1 Pitiro 2 - 阿美語聖經-新約附詩篇箴言

O Ma'oripay a Fokloh ato Fangcalay a Kitakit

¹ Orasaka, falahen ko tatiihay a dmak a ma^min. Aka pisafana' a somowal. Aka pisamangah. Aka ka 'inap. Aka pitongangan.

² Kamatiya o nihofocanho a wawa kamo a halamham a sapicocoan to caay ka cicamol a saki no 'adingoan a hacol. Ta pakayni i nika komaen namo tonini ko sakalomahad namo a mapa'orip no Kawas.

³ Nawhani mato sowal a matilid i Fangcalay Cudad, <> saan.

⁴ Saka, katayni i ka'ayaw no Tapang. Nawhani o ma'oripay a fokloh Cingra. Talacowa mafalah no tamdaw Cingra, nikawrira, o nipili'an no Kawas a tadamaanay a fokloh Cingra.

⁵ Kamo ko roma a matiya o ma'oripay a fokloh. Ka o malosapatireng kamo to no 'adingoan a pita'ongan. Ta malafangcalay a citodongay to ta'ong kamo a matayal itira. Ta pakaynien namo i ci Yis Kristoan ko nipipacakat namo to kaolahan no Kawas a caay ka 'araw a sapacakat.

⁶ Nawhani o sowal a matilid i Fangcalay Cudad i, <> saan.

⁷ Orasaka, o kakalimlaan namo o mitadi'ecay a tamdaw konini a fokloh. Nikawrira, o sowal a matilid i Fangcalay Cudad to pakayniay i caay paso'lin a tamdaw i, <> saan.

⁸ O roma a sowal a matilid i Fangcalay Cudad i, <> saan. O sakatahastol nangra i, o nika^caan pipaso'lin nangra to sowal no Kawas. O nano nafaloco'an no Kawas ko saka^ca pipaso'lin nangra.

⁹ Nikawrira, o nipili'an a finacadan kamo. O no Hongtian a citodongay to ta'ong, o fangcalay a kitakit, o no Kawas a finawlan kamo. O mitahidangay Cingra i tamowanan a paliyas nai to'manay a patayra i ta^ngaday itira i kafahka'an a dmak Ningra. Ta pakayni i tamowanan a mapatnak ko tadamaanay a dmak no Kawas.

¹⁰ Nano caayay ko finawlan no Kawas kamo i 'ayaw. Anini sa i, o finawlanto no Kawas kamo. Nano mafokilay kamo to sini'ada no Kawas i 'ayaw. Anini sa i, o mafana'ayto kamo to sini'ada no Kawas.

O Koli no Kawas

¹¹ Kaolahan ako a salikaka, pa'icelen ako kamo. O palafangay, o pacarcaray ko 'orip namo i tini i hkal. Saka, aka tooren ko mirorayay to salo'afang namo a 'anof no tireng.

¹² Sanga'ayen ko dmak namo i roma a finacadan. Ta ano pakotatiitiihay cangra tamowanan i, pakayni i nipipaka'araw nangra to nga'ayay a dmak namo ko sapahmek nangra to Kawas i piliyawan Ningra a tayni.

¹³ Tona o mitooray kamo to Tapang saka, haklongen ko nipatirengan no tamdaw a mikomoday. Oya sakakaayto a mikomoday a hongti,

¹⁴ ato niocoranto ningra a tapatapang to mamitfoc to tatiihay a tamdaw ato mamipakaolah to nga'ayay a tamdaw.

¹⁵ Nawhani o nafaloco'an no Kawas i, o nipipakatomrep namo to maapaay a sowal no mafolafolaay a tamdaw pakayni i nga'ayay a dmak namo.

¹⁶ O mapakoniraayto a tamdaw kamo, nikawrira, aka ka pakonira sa a mitahpo to masamaamaanay a raraw, ka o malakoliay no Kawas kamo.

¹⁷ Kangodoen ko tamdaw a ma^min. Kaolahen ko salikaka. Ta'ongen ko Kawas. Kangodoen ko hongti.

Malopi'arawan ita ko Pisemsem ni Kristo

¹⁸ Kamo o malakoliay a tamdaw, ka o nai faloco'ay namo ko nika ngodo namo to tapang a tamdaw a mihaklong. Aka ka o nga'ayay, damsayay a tapang a ccay ko kangodoen. Ano o mari'angayto a tapang namo i, haenento ko nipihaklong namo.

¹⁹ Ano mihadidi kamo to caay ko nano ka cirarawan namo a pades a mido^do to nafaloco'an no Kawas i, o papalmeden no Kawas kamo.

²⁰ Ano nika cirarawan namo ko sakapihadidi namo a masti' i, o maan ko katadamaanan namo saw? Nikawrira, ano pakayniay i nika nga'ay no dmak namo ko sakapihadidi namo to pades i, o papalmeden no Kawas kamo.

²¹ Onini ko sakapitahidang no Kawas tamowanan. Nawhani mahaenayto ci Kristo a misemsem to saki tamowanan. Malopi'arawan namo ko dmak Ningra. Saka, o dado^doen namo ko dmak Ningra.

²² Awaay ko raraw ni Kristo. Awaayho a matngil no tamdaw ko misamangahay a sowal Ningra.

²³ Yo lokesen no tao Cingra i, caay pico'ay Cingra a milokes. Yo mapasemsem Cingra i, caay patalaw Cingra. Deng o patorod i mo^celay a misawkitay.

²⁴ Cingra ko mi'orongay to raraw ita a mapacek i ciwcika. Orasaka, manga'ayto kita a miliyas to no ciraraway a dmak a pasayra i mo^celay a dmak a ma'orip. Maadahayto kamo to nano nika doka' Ningra.

²⁵ Matiya o moraraway a siri kamo. Nikawrira, mapanokayto kamo anini i Midipotay ato Misimaway to salo'afang namo.