Tito 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Ñeñth eꞌñe paxharr kothaphñats Yomporekop

¹ Tharraña phokoppaꞌ añña poktetsa oꞌch peyxhateñ acheñeneshaꞌ ñeñth eꞌñe paxharr kothaphñats Yomporekop.

² Ñamha ñeñth poꞌnmeneshaxhno yakmapaꞌ oꞌch peyxhatanet ateth: Amach orrareꞌtatsteto atthoch xhokma kothapeꞌchenet eꞌñe kowen, allochñapaꞌ pamoꞌtseshaꞌpaꞌ amhchaꞌnaꞌtpoꞌch enteñ, ñamha atthoch nanak eñotenet ñeñthchaꞌ ateth phaꞌyeset ñeñth kowentetsa Yomporekop. Ñamha oꞌch photanet eꞌñe kowenakma, ameꞌñetepaꞌ ñeñth eꞌñe paxharr kothaphñats Yomporekop, ñamha morrentannaꞌtetepaꞌ ñamha awantaꞌwetepaꞌch allowen topateñets.

³ Atthekmach peyxhach ñamha poꞌnmeneshaxhno koyaneshaꞌ ñetpaꞌ añepaꞌch orrtatyenet ñeñth eꞌñe pokteꞌ enten Parets ñamha amaꞌt allowen acheñeneshaꞌ. Amachña xhaña atomañethteneto, ñamha ñetpaꞌxhoꞌña amach orrareꞌtatsteto. Añña pokteꞌ oꞌch yexhachet pakmaneshaꞌ ñeñth kowen enten Yompor.

⁴ Ñetpaꞌ yexhachetepaꞌ pakmaneshaxhno ñeñth shopshareꞌ ñeñth oꞌ someꞌtwa allochñapaꞌ atthoch eꞌñe kowen moeryet poerrollaret, ñamha atthoch eꞌñe kowen moeryet poechoyoreshet,

⁵ ñamha atthoch ñetpaꞌ eñotenet nanak ñeñthchaꞌ ateth phaꞌyeset ñeñth poktetsa ñamha atthoch moechethtenet, ñamha atthoch amach moenmeꞌcheneto ñeñth poꞌtarwas penet paꞌpaklleto, ñamha eꞌñech amoerañtenet, ñamha eꞌñech ameꞌñeñet poerrollaret. Allochñapaꞌ eꞌñe ñeshothetpaꞌ amach errothenoth acheñeneshaꞌpaꞌ achmhareꞌtoñeto Yompor poꞌñoñ.

⁶ Atthekmach peyxhach ñamha yakmaneshaꞌ ñeñth wepaneshameñ atthoch ñetpaꞌxhoꞌña oꞌch eñochet ñeñthchaꞌ ateth phaꞌyeset ñeñth poktetsa.

⁷ Phapaꞌxhoꞌña eꞌñech kowenareꞌ es pephaꞌyes phamha, allochñapaꞌ atthoch entaph acheñeneshaꞌ ñeñth kowen enten Yompor. Ñamha allpon peyxhatenanetpaꞌ eꞌñepaꞌchña paxharr peyxhatenanet, amachña xha moeneꞌ peyellsheñotha peyxhatenaneto atthoch amhchaꞌnaꞌtpoꞌ entoñet Yompor poꞌñoñ.

⁸ Tharroꞌmar eꞌñe peyxhateñoth Yompor poꞌñoñ ñeñth eꞌñe paxharrpaꞌ amach errothenoth amaꞌt eseshapaꞌ oto añpaꞌ ama attheyaye. Ñamha amaꞌt ñeñth peꞌmoñeꞌtyeneꞌ ñerraꞌm eꞌñe peyxhateñoth eꞌñe kowenpaꞌ allempoña ñetpaꞌ oꞌch penkët, tharroꞌmar eꞌñe peyxhateñoth kowen paxharr. Allempoña ñetpaꞌ amach errothenoth alla sasareꞌterrpeterro.

⁹ Ñamha eꞌñech kowen phokthapeꞌchatyes acheñeneshaꞌ ñeñth atarwasatarethtetsa eꞌñe attha. Oꞌch photanet ameꞌñyetepaꞌ eꞌñe kowen ñeñth poꞌpatronar penet. Ñamha añ pokteꞌ allpon moenenet poꞌpatronaretpaꞌ eꞌñepaꞌchña ameꞌñaꞌweñet, allochñapaꞌ atthoch koshateñet poꞌpatronar. Amachña xha anapareꞌteñeto.

¹⁰ Ñamha amachña xha etyeneto atthoch poꞌpatronaretpaꞌ eꞌñech yemtenanet poktakma. Allochñapaꞌ eꞌñe pameꞌñeñothet kowen poꞌpatronaretpaꞌ añña acheñeneshaꞌpaꞌ eꞌñech kowen entapretenet Yompor pokthaphña, ñeñthara ñeñth Yaꞌkeshphatañer yepen.

Attho Yomporpaꞌ orrtatan poemoereña allowenakpay

¹¹ Yomporpaꞌ orrtaterrnay pomoereña eꞌñe allowenakpay paꞌnamen acheñeneshakop atthoch yekeshperra.

¹² Ñamha ñeñth ama kowen enteno Yomporpaꞌ añ pokteꞌ oꞌch yaꞌypoꞌñaꞌwer, ñamha ñeñth allpon yemnatseꞌtyen arr patsropaꞌ añ pokteꞌ ñamha oꞌch yaꞌypoꞌñaꞌwer, tharroꞌmar poemorrenteñoth Yomporpaꞌ ñeñthoꞌmar yexhatey ateth. Añña pokteꞌ amaꞌt añe patsropaꞌ oꞌch yepena ñeñth kowentetsa, ñamha oꞌch yepena ñeñth ateth pokteꞌ enten Yompor, ñamha ñeñth ateth moenen oꞌch yetsotoñ.

¹³ Añpaꞌ atthoch yekwameꞌteñ eꞌñe yoksheñeshaꞌ esempowañenchaꞌ werra poꞌkowenño Jesucristo ñeñth nanak Parets ñeñth Yaꞌkeshphatañer yepen.

¹⁴ Tharroꞌmar ñapaꞌ ña pokteꞌ enteꞌ oꞌch rroma yokop atthoch oꞌwañchaꞌ alloꞌna yephatseꞌtnena sosyaꞌtsañ. Ñamha ñapaꞌ atthoña eꞌshowerrnay allowen ñeñth ama pokteyaye. Allochñapaꞌ atthoch poeyochreshaꞌ perrey, ñamha atthoch yapaꞌ yemaꞌyoxhrena ñeñth kowentetsa.

¹⁵ Allowen ñeñth ateth oꞌ notwaph phapaꞌ ñeñthchaꞌña peyxhatyesanet. Ñamha oꞌch phokthapeꞌchatyesanet eꞌñe kowen, ñamha ñerraꞌm phaꞌyenet ñeñth ama pokteyayepaꞌ oꞌch photanet, amach phatsteto ateth, tharroꞌmar phapaꞌ ñeñthekop anaretheph. Ñamha ñeñth ama pokteyayepaꞌ amach ateth pephatsto, theꞌt acheñeneshaꞌpaꞌ amatheꞌ akwaꞌphsenayeꞌ entenpeto.