Santiago 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho amach poesheñaꞌttsa kowen yentatsto

¹ Masheñneshachaꞌ ñamha noxhaneshachaꞌ, theꞌpaꞌ oꞌch noterrserr poꞌpoñ. Sa eꞌñe sameꞌñeñoth Yepartseshar Jesucristo ñeñth eꞌñe koxhneshareꞌ orrtatetspaꞌ amach poesheñaꞌttsa eꞌñe kowen sentatsto. Sapaꞌ eꞌñech kowen senteñ allowen acheñeneshaꞌ.

^2-3 Ñatoꞌ sa errothenopaꞌ oꞌch sapxhena allowenes Yompor paꞌpakllo. Allempoña sapxhenapaꞌ ñatoꞌ oꞌch wapa poesheñarr ñeñth chorrenaya ñeñth nanak kowen, ñeñth neneꞌ anillo orotllellen. Ñatoꞌ ñapaꞌ eꞌñech kowen sagaph oꞌchxhoꞌ sotaph: “Phanorros arr allameꞌtets eꞌñe koweno.” Ñatoꞌ eꞌñech allempokma oꞌch wapa ñamha ñeñth atarr wokchañ ñeñth xha shetsreꞌsheꞌmoen paꞌshtam. Ñatoꞌ ñeñthñapaꞌ xhach sotaph: “Phapaꞌ alla phathomos tharroneth, amapaꞌ alla phanorros patso.”

⁴ Tharraña ñerraꞌm ateth sepenapaꞌ ñeñthpaꞌ amach allowenakmayeꞌ kowen sentanneno. Ñamha xhach sottena ñerraꞌmrratheꞌ sañeña eñoteneꞌ ñeñth acheñer nanak sherbets. Tharraña ñerraꞌm ateth yepenapaꞌ ñeñthpaꞌ amach kowenayeꞌ yokthapeꞌcheno.

⁵ Masheñneshachaꞌ ñamha noxhaneshachaꞌ, eꞌñe nemorrenteñothes theꞌpaꞌ nemneñ oꞌch seꞌmhñoten ñeñthchaꞌ ateth notas. Elloña Yomporpaꞌ añña nanak moenen oꞌch akrerran allowen ñeñth nanak wokchañetets añ patsro, atthoch eꞌñe pameꞌñeñothet ñetpaꞌ echerretchaꞌ esokmañen Yomporeshoth. Esempowañenñapaꞌ oꞌch agërret ñamha ñeñth oꞌpatatenanet Yompor all amhchaꞌtarethtena poeꞌntaño. Ñamha ñeñth oꞌpatatenya alloweney ñeñthey morrentenaya ña.

⁶ Tharraña sañapaꞌ xhaña semneñ oꞌch sepenkach ñeñth wokchañetets. Sapaꞌ amaꞌt señoteñeña ñeñth nanak ekhllayorethpaꞌ ñeñthña es aprratamphsañ, amapaꞌ oꞌch temantas amhchaꞌtarethesho.

⁷ Ñamha amaꞌt señoteñeña ñeñth nanak ekhllayorethpaꞌ ñeñthña nanak achmhareꞌteneꞌ Cristo paꞌsoꞌcheñ ñeñthara ñeñth nanak amhchaꞌnaꞌtpoꞌ yenten ya ñeñthey Cristonaꞌtarey.

⁸ Ñerraꞌm xhokma semorrentannenapaꞌ allempopaꞌ oꞌch setsotwa añ ñoñets ñeñth ateth anareth Yompor poꞌñoño awathotheñ, ñeñthpaꞌ ateth oten: “Oꞌch atarr kowen pemoerya phamoꞌts eꞌñe ateth atarr pemorrentena phañeña.” Añ ñoñets ñeñthña nanak sherbets, ello metanaꞌtwenan poꞌpoñexhno. Ñerraꞌm atethchaꞌ sephapaꞌ allempopaꞌ amach es sepallteno Yomporekop.

⁹ Tharraña ñerraꞌm sapaꞌ eꞌñe poesheñaꞌttsa semorrentenapaꞌ ñeñthpaꞌ allothña xhokma yoꞌchñaꞌten. Ñamha ñerraꞌm ateth yepenapaꞌ nanakchaꞌ yeyoren yoꞌchñar, tharroꞌmar ama ateth yepeno ñeñth ateth oteney Yompor poꞌñoñ ñeñth ateth anareth.

¹⁰ Ñamha amaꞌt eꞌñe yeyxhatset allowen Yompor poꞌñoñ ñeñth ateth anarethñaꞌ, ñerraꞌm patherrñapaꞌ ama attheyeꞌ yepeñepaꞌ Yomporñapaꞌ oꞌch enteney ñerraꞌmrratheꞌ oꞌ ora yepantaꞌwoñ.

