Santiago 1 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Santiago kellkan carta allowenakop ñeñth attha parratseꞌtyets allemeñ

¹ Masheñneshachaꞌ ñamha noxhaneshachaꞌ ñeñthes Israel poechemereshaꞌ poꞌmhrenñes, ñeñth xharrasheña poechena epsheña ñeñthña poꞌmhreneñ sepeneꞌña sa, ñeñthes attha parratseꞌtyets allemeñ anetsoꞌmar. Na Santiagon sekellkëneꞌña añ carta ñeñthen thorretsa Yomporekop amaꞌt ñamha Poechemerekop Jesucristo ñeñth Yepartseshar yepen. Theꞌpaꞌ oꞌch newomhchaꞌtas allowenes añ necartoth.

Atthoch yaꞌwanten allowen topateñets

² Ñamha theꞌpaꞌ oꞌch, masheñneshachaꞌ ñamha noxhaneshachaꞌ, notas, ñerraꞌm esempo waponasa paꞌnamen topateñetspaꞌ sapaꞌ sokshepaꞌch nanak.

³ Tharroꞌmar sapaꞌ señoteñ ñerraꞌm xho waponaya topateñets, ñeñthpaꞌ añekopchaꞌ wapa atthoch topatenyaꞌ ñerraꞌm poꞌñoxhtheꞌ yameꞌñena. Allochñapaꞌ atthoch xhokma es yaꞌwanten.

⁴ Eꞌñe pokteꞌ alloꞌnepaꞌch sesen awantaꞌwanmoeꞌ allowen topateñets, allochñapaꞌ atthoch poktakma womenk sephaꞌ seyoxher Yomporekop, ñamha atthoch amach es sepallteno amaꞌt mamesha attho sameꞌñeña Yompor.

Yomporpaꞌ xhokma moeneñ oꞌch es eñotatey

⁵ Ñerraꞌm eseshastheꞌ ama eꞌñeyeꞌ eñotenaye ñeñth kowen enten Yomporpaꞌ sapaꞌ añchaꞌña senam Yompor, ñapaꞌ xhokmach es eñotatey, tharroꞌmar ñapaꞌ eꞌñech poksheñeshaꞌ es apoeney alloweney, amachña ñeñthapaꞌ xha cheꞌptareꞌtye.

⁶ Tharraña ñerraꞌm esempo es senamoeñ Yomporpaꞌ eꞌñech seyemteñoth es sanamh. Amach xha seꞌcharrtatsto seyoxhro amaꞌt mamesha. Tharroꞌmar ñeñth xhokma echarrtetsa poeyoxhropaꞌ amach eꞌñeyeꞌ yemtenano Yompor ñeñthoꞌmarña ñeñth ateth petsapaꞌxhach ottena ñerraꞌmrratheꞌ oñ poeꞌmoꞌyer ñeñth allemhatheñ anen mhorr.

^7-8 Ñeñth ateth petsapaꞌ eñochetepaꞌ poꞌñoxhpaꞌ amach es ape Yompor, tharroꞌmar ñeñth ateth petsapaꞌ amach pathrrayeꞌ kothapeꞌcheno. Ateth ñerraꞌm theꞌpaꞌ ñatoꞌ poꞌpoñchaꞌ kothapeꞌchen, ñatoꞌ tsapathñapaꞌ oꞌchxhoꞌ kothapeꞌchenan poꞌpoñ. Ñeñth acheñerpaꞌ xhokmach ateth phaꞌyena.

⁹ Tharraña ñerraꞌm eseshas masheñre esempo ateth sentena ñerraꞌm ama esosheꞌmayaysopaꞌ sokshepaꞌch, tharroꞌmar allempo Yomporpaꞌ atethchaꞌ entenes ñerraꞌmrratheꞌ ñeñthes nanak sherbets.

¹⁰ Ñamha añ masheñer ñeñth echeneꞌ shonteꞌ poꞌkhllayorpaꞌ koshepaꞌch ñerraꞌm esempo es wapoya. Allempopaꞌ amach esosheꞌmayeꞌ entereto. Tharroꞌmar ñeñth ekhllayoreth ñeñthpaꞌ mamekpa ateth pena ñerraꞌmrratheꞌ taꞌteꞌ poerorer ñeñth nanak awyaña.

