Santiago 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Eꞌñe yeñosatseꞌteñotha nanak yochñaꞌten Yomporekop

¹ Masheñneshachaꞌ ñamha noxhaneshachaꞌ, theꞌpaꞌ oꞌch notas poꞌpoñ. Ama pokteyaye oꞌch sechen shonteꞌ ñeñth moenets oꞌch kothapeꞌchaten ñeñth kowentetsa Yomporekop. Tharroꞌmar señoteñ ñeñthey kothapeꞌchatets kowen Yomporekoppaꞌ ello nanakchaꞌ yoroxhenoꞌtseney ñerraꞌm esempo yepena ñeñth ama kowenayaye tharroꞌmar Yomporpaꞌ amach pokteyeꞌ entenye amaꞌt eꞌñe mamesha.

² Tharroꞌmar alloweneypaꞌ xhokma es yepanten. Ñerraꞌm eseshaꞌña ama es panteno poeñosatseꞌteñothpaꞌ ñeñthña poꞌñoxhpaꞌ eꞌñech kowen kothapeꞌchen, ñamha ñeñth ateth acheñpaꞌ eꞌñech eñoteñ atthoch wenatan ora ñeñth ateth moenatseꞌtyen yechets.

³ Ateth pena ñamha kawall. Ñerraꞌm echenan atthoch yameꞌñacha, Eꞌñe poenamothpaꞌ eshekchaꞌ yanemh all yesechateñ. Eꞌñe poenamothpaꞌ oꞌch yameꞌñacha ora poeꞌmokrowen.

⁴ Ñatoꞌ oꞌch netmaꞌntacha ñamha ñeñth ateth pena bote ñeñth chopeꞌchets oño. Ñewa, botepaꞌ amaꞌtchaꞌ nanak añekmoen noñthpaꞌ eꞌñe poepopaphothpaꞌ oꞌch aneñet all sechateñ pamoꞌmteꞌ. Ñamha amaꞌtchaꞌ poepopaphpaꞌ añethollphach, ñamha amaꞌt mhorrpaꞌ moeneñeñchaꞌ oꞌch anemh aꞌyeneth alleneth ama yesechateñe, eꞌñe poepopaphothpaꞌ oꞌch eꞌñe kowen aneñet alleneth sechateñ pamoꞌmteꞌ.

^5-6 Ateth pena ñamha yenam. Yenampaꞌ amaꞌt añetholla yechetspaꞌ atarrchaꞌ paꞌnamen esokmañen yeñosyen alloth. Ñamha ñeñth attho yeñosatseꞌten sosey eꞌñe yenamothpaꞌ ñeñthpaꞌ ateth pena ñerraꞌmrratheꞌ tsoꞌ. Ñewa, tsoꞌpaꞌ amaꞌtchaꞌ añetholla yaꞌthorapaꞌ mameshapaꞌ oꞌch epaꞌwa errakmañen poetsathoꞌmar, allothpaꞌ oꞌch aꞌpoywonay amaꞌt ora ñeñth nanak yemorrentena. Ñeñthpaꞌ ateth pena ñamha eñosatseꞌteñets. Eñosatseꞌteñetspaꞌ amaꞌtchaꞌ mamesha yeñosatseꞌtpaꞌ mameshapaꞌ oꞌch epaꞌwa errakmañen. Allempoñapaꞌ oꞌch xha aꞌwañerran ñeñth kowentetsa Yomporekop. Tharroꞌmar ñeñth attho yeñosatseꞌtyenpaꞌ alloth wena esokmañen sosyaꞌtsañexhno ñeñth añe patsroꞌtsen. Ñamha ñeñthpaꞌ aꞌsosyatennay ora allowen yokthaphña. Ñamha allowen eñosatseꞌteñetspaꞌ arroth wena eꞌñe oneñeth paꞌnetsroth, allara koñchaꞌpoetso all parraren tsoꞌ errapharen. Ñeñthchaꞌ aꞌsosyateneꞌ ora allowen ñeñth ateth yokrrena arr patsro.

⁷ Ñewa, alloweney acheñeypaꞌ eꞌñe pomnaren yephoweñ allowen berroxhno, ñamha othexhno, ñamha allowen shechpexhno, ñamha amaꞌt ñeñth yexhaꞌyetsa oñoꞌmar. Ora añexhnopaꞌ eꞌñe pomnaren yephoweñ.

⁸ Tharraña attho yeñosatseꞌtyen yenamothpaꞌ ama eseshaꞌ pomnaren penaye. Tharroꞌmar attho yeñosatseꞌtenpaꞌ amatheꞌ errothenoth yewnache, ñeñthoꞌmarña xhokmach yeñosatseꞌtyen. Ñeñthoꞌmarña yeñosatseꞌteñapaꞌ eꞌñe ateth pena ñerraꞌmrratheꞌ shecheph ñeñth nanak amtsañ. Shecheph amtsañpaꞌ ñerraꞌm xho axhay mameshapaꞌ oꞌch moetsay.

⁹ Ñamha añ ñeñthara yenamothpaꞌ ñatoꞌ errothenopaꞌ oꞌch yaꞌyeꞌchoxhtatoñ Yompor ñeñth Yepartseshar yepen. Tharraña errothenopaꞌ ñeñthara añ yenamothpaꞌ ñatoꞌ oꞌch yesasareꞌch yamoꞌts ñeñthara ñeñth yexhkat Yompor ñeñth poetmaꞌntatara ateth ñerraꞌm ña.

