1 Timoti 1 - 阿美語聖經-新約附詩篇箴言

¹ Ci Pawlo kako, nipalimo'otan no pa'oripay a Kawas ita ato kacifaloco'an ita a Kristo Yis a malatarokosay ni Kristo Yis kako.

² Patilid kako tisowanan Timoti, o so'linay a miti'eray ci Kristoan a wawa ako. Nanay, mapaini no Wama a Kawas ato Tapang ita ci Kristo Yis kiso to mikomi ato sini'ada ato rihaday!

Pina'on to Mangahay a Sifana'

³ Yo tatayra kako i Makitoniya i, mapa'icel ako kiso a somowal, <> han ako kiso kiyami. Saka, haenen ko dmak a mararid.

⁴ Papisawaden cangra a miharateng to kimad no mato'asay ato rayray no tato'asan. Nawhani caay padama ko matiniay a dmak to nafaloco'an no Kawas a papiti'er to tamdaw ci Kristoan. Deng o palowaday to sakalaliyaliyang konini.

⁵ O patosokan nonini a limo'ot i, o pipalowad to so'linay a olah, o nai tingalaway a faloco' ato makoracay a nga'ay a faloco' ato so'linay a piti'er ci Kristoan a masadak konini.

⁶ Miliyas ko romaroma a tamdaw tonini a pasayra i awaay ko ^poc a kasasowasowal.

⁷ Mangalay cangra a malapasifana'ay to Rikec no Kawas. Nikawrira, mafokil cangra to tatodong no sowal nangra ato patosokan no sowal nangra.

⁸ Mafana' kita, ano pakaynien i pinangan no Rikec ko nipipakatayal to Rikec i, o nga'ayay ko Rikec.

⁹ Nawhani caay ko sapilalang to nga'ayay ko dmak a tamdaw ko rikec. O sapilalang to pacoliay to rikec a tamdaw, o mari'angay, o caay pitoor to Kawas ato ciraraway a tamdaw, o caay ka korac ato milokesay to Kawas, o mipatayay to mama ato ina, o mipatayay to tamdaw,

¹⁰ o ma'odangay, o ma'otitay, o mirpetay a misimed to tamdaw, o misamangahay a somowal, o pacfaay a pawacay ato miliyangay to so'linay a sifana' ko sakaira no rikec.

¹¹ Mahaen ito ko sifana' no kahmekan a ci'dilay a Kawas oya mipatoroday i takowanan to Nga'ayay Ratoh.

O Pikansiya to Sini'ada no Kawas

¹² Mikansiya kako to Tapang ita ci Yis Kristoan. Nawhani o pa'icelay Cingra i takowanan. Matatodongay a nengnengen Ningra kako saka, toro'en Ningra kako a pakatayal to tayal Ningra.

¹³ Talacowa nano milokesay, o mikari'angay, o misamsamay kako i Cingraan, nikawrira, sini'ada ko Kawas takowanan. Nawhani caho pipaso'lin kako Cingraan itiya. Caay ka fana' kako to tatodong no nidmakan ako.

¹⁴ Pahapinangen no Tapang kako to tadamaanay a mikomi Ningra a papiti'er, papiolah Cingraan. Onini a olah ato piti'er ako i, o nano nika laccay ako aci Yis Kristo.

¹⁵ <> yasanay a sowal i, o so'linay, o papaso'linen konini. O satatiihay no ciraraway a tamdaw kako.

¹⁶ O sakaadayay no Kawas i takowanan i, o sapahapinangaw ni Yis Kristo i takowanan o satatiihay no ciraraway a tamdaw to masongila'ay a kodait Ningra to saki takowanan. Ta malopi'arawanto no papaso'lin a mamilayap to mida'ocay a 'orip kako.

¹⁷ Nanay caay ka citolas a mata'ong a mapahmek ko mida'ocay a Hongti oya caay ko mamapohed, caay ka 'araw a dengan a Kawas! Amin.

¹⁸ Timotiaw, mato sowal no pali'ayaway to sowal no Kawas i 'ayaw to pakayniay i tisowanan o wawa ako ko pipalimo'ot ako i tisowanan. Kaonini a sowal ko malolalosidan iso a milood.

¹⁹ Ka'imeren ko piti'er iso ci Kristoan ato tingalaway a nga'ay a faloco' iso. Mafalah no romaroma a tamdaw ko nga'ay a faloco' saka, malasawad ko pitoor nangra.

²⁰ O mahaenay ci Himinayus aci Aliksantor. O sakafana'aw nangra ta caayto pilokes cangra to Kawas saka, patoroden ako cangra ci Satanan.