¹¹ Tharroꞌmar ñeñth ror atethpaꞌ ñerraꞌm oꞌch wapaꞌmoena atsneꞌ, ñerraꞌm oꞌch atserrtapaꞌ xhach aꞌwyatoñña poeꞌchor, añña poerorerñapaꞌ oꞌch shornaꞌtwa; ñeñthña attho kowentenapaꞌ oꞌch wañ. Eꞌñe ateth penaña ñeñth ekhllayoreth. Eꞌñe poechekmaꞌteñothpaꞌ wañerrchaꞌ ñamha.

Eꞌñe yañeña yemnenñoth topateney oneñeth

¹² Nanak kosheñtsoꞌtsen allowen ñeñth awanteneꞌ ora paꞌnamen topateñets, tharroꞌmar ñerraꞌm esempo awantaꞌwan ora topateñetspaꞌ nanakchaꞌ kowen entwer Yompor. Allempopaꞌ apwerchaꞌ Yompor ñeñthchaꞌ atarr koshaterreꞌ alloch ñapaꞌ korretsach thayotheñ amaꞌt errponañowen. Ñeñthpaꞌ aña oꞌpatatena allowen ñeñth morrentenaya ña.

¹³ Ñamha theꞌpaꞌ oꞌch notas, ñerraꞌm esempo eꞌñe sañeña semnenñoth oꞌch sepha ñeñth ama kowenayayepaꞌ amach sotatsto, “añpaꞌ Yomportheꞌ oꞌ topaten.” Tharroꞌmar Yomporpaꞌ ama eseshaꞌ topatenaye atthoch ñapaꞌ oꞌch pha ñamha ñeñth ama kowenayaye. Ñeñthoꞌmarña ñapaꞌxhoꞌ amach errothenoth topatye yamha.

¹⁴ Elloña añmapaꞌ eꞌñe sañeña semneññoth atthoch waponasa topateñets oꞌch sepha ñeñth ama kowenayaye.

¹⁵ Tharroꞌmar ñerraꞌm esempo es yemnatseꞌtyen yeyoxhro, ñerraꞌm oꞌchxhoꞌ yepha atethpaꞌ, ñeñthpaꞌ ñeñthña yoꞌchñar yepen. Ñamha ñerraꞌm xhokma alloꞌna yesen phaꞌnmoeꞌ ñeñth ama kowenayayepaꞌ eꞌñe yoꞌchñarothpaꞌ oꞌch yechenkërra.

¹⁶ Masheñneshachaꞌ ñamha noxhaneshachaꞌ eꞌñe nemorrenteñothespaꞌ oꞌch alla noterrserr, amach sepantatsche sañeña. Poꞌñoxhpaꞌ ama Yomporeyeꞌ yetpatenaye atthoch yephaꞌ ñeñth ama kowenayaye.

¹⁷ Yomporpaꞌ eꞌñe kowenareꞌ es apoeney ñeñthchaꞌ alloꞌna yeyenpoeneꞌ ñeñthara ñeñth moeñennay poeꞌntañoth. Ñamha ñeñthara Yompor ñeñth yexhkateꞌ allowen ñeñth yexhoyoꞌtampeneꞌ poeꞌntañoth. Tharraña errotheno eꞌñe poechopeꞌcheñothpaꞌ amach tama xhoyoꞌtampenye. Tharraña Paretspaꞌ ama attheyeꞌ peno. Ñapaꞌ amach ellopaꞌ alla aꞌpoꞌpoñetamperrye ñeñth ateth moenateney.

¹⁸ Allempo yameꞌñerrñaña poꞌñoñ ñeñth eꞌñe poꞌñoxh ateth oteney ñeshothñapaꞌ yeꞌñalleterra ateth ñerraꞌmrratheꞌ eꞌñe poechemerey ñeñth eꞌñe poꞌmother pen ñeñth anareth eꞌñe ñokop. Tharroꞌmar ñeñthpaꞌ ateth moenen ña.

