Romanos 9 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablopaꞌ atarr llekënana pamoꞌtsnaꞌtarneshaꞌ ñeñth israelneshaꞌ ñeñth akrañ Yompor ñeñthchaꞌ poeyochreshaꞌ phañ

¹ Ñamha ñeñthchaꞌ notas theꞌpaꞌ ñeñthpaꞌ eꞌñe poꞌñoxh ateth, ama xhoyeꞌ neshkënso, tharroꞌmar napaꞌ oꞌ nameꞌñera Cristo. Ñamha Parets Poekamkëñ ñeñth yexhetsa neyoxhro, ñeñthña eꞌñe eñotenen ñeñthchaꞌ ateth notas ñeñthpaꞌ eꞌñe poꞌñoxh ateth.

^2-3 Napaꞌ atarr nanak nellkëña nemoꞌnasheñneshaꞌ ñeñthara judioneshaꞌ tharroꞌmar ñetpaꞌ shontetañpaꞌ ama ameꞌñeñeto Cristo. Ñeñtha nenen neyoxhro attho atarr nellkënanet. Ñerraꞌm errothenoth naꞌkeshphatanet oꞌtheꞌ naꞌkeshphaterranetañ. Amaꞌt pokteꞌ nenteñeñ oꞌch naꞌkmarethtañ nañeña atthoch nechenkërra allochñapaꞌ amach nentere Cristo, ñerraꞌm ateth nephapaꞌ ñetpaꞌ ñatoꞌ oꞌtheꞌ naꞌkeshphaterranetañ. Tharraña amaꞌt ateth nephatstañpaꞌ amach errothenoth naꞌkeshphaterraneto.

⁴ Ñamha namoꞌtseshaꞌ judioneshaꞌ ñeñthara israelenaꞌtarneshaꞌ ñeñth akrañ Yompor awath ñeñthchaꞌ poechemereshaꞌ phañ, ñamha ñetpaꞌ xhokma entoñetañeꞌth Yompor poꞌpartsoña awath. Ñamha ñet Yomporpaꞌ xhokma aꞌpoktatanetañeꞌth awath atthoch xhokmach aꞌnatenanet. Ñamha ñetpaꞌ apanetañeꞌth Yompor poꞌñoñ awath, ñeñthña eñotataweteꞌth ñeñth ateth pokteꞌ enten Yompor. Ñamha ñeñthara judioneshaꞌ ñeñth eñotayeꞌth atthoch nanak eꞌñe koxhneshoth sherbeñetañ Yompor paꞌpakllo. Ñamha ñeñthara judioneshaꞌ Yompor awathpaꞌ awoꞌt otanetañ ñeñthchaꞌ ateth apoerranet esempowañen.

⁵ Ñamha ñeñth ñanom yamoꞌmtayñeneshañ yepeꞌth ñeñth nanak sherbhayeꞌth Yompor awathpaꞌ ñetpaꞌ ñeñthara judioneshaꞌ pamoꞌtsnaꞌtarneshañ. Ñamha amaꞌt judionaꞌtareshothpaꞌ awoꞌt eñalletosa Cristo arr patsro ñeñthara ñeñth nanak Partsotets ñeñth pomnaren peneꞌ allowen esokmañen. Yaꞌyeꞌchoxhtatoñepaꞌch thayotheñ amaꞌt errponowañen. Ñeñthpaꞌ atthetepaꞌch Nompore.

⁶ Tharraña amaꞌt allowen judioneshaꞌña amaꞌtchaꞌ ama ameꞌñereto Cristopaꞌ Yomporñapaꞌ amach errothenoth wañerroña poꞌñoñ ñeñth ateth otaneteꞌth awath; ñeñthpaꞌ xhokmach etsota ñeñth ateth otanet, tharroꞌmar ñapaꞌ ama poenesho poꞌñoñ. Ñamha allowen ñeñth israelenaꞌtarpaꞌ ama allowenakmayeꞌ Yomporenaꞌtareyayeto.

⁷ Ñamha ora allpon poꞌmhrenña Abrahampaꞌ ama allowenakmayeꞌ poꞌnoxh Abraham poechemer entapreteñe Yompor. “Aña eꞌñe poechemer entapreteñ Yompor ñeñth Isaac poꞌmhrenña”, ñeñth ateth otan Yompor Abraham awath.

⁸ Ñeñthoꞌmarña yeñoteñ allowen Abraham poꞌmhreneñpaꞌ ama allowenakmayeꞌ poꞌñoxh poechemer penaneto Yompor. Añachña poechemer pen ñeñth yemtenaya Yompor ñeñth ateth otenanet.

