1 Korinto 4 - 阿美語聖經-新約附詩篇箴言

O Tarokos ni Kristo

¹ O mipadangay to tayal ni Kristo a koli, ato citodongay a mitadtad to pakakmoday a dmak no Kawas a matayalay han ko pinengneng i tamiyanan.

² Saka, o nisa^lian no Tapang i matayalay i, o nika so'lin no faloco' ningra a matayal.

³ Nikawrira, o pipastek namo ato no tamdawan a pinengneng namo i takowanan i, caay pikihar kako. Halo ako a caay pipastek to tireng ako.

⁴ Talacowa makoracay ko faloco' ako saan kako, nikawrira, caay konini ko wacay to nika awa no raraw ako. Dengan o Tapang ko mamisawkit i takowanan.

⁵ Orasaka, ano caho ka raod ko romi'ad, aka piki'ayaw kamo a mipastek i cimacimaan. Ka o nipitala a ccay to sakatayni no Tapang. O papatalahkalen Ningra ko nisimedan a dmak. Halo i laloma'ay no faloco' no tamdaw a harateng a mapatalahkal Ningra itiya. O dmak no kahaccaccay ko pi'arawan no Kawas a mahmek toya tamdaw.

⁶ Salikakaaw, kako aci Apolos ko nisowalan ako a patinako tonini i tamowanan. Nga'ay mafana' kamo to tatodong no a 'imeren a sowal no Fangcalay Cudad. Ta caay ka lata'ang kamo to ccay a tamdaw, caay pi^pec kamo to roma a tamdaw.

⁷ Cima ko <> sanay tisowanan saw? Caay ko nano nipaflian no Kawas koya iraay i tisowanan a ma^min saw? Ano hatira i, nawiro malata'ang kiso saw a mipalanotireng to nano Kawas a nipaflian?

⁸ Marnecto kamo. Malacidafongayto kamo. Saka, wanik han namo kami a malahongti. O longoc ako i, o nika so'lin namo a malahongti ko nga'ay ta manga'ay kami a mikapot i tamowanan a malahongti.

⁹ O harateng ako i, matiya o sapa'araw no Kawas i polong no tamdamdaw ato coyoh kami o tarokos a malasasafaay a tamdaw a mapastek i patay a makrid a mapatayra i pipatayan.

¹⁰ Malamaapaay a nengnengen no tao kami tona mitoor ci Kristoan. Nikawrira, kamo sa i, o citanengay kami tona malaccay kami aci Kristo saan kamo. O tadancaay a nengnengen no tao kami. O ci'icelay kamo. Mapakangodo kami. Malatadamaanay kamo.

¹¹ Tahamatini kami a macahiw, maso'aw, makamiday ko riko' niyam. Mararid a masti' no tao kami. Awa ko pinang to kamaro'an niyam.

¹² Kami ko marorayay a matayal to saka'orip niyam. Yo 'kaken no tao kami i, pakalmeden niyam cangra. Yo kari'angen no tao kami i, hadidi sa kami.

¹³ Yo lokesen no tao kami i, o nga'ayay a sowal ko sapacawi niyam. Tahamatini a matiya o lakaw, matiya o lakad kami a nengnengen no aniniay a tamdamdaw.

¹⁴ O sakamatini no pipatilid ako i, caay ko sapakangodoaw i tamowanan. O sapalimo'otaw ako i tamowanan tona o kaolahan ako a wawa kamo.

¹⁵ Ano iraira ko ccay a 'ofad no mitooray ci Kristoan a midipotay i tamowanan i, kako a ccay ko mama namo. Nawhani pakayni i nipipatnak ako to Nga'ayay Ratoh ato nika laccay namo aci Kristo Yis ko saka malamama namo kako.

¹⁶ Orasaka, pa'icel kako i tamowanan. Nanay malamitodongay kamo i takowanan.

¹⁷ Orasaka, ocoren ako ci Timoti a patayra i tamowanan. O mitooray to Tapang a so'linay ko faloco' a kaolahan ako a wawa cingra. Cingra ko mamipalal to faloco' namo to nika masamaan ko dmak ako a mitoor i ci Kristo Yisan ato pipasifana' ako tonini to i cowacowaay a kiwkay.

¹⁸ Caayto ko tatayni i titaanan ci Pawlo, ira ko sanay namo a misatakaraway ko faloco' a tamdaw.

¹⁹ Nikawrira, ano o nafaloco'an no Tapang i, o raranikay kako a tayra i tamowanan ta hapinangen ako ko faloco' noya misatakaraway a tamdaw to nika hakowa ko 'icel nangra. Caay ko sowal nangra ko pi'arawan ako tonini.

²⁰ Nawhani caay pakaynien no Kawas i sowal ko pikowan, pakaynien Ningra i 'icel ko pikowan.

²¹ O maan ko kangalayan namo saw? O pitatoy ako to sasti' a tayra i tamowanan ko nga'ay hakiya? Ano ^ca i, o olah ato damsayay a faloco' ako ko nga'ay hakiya?