Añpaꞌ ñeñthchaꞌ ateth yesherbeꞌ Yompor eꞌñe kowen

¹⁹ Ñeñthoꞌmarña, masheñneshachaꞌ ñamha noxhaneshachaꞌ, eꞌñe nemorrenteñothespaꞌ oꞌch neñotaterrserr poꞌpoñ. Sa allowenes añ poktetsa xhokmach pokteꞌ señch oꞌch seꞌmhñoch kowen amaꞌt erraꞌtsena ñeñthchaꞌ serrpareꞌtatets. Añchaꞌña xhokmach serrmoen señoñ. Ñamha amach eꞌñe atthotha saꞌtsrreꞌmaꞌyeno, xhochña ñanom es sokthapeꞌch ñatoꞌ atsrreꞌmoxhentheꞌ ñeñth ateth otenset, ñatoꞌ amatheꞌ.

²⁰ Tharroꞌmar eꞌñe yaꞌtsrreꞌmoeñothpaꞌ amach errothenoth yetsotoña ñeñth ateth pokteꞌ enten Yompor.

²¹ Ñeñthoꞌmarña sapaꞌ oꞌch sekexhpaꞌwerr sosyaꞌtsañ ora allowen ñeñth shonteꞌ sephaꞌyen ñeñth ama pokteyaye Yomporekop. Añchaꞌña sapaꞌ oꞌch sagapoñ Yompor poꞌñoñ eꞌñe señmañeshaꞌ. Tharroꞌmar ñerraꞌm oꞌch xhaponaya Yompor poꞌñoñ eꞌñe yeyoxhropaꞌ ñeñthpaꞌ ñeñthchaꞌ yaꞌkeshphaterreꞌ esempowañen yekamkëñoth.

²² Ñamha sapaꞌ amach eꞌñe orrena seꞌmatstoñe Yompor poꞌñoñ, xhochña sorrtatyesña ñeñth ateth oteney. Tharroꞌmar ñeñth eꞌñe orrena eꞌmoeneꞌ Yompor poꞌñoñpaꞌ ñeñthpaꞌ ñañeñach shekëtsa tharroꞌmar xhatheꞌ otenapañ ñatoꞌ ñeñthatheꞌ poktetsa ñokop atthoch keshperra.

²³ Ñamha ñeñth ateth petsapaꞌ xhach ottena ñerraꞌmrratheꞌ ñeñth attha kowetsa rerpo.

²⁴ Añekpach kowena oꞌch entan errothentheꞌ orrtena paꞌklloyoth. Oꞌchña entwan ñeñth ateth orrtenapaꞌ allempoñapaꞌ oꞌch awerr. Allempoña xherr aꞌyopaꞌ oꞌch alla poeswerran ñeñth ateth orrtena paꞌklloyoth.

²⁵ Tharraña ñeñthña eꞌñe pomnenñoth maꞌyoxhrenaya Yompor poꞌñoñ ñeñth eꞌñe kowen ateth oteneypaꞌ ñeñthñapaꞌ ama attheyeꞌ peno ñeñth ateth pena ñeñth eꞌñe orrena eꞌmoeneꞌ Yompor poꞌñoñ ñeñth attha poeseneꞌ ñeñth ateth oteney Yompor. Añchaꞌña xhokmach orrtatyenan ñeñth ateth oten Yompor poꞌñoñ. Elloña ñeñth ateth petsapaꞌ nanakchaꞌ kosheñtsoꞌtsen.

²⁶ Ñerraꞌm eseshaꞌ otets ñapaꞌ nanakoꞌ kowen sherbenan Yompor, tharraña ñerraꞌm ña ama anenano poꞌñoñpaꞌ ñeñthpaꞌ ñañeñach shekëtsa. Tharroꞌmar ñerraꞌm attherach yeñosatseꞌtyenpaꞌ amach poꞌñoxhayeꞌ yesherbeñe Yompor.

²⁷ Añña eꞌñe pokteꞌ enten Yompor Apa ñeñthchaꞌ ateth yesherbeñ ña eꞌñe kowen: Oꞌch yeyenpoeñ wokchaneshaxhno, ñamha rrethorrnaneshaꞌ ñerraꞌm esempo es moeroxhtatenawet. Ñamha yapaꞌ amach yaꞌsosyatatsto yechets ñeñth ateth phatseꞌtyena ñeñth ama ameꞌñetso arr patsro.