⁹ Ñewa, yapaꞌ yeñoteñ ateth awath Yomporpaꞌ otan Abraham ñeñthchaꞌ aph, ñeñthpaꞌ ateth ot: “Tsapath charo ateth ñerraꞌm theꞌ añempo, oꞌch nowerra allempoñapaꞌ pethapor Sarapaꞌ cheyoreꞌtchaꞌ ñeñthpaꞌ asheñorrchaꞌ ñeñthchaꞌ Isaacatats.” Arrpaꞌ allowa ñeñth ateth Yomporpaꞌ otan Abraham.

^10-13 Elloña theꞌpaꞌ oꞌch alla neyerpaterrserr attho yatañ Isaacpaꞌ awoꞌt yoran Rebeca ñeñthchaꞌ poethapor phaꞌ. Ñamha allempo Rebecapaꞌ thotana Isaac poechemer ñeñth epoeshaꞌ Yomporñapaꞌ otan Rebeca, ateth och: “Ñeñthchaꞌ eñalletatsa ñanom pechoyorpaꞌ añchaꞌ pomnaren peneꞌ ñeñthchaꞌ eñalletatsa chentaꞌ.” Arrpaꞌ allowa ñeñth ateth Yomporpaꞌ otan Rebeca. Ñamha allempo ama eñalletenaꞌ poechoyoreshaꞌ Yomporñapaꞌ awoꞌt yeꞌchoña patherr poechoyor ñeñth moenen ña, amaꞌt allempopaꞌ ama es yexhkatenetaꞌ amaꞌt ñeñth kowen enten Yompor amapaꞌ ñeñth ama kowenayaye. Eꞌñe attha awoꞌt yeꞌchana poesheñarr ñeñth moenen ña; cheshathollpaꞌ ama poeyexhkateñotheyeꞌ kowen yeꞌchyoña Yompor, tharroꞌmar cheshatholleshaꞌpaꞌ ama es yexhkatenetaꞌ amaꞌt koñeꞌtha. Atthoña awoꞌt etsota Yompor poꞌñoñ ñeñth ateth akellkaꞌwareth awathotheñ, ñeñthpaꞌ ateth oten Yompor: “Jacobpaꞌ atarr nemorrenteña, paꞌmoꞌnasheñña Esaúpaꞌ ama tama nemorrenteño.” Ateth pha atthoch yeñoch Paretspaꞌ ña akrañtetsa ñapoeth añekop ñeñth eꞌñe yeꞌchena ña.

Attho Yomporpaꞌ eꞌñe pokteꞌ entan oꞌch poechemer phan ñamha ñeñth ama judioneshayaye

¹⁴ Theꞌña ñatoꞌ sapaꞌ xhatheꞌ sotenapañ ñeñth ateth oteꞌth Yompor, ñeñthpaꞌ amatheꞌ pokteyaye. Tharraña oꞌch notas ñeñthpaꞌ eꞌñe pokteꞌ ateth oteꞌth Yompor.

¹⁵ Tharroꞌmar yapaꞌ yeñoteñ ateth Yomporpaꞌ otan awath Moisés, ñeñthpaꞌ ateth och: “Ñerraꞌm eseshaꞌ neyeꞌcha na ñeñthchaꞌña neyenpaꞌ. Ñamha ñerraꞌm eseshaꞌ neyeꞌcha na ñeñthchaꞌña atarr nemorrentena.”

¹⁶ Ñeñthoꞌmarña yapaꞌ yeñoteñ ñerraꞌm eseshaꞌ moenen Yompor ñeñthchaꞌña aꞌnatena, ñeñthpaꞌ eꞌñe pokteꞌ. Ñeñthpaꞌ ama añotheyaye ñeñth ateth yemnen ya acheñey, ñamha ama yaꞌmoeroxhtameꞌteñotha yeꞌchenyoña Yompor. Eꞌñechña poemoereñotha yeꞌchenana erraꞌtsen moenen ña.

¹⁷ Ñamha yeñoteñ ñeñth ateth Yomporpaꞌ otan awath ñeñth amhchaꞌtarethtatseꞌth Egipto. Ñeñthpaꞌ ateth otan amhchaꞌtareth Faraón: “Na peneꞌ, ñeñtheph amhchaꞌtarethtetsa, atthoch peshoch norrtat newamenk acheñeneshesho. Atthochña ñetpaꞌ oꞌch serrpareꞌtyesonet errakmañen attho na ñeñthen nanak awamenkathtetsa.”

¹⁸ Ñeñthoꞌmarña yapaꞌ yeñoteñ ñerraꞌm eseshaꞌ moenen Yompor oꞌch aꞌnatanetpaꞌ ñeñthchaꞌña aꞌnatena. Ñamha ñerraꞌm eseshaꞌ moenen Yompor oꞌch echarrtenet poeyoxhreto, ñachña moenatenawet.

