko masafana'ay. Malapacoliay cingra to rikec no Kawas.

¹⁵ Nikawrira, ano mararid ko fafahiyan a miti'er to Kawas a maolah i Cingraan, ano makorac cingra a mina'on to tireng i, i tini i nika hofoc ningra to wawa a mapa'orip cingra.