1 Korinto 6 - 阿美語聖經-新約附詩篇箴言

O Kacacoli no Salikaka ato Salikaka

¹ Ano ira i tamowanan ko cifangafangay a mitooray a macacoli to mitoorayto i, nawiro, paci^ci sa cangra a papisawkit i caayho paso'lin to Tapang a misawkitay a tamdaw a caay patayra i mitooray a papisawkit saw?

² Caay ka fana' kamo saw to nika o mamisawkit to hkal ko mitooray? O mamisawkit kamo to tamdamdaw i, nawiro caay pakasawkit kamo to mimingay a fangafang saw?

³ Caay ka fana' kamo saw to nika o mamasawkit ita ko coyoh? Orasaka, mangalef ko nika ma^deng kita a misawkit to kalofangafang no tamdaw.

⁴ 'Arawhani, ira ko hatiniay a dmak i, nawiro papisawkiten namo ko ka'osian no kiwkay a tamdaw saw?

⁵ O sakasaan ako a somowal tonini i, o sapakangodoaw i tamowanan. Tadaawa sato a mimaan ko ccaccay aca namo to citanengay a tamdaw to mama^deng a misanga' to kacacoli no salikaka

⁶ iro masasipakokot ko salikaka a tayra i caayho paso'lin to Tapang a tamdaw a papisawkit.

⁷ Ora kasasipakokot namo ko kacipinangan to nika tfad namo. Nawiro hadidi caay ka saan kamo to nipisatatiih no tao i tamowanan saw? Nawiro kinasipon caay ka saan kamo saw?

⁸ 'Arawhani, kamo kora tatiihay ko dmak a misafana'. O salikakato ko nihaenan namo.

⁹ Caay ka fana' kamo saw to nika caay ko mamalafinawlan no Kitakit no Kawas ko tatiihay a tamdaw? Aka ka safana' kamo. O ma'amlasay a tamdaw, o mita'ongay to samiyay, o ma'odangay a tamdaw, o masasikalonaay a fa'inayan, o ma'otitay,

¹⁰ o mitakaway, o ma'anofay, o malasangay no ^pah, o milokesay ato milihiway a tamdaw a ma^min i, caay ko mamalafinawlan no Kitakit no Kawas.

¹¹ Hatiraay ko romaroma namo i ti:yaho. Nikawrira, pakayni i ngangan no Tapang ci Yis Kristo ato 'Adingo no Kawas ita ko sakasawsaw no raraw namo ato sakafangcal namo a mapacakat i Kawas ato sakanga'ay namo a malayap no Kawas.

O Tireng Namo ko Sapahmek to Kawas

¹² O sowal no roma a tamdaw i, <> saan. Hai, nikawrira, caay ka ^min a malasakaci^poc iso ko dmak. Ano kakoto i, manga'ay kako a midmak to maamaan a dmak. Nikawrira, caay ko mamalakoli no maan aca a dmak kako.

¹³ O sowal no roma a tamdaw i, <> saan. Hai, nikawrira, o papalasawaden no Kawas konini a tosa. Caay ko sapi'odang ko tireng ita. O mamatayal to no Tapang ko tireng ita. O pa'ayaway to tireng ita ko Tapang.

¹⁴ O mipalowaday ko Kawas a pa'orip to Tapang nai patay. Malcad tonini ko 'icel Ningra a palowad titaanan a pa'orip nai patay.

¹⁵ Caay ka fana' kamo saw to nika o ccay no tireng ni Kristo ko tireng namo? Manga'ay a alaen ako ko ccay no tireng ni Kristo a patongod i tireng no tasalamaan a fafahiyan saw? Caay ka nga'ay!

¹⁶ Caay ka fana' kamo saw, o midi'iay to tasalamaan a fafahiyan i, o malaccayayto ko tireng nangra? Nawhani mato sowal a matilid i Fangcalay Cudad, <> saan.

¹⁷ Nikawrira, ano misiket ko tamdaw i Tapang i, o malaccayayto ko 'adingo nangra.

¹⁸ Liyasen ko ma'odangay a dmak. O kaciraraw no tamdaw to masamaamaanay i, caay ko tatirengan ningra ko makari'angay ningra. Nikawrira, o ma'odangay a tamdaw i, o miri'angay cingra to tireng ningra a pararaw.

¹⁹ Caay ka fana' kamo saw to nika o loma' no Fangcalay 'Adingo ko tireng namo? O nipaflian no Kawas tamowanan a Fangcalay 'Adingo ko maro'ay i tamowanan. Saka, caayto ko no namo ko tireng namo. O no Kawasto ko tireng namo.

²⁰ O ni'acaanto no Kawas kamo. Orasaka, ka o tireng namo ko sapahmek to Kawas.