¹⁹ Theꞌña ñatoꞌ sapaꞌ xhatheꞌ sotenapañ: “Ñerraꞌm Yompor ñach yemnateneꞌ ñeñth eꞌñe ateth moenen ñapaꞌ, yapaꞌ amach erroth yepe, ñeñthoꞌmarña amatheꞌ pokteyaye oꞌch enteney yapaꞌ amoꞌ kowenayayye, ñerraꞌm ña yemnatateneꞌ oꞌch es ateth yepha.” Ñatoꞌ sapaꞌ atthatheꞌ sokthapeꞌchatseꞌtyen seyoxhro.

^20-21 Tharraña masheñneshachaꞌ ñamha noxhaneshachaꞌ, oꞌch notas, Yomporpaꞌ ama asasareꞌtpawoyaye. Ñatoꞌ oꞌch netmaꞌntatasa ateth: Ñatoꞌ eseshaꞌpaꞌ oꞌch yexhkatan koyemh ñeñth patsrroꞌ. Ñeñth eꞌñe ateth moenen ña, ñapaꞌ ñeñthchaꞌ ateth yexhkat. Ñatoꞌ oꞌch yexhkatan eprroga koyemh, poerrogarrpaꞌ atarrchaꞌ kowen, eꞌñech kowenoth sherbenan pamoꞌmteꞌ. Allothñapaꞌ ñeñth aꞌpchat patspaꞌ oꞌch alla yexhkaterranerr poꞌprrogëñ poekoyemh. Ñatoꞌ ñeñthpaꞌ amach tama kowenayeꞌ pe, tharroꞌmar ñeñth yexhkateꞌpaꞌ ama moeno oꞌch orrtach acheñeneshesho. Tharraña koyemhpaꞌ ñerraꞌm eñorenañpaꞌ amach sasareꞌtanoña pamoꞌmteꞌ, amach oche: “Esoꞌmartheꞌ peyexhkaten ateth, ama kowenayeꞌ pephaꞌno.” Tharroꞌmar ñerraꞌm pamoꞌmteꞌ moenets atethchaꞌ phan poekoyemh, koyemhñapaꞌ amach erroth es pho. Ñeñthoꞌmarña yeñoteñ Yomporpaꞌ amaꞌt errothen moenaꞌ oꞌch ateth phonay, ñeñthpaꞌ eꞌñe pokteꞌ ñokop, tharroꞌmar Parets añekoppaꞌ ña otets ñapoeth. Ñamha yapaꞌ amach yesasareꞌche, tharroꞌmar Paretspaꞌ ama asasareꞌtpawoyaye.

²² Amaꞌt attheñpaꞌ elloña Yompor awathpaꞌ atarr awantaneꞌth attho nanak athpareꞌcheꞌth ñeñth oꞌpateꞌth chenkëñets. Ñerraꞌm ña moenatseñ eꞌñe pokteñ atthoch tsaꞌtaterranetañ eꞌñe allempokma poꞌyoroxhenñoth. Atthochña entatanetañ poꞌwamenk tharraña ama attheyeꞌ phaneto, atthaña awantaneteꞌth poꞌchñaret.

²³ Allochñapaꞌ atthoch esempopaꞌ xhap oꞌch orrtaterrnay alloweney poꞌkowenña, ñeñthey oꞌ moererrya yamha, ñeñthey awath Yomporpaꞌ kothapeꞌchonayeꞌth yekowentapreteroꞌch esempowañen.

²⁴ Ateth ñerraꞌm ya ñeñthey judioneshay, amaꞌt ñamha ñeñth ama judioneshayaye, tharroꞌmar ama judioneshayaya ñapoeth xhoreꞌtenoña Yompor ñeñthchaꞌ ameꞌñaya. Alloweneyña theꞌpaꞌ oꞌ xhoreꞌterrey oꞌch eꞌñe yameꞌñaꞌwera.

²⁵ Amaꞌt ateth oteꞌtheña Yompor awath, allempo otan Oseas ñach serrpareꞌteꞌ ñeñth ateth och Yompor, ñeñthpaꞌ ateth ot Yompor: Amaꞌt ñeñth ama nechemereyaye theꞌpaꞌ tsapathonethñapaꞌ eꞌñech nechemer nephowerranet. Amaꞌt poꞌpoñ acheñ ñeñth ama nemorrenteno theꞌpaꞌ tsapathonethñapaꞌ eꞌñech nemorrentwerranet ñamet.