¹¹ Añ Yompor ñeñth yoteneꞌ “amach sechtapretatsto thaporets” ñeñthara Yompor ñeñth yoteneꞌ ñamha “amach semtsannaꞌtatsto.” Ñeñthoꞌmarña amaꞌt ama yechtapretatsto thaporetsñaꞌ ñerraꞌm errothenopaꞌ machayotha yemtse acheñ Yomporñapaꞌ oꞌch enteney ñerraꞌmrratheꞌ oꞌ ora yathpareꞌtwoñ poꞌñoñ ñeñth ateth anareth.

¹² Ñeñthoꞌmarña sapaꞌ xhokmach seyerpa attho esempowañen Yomporpaꞌ eñotatyeswerreychaꞌ eꞌñe errothenchaꞌ entyeswerrey. Tharroꞌmar ñatoꞌ yepena amaꞌt ñeñth ateth oteney theꞌ Cristo poꞌñoñ ñeñth ateth anareth ñeñth ama amoeroxhtatañeyaye. Ñeñthoꞌmarña sapaꞌ eꞌñe señoteñoth atethpaꞌ amaꞌt errothena señenpaꞌ eꞌñepaꞌchña kowenareꞌ señosyen. Ñamha eꞌñe señoteñoth atethpaꞌ eꞌñepaꞌch kowenareꞌ es sorrtatyen.

¹³ Ñamha sapaꞌ señochepaꞌch ñeñth ama morrentenayo theꞌ pamoꞌtspaꞌ ñapaꞌxhoꞌña esempowañen allempoch eñotatyeswerrey Yompor eꞌñe errothenchaꞌ entyeswerrey, ñapaꞌxhoꞌña allempopaꞌ amach eseshayeꞌ morrenterrayo. Añña ñeñth morrentenaya theꞌ pamoꞌtspaꞌ esempowañenña allempoch eñotatyeswerrey Yompor eꞌñe errothenchaꞌ entyeswerrey, allempoña ñapaꞌ nanakchaꞌ amoerarethterra.

Ñerraꞌm poꞌñoxh yameꞌñenapaꞌ xhoch yorrtat ñamha ñeñth kowentetsa ñokop

¹⁴ Masheñneshachaꞌ ñamha noxhaneshachaꞌ, theꞌpaꞌ oꞌch notas. Poꞌñoxh ama sherbenoña añ acheñer ñeñth otets ñapaꞌ ameꞌñenoꞌ, tharraña ñerraꞌm ama orrtatenano ñeñth kowentetsa Yomporekop. Ñeñthña acheñer atethpaꞌ amach poꞌñoxhayeꞌ ameꞌñeno. Amachkaꞌye aꞌkeshphatereña ñeñth attho oten eꞌñe orrena ñapaꞌ ameꞌñenoꞌ.

¹⁵ Ñewa, ñatoꞌ oꞌch netmaꞌntacha ateth. Ñerraꞌm poesheñarr masheñ, amapaꞌ yoxh palltenet ñeñthchaꞌ chorret, amapaꞌ ñeñthchaꞌ rret allempo,

¹⁶ tharraña ñerraꞌm sapaꞌ attha sotyeñ: “Awaꞌtha, Yomporepaꞌchña phaꞌnataya. Eñalletepaꞌ ñeñthchaꞌ pechorra, ñamha ñeñthchaꞌ perraꞌ.” Tharraña ñerraꞌm amaña es sape ñeñth palltenapaꞌ atethpaꞌ amakaꞌye xhoyeꞌ es sesherbeno.

¹⁷ Ñeñthpaꞌ ateth pena ñamha ñerraꞌm esempo attha yoten, “napaꞌ nameꞌñena”, tharraña ñerraꞌm ama yorrtateno ñeñth kowentetsa Yomporekoppaꞌ, ñeñthña attho yoten, napaꞌ nameꞌñenapaꞌ amach es sherbeno. Xhach yottena ñerraꞌmrratheꞌ oꞌ wañerr attho yameꞌñena.

¹⁸ Ñatoꞌ oꞌch netmaꞌntacha ateth. Ñatoꞌ poesheñarrpaꞌ oꞌch otan poꞌpsheñeñ: “Phapaꞌ eꞌñoꞌ peyemteññaña ñeñth ateth oteney Yompor poꞌñoñ, tharraña amaña phorrtatyenoña ñeñth ateth oteney Yompor poꞌñoñ. Tharraña napaꞌ eꞌñe nephowen ñeñth kowentetsa Yomporekop. Ñewa, ¿erraꞌtsenotheytheꞌña eꞌñe pokteꞌ enten Yompor?” Ñewa, theꞌpaꞌ oꞌch notaph ñeñtheph ateth otets: Poꞌñoxh ñerraꞌm ama yepeno ñeñth kowentetsa Yomporekoppaꞌ amach errothenoth yeñotache poꞌpsheñeñ ñatoꞌ poꞌñoxhtheꞌ yeyemteññaña Yompor poꞌñoñ. Tharroꞌmar ñerraꞌm poꞌñoxh yameꞌñenapaꞌ xhokmach yorrtat ñamha ñeñth kowentetsa Yomporekop.

