Tito 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Ñeñth ateth poktetsa allowenakop ñeñthey ameꞌñetsa

¹ Ñamha oꞌch peyerpacha acheñeneshaꞌ añ pokteꞌ oꞌch ameꞌñeñet ñeñth nenet nanak amhchaꞌtareth, ñamha allowen poꞌpsheññexhno ñeñth amhchaꞌtarethetyetsapaꞌ añ poktetsa oꞌch ameꞌñeñet. Ñamha añepaꞌchña poksheñeshaꞌ xhokma thorraꞌyenet erraꞌtsentheꞌ kowen enten acheñeneshaꞌ.

² Ñamha oꞌch peyerpatanet amach alloꞌna sasareꞌtneñeto amaꞌt poesheñarra, ñamha eꞌñepaꞌchña kowen entannenet, ñamha eꞌñepaꞌch akopha es penet poꞌpsheññekop ñamha eꞌñepaꞌch kowen amoerañtenet allowenakop.

³ Ñeñthpaꞌ eꞌñe pokteꞌ atethchaꞌ phannenet tharroꞌmar yapaꞌxhoꞌña yeñoteñ awathpaꞌ aña yephatseꞌtyeseꞌth ñeñth ama pokteyaye. Yapaꞌxhoꞌña atthach ama es yepxheꞌthe allempo nanak yephatseꞌtyeseꞌth sosyaꞌtsañ. Ñamha nanak yathpareꞌteꞌth awath, ñamha aña yexhatyesyeteꞌth ñeñth ama poꞌñoxhoyaye kothaphñats. Yechetspaꞌ aña nanak moenatseꞌtatyeꞌth ñeñth ama kowenayaye ñamha allempopaꞌ aña nanak yoksheꞌth paꞌnamen sosyaꞌtsañexhno. Ñamha allempopaꞌ nanak atsrreꞌmoxhen yentannaꞌtyeseꞌth ñamha nanak es yeyeꞌchapretannaꞌtyeseꞌth. Ñamha allempopaꞌ ñerraꞌm eseshaꞌ yeꞌmoñeꞌteꞌpaꞌ yapaꞌxhoꞌña oꞌchxhoꞌ yeꞌmoñeꞌchxhoꞌ yamha.

⁴ Tharraña allempoña Yomporpaꞌ eñotatey eꞌñe ña poemoereñothpaꞌ moeneñ oꞌch yenpaꞌy, eꞌñe allempokma yapaꞌ atthothña aꞌkeshphaterrey, ñeñthoꞌmarña Yomporpaꞌ ñeñth Yaꞌkeshphatañer yepen.

⁵ Ñeñthpaꞌ ama añotheyaye attho eꞌñe kowen es yephaꞌyen, añña eꞌñe poemoereñotheya ñapaꞌ aꞌkeshphaterrey. Atthoña eꞌshowerrnayña yoꞌchñar atthochña ellopaꞌ oꞌch yokthapeꞌcherr eꞌñe kowen etserra ñokop, ñamha Poekamkëñothpaꞌ oꞌ eꞌñe etserrataterrnay yokthaphña.

⁶ Ñeñthoꞌmarña Poechemer Jesucristopaꞌ atthoña aꞌpoktatwonay yokop atthoch Pomporpaꞌ chorraterrya Poekamkëñ eꞌñe poktakma. Jesucristopaꞌ ñeñthña Yaꞌkeshphatañer yepen.

⁷ Ñeñthoꞌmarña theꞌpaꞌ yeñoteñ eꞌñe poemoereñothey Yomporpaꞌ oꞌ pokteꞌ entwerrey alloweney, ñeñthoꞌmarña theꞌpaꞌ eꞌñe yeyemteñoth xhokma yekwameꞌten ñeñth oꞌpatatenya, ñeñthpaꞌ atthochña yapaꞌ korretsayach yoksheñeshokmañen thayotheñ eꞌñe errponañowen.