²⁶ Amaꞌt eꞌñe all awath Yomporpaꞌ otaneteꞌth: “Sapaꞌ ama nechemereyayso”, theꞌña allpaꞌ oꞌch eñotweret, theꞌñapaꞌ eꞌñoꞌ poechemereshaꞌ oꞌ phowerranet Yompor, ñeñth Yompor ñeñth ama arromñatheshayaye amaꞌt awatha.

²⁷ Elloña Isaías ñeñth aꞌmhtayeꞌth Yompor poꞌñoñ awathpaꞌ ñapaꞌxhoꞌña ateth eñoseꞌth, ñeñthchaꞌ ateth perra israelenaꞌtarneshaꞌ, ñeñthpaꞌ ateth ot: “Israelenaꞌtarneshaꞌpaꞌ merenach nanak shonteꞌ ateth ñerraꞌmrratheꞌ ateth yenteññañ ontap poꞌmñer nanak shonteꞌ. Tharraña amaꞌtchaꞌ shontetañpaꞌ amachña allowenakmayeꞌ aꞌkeshphatarethterreto; patantaꞌttsachña ñeñthchaꞌ aꞌkeshphatarethterrtsa.

²⁸ Tharroꞌmar Yomporpaꞌ eꞌñech tsaꞌtatwerrana shonteꞌ acheñ arr patsro ñeñth ateth otaneꞌth ñeñth eꞌmayeꞌth poꞌñoñ. Amach alloꞌna awantaꞌnenaneto poꞌchñar.”

²⁹ Ñeñthpaꞌ eꞌñech ateth perra ñeñth ateth oteꞌth Isaías, ñeñthpaꞌ ateth ot: Ñeñth nanak Paretspaꞌ awoꞌt aꞌkeshphaterrey amaꞌt poesheñaꞌttsotheya. Ñerraꞌm ama ateth phaꞌyeñepaꞌ alloweneypaꞌ eꞌñech yokllaꞌwerrañ eꞌñe poktakma, ateth phanet awath allempo aꞌkllatwarethta allowenet ñeñth yexhatseꞌth añetso Sodomo ñamha Gomorro.

Arrpaꞌ attho Yomporpaꞌ ama pokteyeꞌ entenano judioneshaꞌ

³⁰ Ñeñthoꞌmarña theꞌpaꞌ yeñoteñ acheñeneshaꞌ ñeñth ama judioneshayaye amaꞌt ama eꞌneñeto atthoch eꞌñe pokteꞌ entanet Yomporpaꞌ ñetñapaꞌ awepaꞌt enteret ñeñth eꞌñe attho pokteꞌ enteney Yompor alloweney ñeñthpaꞌ ñeñthña attho yeyemteña ñeñth ateth oteney Yompor.

³¹ Tharraña judioneshaꞌ amaꞌt eꞌneñetañ atthoch pokteꞌ entenanet Yomporpaꞌ tharraña ñetñapaꞌ ama entereto, tharroꞌmar aña eꞌñe yemtenet oꞌch eꞌñe etsotwetañ ora allpon ñoñets ñeñth ateth anarethtenet; tharraña ama es etsotwenaye ora allowen.

^32-33 Yeñoteñ ama enterreto atthoch pokteꞌ entenanet Yompor, tharroꞌmar ama yemteñeto Yompor ñeñth ateth otenanet. Ñetpaꞌ aña eꞌñe yemtenet oꞌch yexhkatyenet ñeñth eꞌñe kowen entenet ñet. Ñeñthpaꞌ eꞌñe ateth phowet ñeñth ateth oten Yompor poꞌñoñ, ñeñth anwareth awathotheñ, ñeñthpaꞌ ateth ot Yompor awath: Napaꞌ oꞌch nemñanet poesheñarr ñeñthchaꞌ atarr sherberrets all añetso ñeñth paꞌsoꞌcheñ Sión ñeñthara Jerusaléñ. Tharraña ñetpaꞌ xhach tsenaꞌchet. Poetsenaꞌteñothetpaꞌ oꞌwañ yemtennanet ñeñth ateth nokthapeꞌchatanetañ. Tharraña amaꞌt erraꞌtsena ñeñthchaꞌ ameꞌñerraya ñapaꞌ ñetñapaꞌ ellopaꞌ amach alla es eꞌnerreteꞌthe. Ñeñthpaꞌ ateth tomaꞌntachet awath: Cristopaꞌ ñach anarethtatsa arr patso ateth ñerraꞌmrratheꞌ mapoeꞌ ñeñth atarrchaꞌ sherben. Tharraña judioneshaꞌñapaꞌ ama asherbenayeꞌ eñcheto amaꞌt mamesha, xha ottet ñerraꞌmrratheꞌ attha epothoꞌtatseꞌtyeset ñesho ñeñth atmaꞌntatareth mapoeꞌ.