1 Korinto 16 - 阿美語聖經-新約附詩篇箴言

O Sapadahof to Mitooray

¹ O licay namo to pakayniay i nipipadahof to mitooray itira i Yutaya a pala i, haenen ako o nipipalimo'ot to i Kalatiyaay a kasakiwkay ko nipipalimo'ot ako i tamowanan.

² O sasopeden namo i sa'ayaway a romi'ad no pilipalipay ko sapadahof to salikaka. O kinaira no kahaccaccay namo ko pi'arawan no paytmek namo a misoped. Ta ano tayrato kako i, caay ka talingafoh kamo a mipasadak.

³ Ano tayra kako i tamowanan i, papihawikiden ako to sapatilid ko nipili'an namo a tamdaw to a ocoren a papipatayra i Yirusalim toya sapadahof namo a payso.

⁴ Ano o tatayra kako i, o nika lahaklong niyam ko nga'ay a tayra.

O Pisahalaka ni Pawlo to Rarakaten Ningra

⁵ O papakayra kako i Makitoniya. Mahrek kako a miliso' itira i, o tatayra kako i tamowanan.

⁶ Latek milafin kako i tamowanan. Ano masamaan i, tangasa kako i pahrekan no kasi^nawan ko nika itira ako. Ta ano talacowato kako i, manga'ay kamo a mipadang to sakalomowad ako.

⁷ Caay ka ngalay kako ano deng o nika lalitmoh aca ita a masaso'araw. Ano matatodong i nafaloco'an no Tapang i, itira saho kako a maro' i tamowanan saan ko longoc no faloco' ako.

⁸ Nikawrira, o a itini kako i Ifiso tangasa i pisalisinan to saka lima a polo' a romi'ad.

⁹ Nawhani, 'aloman ko mipacoliay takowanan, i tini tata'ang ko kafohat no fawahan, adihayayho ko ci^pocay a tatayalen.

¹⁰ Ano tayra ci Timoti i tamowanan i, songila'en ko pidipot i cingraan to sakanga'ay no harateng ningra. Nawhani o malcaday kami a matayal to no Tapang.

¹¹ Orasaka, aka pi^pec ko cima namo i cingraan. Sanga'ayen ko pipatono i cingraan. Ta manga'ay ko rakat ningra a tayni i takowanan. Nawhani mitala kako to nika lahaklong ningra ato salikaka a tayni.

¹² O pakayniay i ci Apolosan a salikaka i, kinapi:nato kako a pa'icel i cingraan to sakalahaklongaw ningra ato salikaka a tayra a miliso' i tamowanan. Nikawrira, o harateng ningra i, caayho ka tatodong ko nika tayra ako anini saan. Saka, mitala cingra to kanga'ayan ta tayra cingra.

O Sapaikor a Sowal

¹³ Kapalal ko faloco' namo. Satanekteken ko piti'er namo to Tapang. Saki^melen, kacicdi.

¹⁴ Ka o ciolahay ko faloco' namo i tini i nika tayal namo to masamaamaanay a dmak.

¹⁵ Salikakaaw, mafana' kamo to nika o sa'ayaway no i Akayaay a mitoor to Tapang ko paro no loma' ni Stifanas. O malalokay a matayal to saki mitooray cangra.

¹⁶ Orasaka, mipa'icel kako to sapitooraw namo to matiniay a tamdaw ato mikapotay cangraan a marorayay a matayal to no Tapang.

¹⁷ Lipahak kako to nika tayni na Stifanas aci Fortunatus aci Akaykus. Nawhani cangra ko patodongay to nika awa namo i tini.

¹⁸ Mapalipahak nangra ko faloco' ako a matiya o pipalipahak nangra to faloco' namo. O kakangodoen ko tayal no matiniay a tamdaw.

¹⁹ Nga'ayho saan i tamowanan ko i Aciyaay a kalokiwkay. Tona o mitooray to Tapang ca Akuila aci Priskila ato i loma'ay nangra a kiwkay saka, nga'ayho saan cangra a lipahak a palicay i tamowanan.

²⁰ Nga'ayho saan i tamowanan ko polong no salikaka. Ka o fangcalay a kacacocop ko sakalalitmoh namo a malalicalicay.

²¹ O mitiliday tonini a salicay i, kako ci Pawlo. <>

²² Ano ira ko caayay ka olah to Tapang a tamdaw i, o mama'kak cingra. Tapangaw, nanay tayni Kiso!

²³ Nanay, mapaini no Tapang a Yis kamo to mikomi!

²⁴ I laloma'ay ni Yis Kristo, tadatalolong ko olah ako i tamowanan a ma^min!