¹⁰ Ñeñthoꞌmarña masheñneshachaꞌ ñamha noxhaneshachaꞌ sapaꞌ amach ateth sephatsto tharroꞌmar ama pokteyaye eꞌñe yenamothpaꞌ alloth yenamateññañ yamoꞌts Yompor paꞌnateña, ñatoꞌ elloñapaꞌ oꞌchxhoꞌ alla yesasareꞌter yamoꞌts ñeñthara añ yenamoth. Sapaꞌ amach ateth sephatsto tharroꞌmar poꞌpoñ Yompor poeyexhkatar, ñeñthpaꞌ ama attheyeꞌ phanneneto.

¹¹ Ñatoꞌ oꞌch netmaꞌntacha ateth: Amaꞌt sapaꞌ señoteñ ñerraꞌm erroth poten oñ eꞌñe kowenpaꞌ amach errotheno poto ñamha all oñ ñeñth xha rrenoꞌsen.

¹² Ñamha, masheñneshachaꞌ ñamha noxhaneshachaꞌ, amaꞌt sapaꞌ eꞌñe señotweñ, ñerraꞌm yenareꞌt poporrpaꞌ amach poeꞌmer phanoña ñamha parte allempo meꞌten, amapaꞌ ñerraꞌm yenareꞌt ompaꞌ amach poeꞌmer phanoña ñamha poporr. Ñamha ellopaꞌ eꞌñe señotweñ, ñerraꞌm erroth poten oñ eꞌñe kowenpaꞌ amach errothenoth poto ñamha all oñ ñeñth xha poserrsastena. Ñeñthoꞌmarña yeñoteñ yokoppaꞌ ama pokteyaye oꞌch yorrtat ñeñth epa ñeñthara yenamoth. Ñeñth patherrpaꞌ attho yaꞌyeꞌchoxhtateññañ Yompor, poꞌpoññapaꞌ oꞌchxhoꞌ alla yeñosatseꞌterr allowen paꞌnamen sosyaꞌtsañ ñeñthara yenamoth.

Añpaꞌ ñeñth ateth pena eñoteñets ñeñth wetsa eꞌñe yañeña yokthaphñoth

¹³ Ñewa, theꞌpaꞌ oꞌch noterrserr poꞌpoñ. Ñerraꞌm eñall sesho ñeñth otets ñapaꞌ nanakoꞌ eñotenan esokmañen, ñamha ñapaꞌ eꞌñoꞌ es etsotwen, ñewa, orrtepaꞌ ateth pena ñeñth eꞌñe kowen acheñ atthoch acheñeneshaꞌpaꞌ eñochet poꞌñoxhepaꞌt eñotwenan ñeñth kowentetsa Yomporekop. Tharraña ellopaꞌ amachña xha ommoꞌchatsteto attho eꞌñe kowenareꞌ es phaꞌyenet. Tharroꞌmar ñerraꞌm poꞌñoxh es yeñotenpaꞌ oꞌch yeñoch ñamha ñeñth attho es yephaꞌyen eꞌñe kowenpaꞌ ama ommoꞌchpawoyaye.

¹⁴ Tharraña ñerraꞌm sapaꞌ atthera nanak saꞌtsrreꞌmoena seyoxhro eꞌñe sesopeꞌchapreteñoth samoꞌts ñamha ñerraꞌm aña semaꞌyoxhrena ñeñth eꞌñe sokpa ñeñthepñapaꞌ ama pokteyaye oꞌch sommoꞌchena attho es señotyeneñ mameshaꞌtets. Tharroꞌmar ñerraꞌm ñeñtha atarr yommoꞌchateneꞌpaꞌ ñeñthpaꞌ atthakaꞌyeña yeshkën.

¹⁵ Tharroꞌmar ñeñth ateth eñoteñetspaꞌ ama arrotheyeꞌ weno Yomporeshoth. Ñeñthpaꞌ arrotha wena eꞌñe ya yokthaphñoth ñeñth patsoꞌmarekpa. Ñamha ñeñth ateth eñoteñetspaꞌ arrotha wena eꞌñe oneñeth pokthaphñoth.

¹⁶ Tharroꞌmar ñerraꞌm xhokma yaꞌtsrreꞌmoena yesopeꞌchapreteñoth yamoꞌts amapaꞌ ñerraꞌm aña yemaꞌyoxhrena ñeñth eꞌñe yokpa, ñeñthpaꞌ alloth wenaña eꞌmoñeꞌtannaꞌteñets, ñamha allowen sosyaꞌtsañexhno.

Ateth pena eñoteñets ñeñth wetsa Yomporeshoth

¹⁷ Tharraña ñerraꞌm poꞌñoxh Yompor eñotañ yepeneꞌpaꞌ ñeñthpaꞌ atethchaꞌ yepena: Ñanompaꞌ oꞌch yeswanom allowen sosyaꞌtsañexhno ñeñth ama pokteyeꞌ enteno Yompor, ñamha amach alloꞌna atarr atsrreꞌmoxhen yenteno, ñamha eꞌñech kowen yentweñ allowen yamoꞌtseshaꞌ, amachña xha poꞌpoñ yentweno. Ñamha ñerraꞌm poꞌñoxh Yompor eñotañ yepeneꞌpaꞌ xhochña yaꞌmoerañtena, ñamha eꞌñech kowenareꞌ es yorrtatyen yamoꞌtseshakop, ñamha ñerraꞌm errothen yotenpaꞌ eꞌñech poꞌñoxh ateth yepena, amachña xha yeshkareꞌtanneno.

¹⁸ Ñeñthña maꞌyoxhrenaya atthoch eꞌñe kowen yentannenapaꞌ ñeñthpaꞌ añ moenen oꞌch etsotan atthoch alloweneypaꞌ oꞌch yephowerra ñeñth ateth pokteꞌ enten Yompor.