1 Korinto 9 - 阿美語聖經-新約附詩篇箴言

O Sakowan ato Sikining no Tarokos

¹ Caay ko mapakoniraay kako saw? Caay ko tarokos kako saw? Caay ko nano paka'araway kako to Tapang ita ci Yisan saw? Caay ka o kamo ko hci no tayal ako to no Tapang saw?

² Caay ko tarokos cingra, ano saasaan ko tao i takowanan i, o tarokos cingra saan kamo i takowanan. Nawhani, o nika laccay namo ato Tapang ko kacipinangan to nika o tarokos kako.

³ Yo milikaf ko tao i takowanan i, pa'ading kako to tireng ako.

⁴ Tona o mipatnakay to Nga'ayay Ratoh kako saka, caay ka citodong a paflien no salikaka kako to kakaenen hakiya?

⁵ Caay ka nga'ay a citodong kako a matiya o romaroma a tarokos ato salikaka no Tapang aci Pitiro a malahaklong ato fafahi a mirakat to niyaro' hakiya?

⁶ Kako aci Parnapas a ccay ko ci todongay a mamaroray a matayal to saka'orip niyam hakiya?

⁷ O malasofitayay a tamdaw i, o no tirengto a dafong ko saka'orip a malasofitay saw? Caay. O mipalomaay to fadisoso' a tamdaw i, iraay ko caayay ka komaen to hci no nipalomaan ningra saw? Awaay. O pakaenay to masaflaway a siri i, iraay ko caay ka komaen to hacol no siri ningra saw? Awaay.

⁸ Talacowa sahto o ma'araway no tamdaw a dmak ko nisowalan ako a patinako, nikawrira halorikec a mahaen ko sowal.

⁹ O sowal i Rikec ni Mosi i, <> saan. Deng oya kolong a ccay ko kasida'itan no Kawas hakiya?

¹⁰ Caay ka o kita ko nisowalan Ningra hakiya? Hai. Kita ko nisowalan nonini a tilid. Nawhani o patosokan no mikangkangay ato mipanayay a tamdaw a matayal i, o sapilayapaw to malonangra a kinaira.

¹¹ O mipalomaay kami i tamowanan to saki nosalo'afang a sapaloma. O pakinaliay ko nipiala niyam i tamowanan to saka'orip niyam saw?

¹² Ano manga'ay ko tao a citodong a miala to 'isal i tamowanan i, mangalef ko nika nga'ay niyam a miala to todong no 'isal i tamowanan. Nikawrira, caay paci^ci kami tonini a saka ci todong. Hadidi sa kami to masamaamaanay a dmak. Onini i, o saka^caaw ka tna' no Nga'ayay Ratoh to pakayniay ci Kristoan.

¹³ Mafana' kamo, o matayalay a tamdaw i Fangcalay Pita'ongan i, o kakomaen to no i tiraay a kakaenen. O matayalay a tamdaw i pipato'ayaan a misalisin i, o mami'isal to nipato'ayaan no tao.

¹⁴ Mahaen ko pipalimo'ot no Tapang. O patnakay to Nga'ayay Ratoh a tamdaw i, o nano tayal ningra a patnak to Nga'ayay Ratoh ko sakaira no saka'orip nangra saan.

¹⁵ O sakasaan ako a mitilid tonini i, nanay haenen kako, caay ko nika saan ako. Caay pilongoc kako to pipafli no salikaka to saka'orip ako. Ano milongoc kako i, o nika patay ako ko nga'ay. O kalata'angan ako ko nika ^ca pilongoc ako. Saka, caay ko papalasawaden no nima konini.

¹⁶ Caay ko sapasneng ko nipipatnak ako to Nga'ayay Ratoh. O tatayatayalen aca ako konini. Ano caay pipatnak kako to Nga'ayay Ratoh i, o cacilafo kako.

¹⁷ Ano o no mako a faloco' ko sakatayal ako tonini i, kona cilifon kako. Nikawrira, o tatayatayalen aca ako konini. Nawhani o nipatorodan no Kawas kako tonini a sikining.

¹⁸ Ano hatira i, o maan ko lifon ako hakiya? Yo patnak kako to Nga'ayay Ratoh i, caay pilongoc kako to pipafli no salikaka to saka'orip ako. Caay pakaroray kako i cangraan. Onini ko todong no lifon ako a patnak to Nga'ayay Ratoh.

¹⁹ O mapakoniraay a tamdaw kako, caay ka lakoli no nimanima kako. Nikawrira, to sapisolotaw ako to 'alomanay a tamdaw saka, palakolien ako ko tireng ako a matayal to saki polong no tamdaw.

²⁰ I tini i Yutaya a tamdaw i, samatiyaen ako o Yutaya a tamdaw ko nika 'orip ako to sapisolotaw to faloco' no Yutaya a tamdaw. Talacowa caay ka kowan no Rikec ni Mosi kako nikawrira, i tini i makowanay no rikec i, samatiyaen ako o makowanay no rikec ko nika 'orip ako to sapisolotaw to faloco' no makowanay no rikec a tamdaw.

²¹ Malcaday ito, yo mikapot to masapapotalay no rikec a tamdaw i, milcad kako to masapapotalay no rikec a tamdaw a caay ka fo'ot no Rikec no Yutaya, to sapisolotaw to masapapotalay no rikec a tamdaw. Nikawrira, caay ko nika ^ca ka pihaklong ako to rikec no Kawas, ano so'linen i, o mafo'otay no rikec ni Kristo kako.

²² I tadancaayho ko piti'er a tamdaw i, samatiyaen ako o nangra ko nika 'orip ako to sapisolotaw to faloco' nangra o tadancaayho ko piti'er a tamdaw. I tini i masamaamaanay ko 'orip a tamdaw i, samatiyaen ako o nangra ko nika 'orip ako to sapipa'oripaw to papinapina nangra.

²³ O sakatnak no Nga'ayay Ratoh ko polong no dmak ako. Ta pakayni i Nga'ayay Ratoh a mikihatiya a pakalayap ko tamdamdaw to sakalmed.

²⁴ Caay ka fana' kamo saw? O comikayay i kalalifetan i, ano comikamikay a ma^min, deng ccay aca ko mamapakaolah a tamdaw. Haenen ko namo a comikay to sapilayapaw to sapakaolah.

²⁵ O mamilifet a tamdaw a ma^min i, ma'imer to tireng i masamaamaanay a dmak to sapilayapaw nangra to mamalasawad a tadamaanay a tamohong. Nikawrira, o hahaenen ita ko dmak to sapilayapaw to caay ko mamalasawad a tadamaanay a tamohong.

²⁶ Orasaka, caay ka matiya o awaay ko patosokan ko kacomikay ako. Caay ka matiya o misti'ay to fali ko piskong ako.

²⁷ Sti'en ako ko tireng ako a papitoor. Onini i, o saka^caaw ka falah ako tona o patnakay kako to Nga'ayay Ratoh i taowanan.