⁸ Ñeñth ateth notenpaꞌ eꞌñe poꞌñoxh. Ñeñthoꞌmarña napaꞌ atarr nemneñ oꞌch phokthapeꞌchatanet eꞌñe womenko ateth, allochñapaꞌ ñeñth ameꞌñenaya Yomporpaꞌ eꞌñech aña maꞌyoxhrenet oꞌch penet ñeñth kowen enten ña. Ñeñth oꞌ notwapaꞌ ñeñthña kowentetsa ñamha ñeñthña nanak sherbets allowenakop.

⁹ Ñamha oꞌch notaph, amach phaꞌna anapareꞌtatstaweto ñerraꞌm esempo anapareꞌtannaꞌtyena acheñeneshaꞌ eꞌñe ñet pokthaphñoꞌmaret. Ñamha amach phaꞌna anapareꞌtatstaweto ñerraꞌm esempo anapareꞌtannaꞌtyenet ateth phaꞌyeseteꞌth paꞌtañneshañet. Ñamha amach phaꞌna otnareꞌtatstaweto ñerraꞌm esempo poeserrparñothetpaꞌ es otnareꞌtannaꞌtyenet. Ñamha amach phaꞌna anapareꞌtatstaweto ñerraꞌm esempo anapareꞌtannaꞌtyenet eꞌñe Moisés poꞌñoñoꞌmar. Tharroꞌmar attho yanapareꞌtannenapaꞌ ñeñthpaꞌ ama es sherbeno, ñamha ñeñthpaꞌ eꞌñe orrena.

¹⁰ Ñamha ñerraꞌm eseshaꞌ ñeñth moenets oꞌch attha eꞌmoñeꞌtatyesan acheñeneshaꞌpaꞌ ñeñthpaꞌ atethchaꞌ pepeꞌ, oꞌch peñotach atethpaꞌ ama aphapawo. Ñerraꞌm ama wenano ñeñth ateth penapaꞌ ñatoꞌ oꞌch alla photererr poꞌpocheño. Ñerraꞌm allempoña ama wenererropaꞌ añ pokteꞌ oꞌch saꞌypoꞌñeꞌ.

¹¹ Tharroꞌmar ñeñth ateth acheñpaꞌ yeñoteñ ñeñthpaꞌ poꞌchñarothchaꞌ nanak es panten. Amaꞌt ñapaꞌ eñoteñeñ ñeñth ateth pena ñeñthpaꞌ ochñaꞌteñets.

¹² Ñewa, oꞌch noterrperr poꞌpoñ. Ñerraꞌm esempoch xhap pesho masheñ Artemas amapaꞌ masheñ Tíquico ñeñthchaꞌ nemña peshopaꞌ ñerraꞌm errothenothpaꞌ xhokmatheꞌ phon, oꞌch pexhap Nicópoliso, tharroꞌmar napaꞌ nokthapeꞌcheñ ñatoꞌ allchaꞌ necharaꞌperra.

¹³ Ñamha xhokmach peyenpoeꞌ masheñ Zenas ñamha masheñ Apolos atthoch ñetpaꞌ xhapoet all sechenet, ñamha atthoch amach es pallteto. Zenaspaꞌ ñeñth nanak etsoteneꞌ ñoñets ñeñth ateth anareth.

¹⁴ Allochñapaꞌ ñeñth parro yameꞌñena allpaꞌ añ pokteꞌ oꞌch phaꞌyenet ñamet ñeñth ateth kowenteyetsa, ñamha atthoch ñetpaꞌ yenpoeñet ñamha ñeñth nanak es palltetsa. Allochñapaꞌ ñetpaꞌxhoꞌña oꞌch sherbeñet pamoꞌts.

Arrpaꞌ all womhchaꞌtyesnerranet poꞌcartoth

¹⁵ Allowenet ñeñth parroꞌtsenenpaꞌ moeneñet oꞌch womhchaꞌtapet ñamet añ necartoth. Ñamha oꞌch pewomhchaꞌch allowen ñeñth pameꞌñeñothetpaꞌ xhokma morrentenyet. Yomporepaꞌchña saꞌnataya allowenes. Theꞌpaꞌ ñeñthach notaph, ñeñthpaꞌ atthetepaꞌch Nompore. Allowa. Pablo