¹⁹ Ñamha phapaꞌ peyemteñothpaꞌ peñoteñ Yomporpaꞌ eꞌñe pathrra. Ñewa, ñeñthpaꞌ eꞌñe pokteꞌ ateth, tharraña oneñethpaꞌxhoꞌña eñotenan ñamha ateth. Tharraña ñapaꞌ amaꞌt eñotenaneñña Yomporpaꞌ amaꞌt eꞌñe pathrra, tharraña poꞌyorñothach eñoteñ, tharroꞌmar ñapaꞌ eñotena amach keshperro.

²⁰ Theꞌ phapaꞌ amatheꞌ peñoteñaꞌ. Xhotheꞌ pemneñ oꞌch neñotataph attho ñerraꞌm ama yepeno ñeñth kowentetsa Yomporekoppaꞌ amaꞌt yoteneñ yameꞌñena eꞌñech orrena ateth yoten.

²¹ Ñewa, Yomporpaꞌ eꞌñe pokteꞌ entan awath yatañ Abraham allempo moeneꞌ moetsaneñ poechemer Isaac Yomporekop, tharroꞌmar ñapaꞌ añ orrtaten ñeñth kowen enten Yompor.

²² Ñapaꞌ eꞌñe pokteꞌ entan Abraham tharroꞌmar eꞌñe poeyemteñothpaꞌ orrtatwan ora ñeñth ateth och Yompor. Ñeñthoꞌmarña yeñoteñ Abrahampaꞌ eꞌñe poktakma ameꞌñaneꞌth Yompor.

²³ Allempo ateth peꞌthpaꞌ atthothña eꞌñe etsotwan Yompor poꞌñoñ ñeñth ateth akellkareth awathotheñ Génesis, ñeñthpaꞌ ateth oten: “Abrahampaꞌ nanak yemtana Yompor, ñeñthoꞌmarña eꞌñe poeyemteñotha Yomporñapaꞌ eꞌñe pokteꞌ eñcheꞌth. Ñeñthoꞌmar Abrahampaꞌ ateth ocheteꞌth, añmapaꞌ ñeñth eꞌñe parro yemtena epoet Yompor.”

²⁴ Ñeñthoꞌmar yeñoteñ Yomporpaꞌ eꞌñech pokteꞌ enteney ñerraꞌm esempo yorrtatyeññañ ñeñth kowentetsa ñokop. Amaꞌt errpon yotatset yapaꞌ eꞌñe kowen yameꞌñena tharraña ñerraꞌm ama yephoweno ñeñth ateth moenen ñapaꞌ amach errothenoth pokteꞌ entyeña Yompor.

²⁵ Tharroꞌmar amaꞌt Yomporpaꞌ eꞌñe pokteꞌ entan awath koyaneshaꞌ ñeñth paꞌsoꞌcheñ Rahab, amaꞌt ñapaꞌ allempo pha ñeñth eꞌñe pokteꞌ ent Yompor ñokop. Amaꞌt ñeñth koyaneshaꞌpaꞌ nanak ekañoreshath, tharraña ñapaꞌ eꞌñe añotha pokteꞌ eñch Yompor attho ñapaꞌ agapan eꞌñe kowen paꞌpakllo ñeñth moeña awath Josué ñeñthchaꞌ entenayaꞌ ñanom pats. Allothpaꞌ ñamha awoꞌt gaterranet poꞌpoñ thoñ allchaꞌ oñerret atthoch ama rromoerraneto alloꞌmarneshaꞌ ñeñth eꞌmoñeꞌtenawet. Eꞌñe ateth poepeñotha Yomporñapaꞌ eꞌñe pokteꞌ eñch eꞌñe atthekma ñerraꞌm Abraham.

²⁶ Ñeñthoꞌmarña theꞌpaꞌ yeñoteñ amaꞌt errpon yotatset yapaꞌ eꞌñe kowen yameꞌñena, tharraña ñerraꞌm ama yorrtateno ñeñth poktetsa Yomporekoppaꞌ amatheꞌ eso yesherbeña Yompor. Ñatoꞌ oꞌch netmaꞌntacha ateth. Alloweneypaꞌ eꞌñe yeñotweñ ñerraꞌm esempo yeñch yamoꞌts oꞌ rromapaꞌ oꞌch yeñoch ñeñthpaꞌ oꞌ saꞌnemh poekamkëñ tharroꞌmar ñerraꞌm ñeñthoꞌ oꞌ yerromapaꞌ añ yechetspaꞌ amach es sherberreꞌthe.