Romanos 8 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Parets Poekamkëñpaꞌ ñeñthña womenk yepeneꞌ yeyoxhro

¹ Ñeñthoꞌmarña theꞌpaꞌ yeñoteñ amach aꞌkoñchataretheye amaꞌt poesheñarrotheya ñeñthey oꞌ yeparrokmatera Cristo Jesús. Ñewa, ñeñthey oꞌ yeparrokmatera Cristo, ñeñthpaꞌ añ, attho oꞌ kothapeꞌchaterrey Parets Poekamkëñ, amaña añeyeꞌ yokthapeꞌchatenaye yoꞌchñar ñeñth yeyoxhroꞌtsen.

² Tharroꞌmar theꞌpaꞌ ateth ñerraꞌm napaꞌ eꞌñe neparrokmateñoth Cristopaꞌ añña Parets Poekamkëñpaꞌ ñeñthña womenk nepeneꞌ neyoxhro, allochña napaꞌ korretsanach thayotheñ amaꞌt ñamha errponowañen. Atthothña oꞌ aꞌwañamperren attho noꞌchñarpaꞌ ñeñtha womenk nephayeꞌth neyoxhro, ñeñthchaꞌ nanmayeñ rromoeñtso, ñeñthara koñcheñets.

³ Ñewa, añ ñoñets ñeñth ateth anareth ñeñthchaꞌ yetsotateneñpaꞌ amach errothenoth aꞌkeshphaterrye, tharroꞌmar ya arromñathey yoꞌchñarpaꞌ ama moenatenye oꞌch ateth yephowa ora ñeñth ateth oteney añ ñoñets. Tharroꞌmar añ ñoñetspaꞌ ama eñalle atthoch womenk phonay yeyoxher eshekchaꞌ yetsotwe ora allpon ñeñth ateth oteney ñeñthchaꞌ ateth yephoweneñ. Tharraña attho Yomporpaꞌ awoꞌt aꞌpoktatwonay yoꞌchñar ñeñthpaꞌ ateth pha. Ñapaꞌ awoꞌt moeñonay eꞌñe ña Poechemer ñeñthchaꞌ eñalletostsa arr patsro eꞌñe ateth ñerraꞌm ya ñeñthey arromñathey, ñeñthey ochñathey. Allochñapaꞌ ñach rromosets yoꞌchñarekop; allochñapaꞌ atthoch tsaꞌtwonaya yoꞌchñar. Atthochña aꞌwañamperrey attho yoꞌchñara ñeñtha womenk yepeneꞌ yeyoxhro.

⁴ Ateth oꞌ phonay Yompor atthoch theꞌ yapaꞌ oꞌch ateth yepha kowen ñeñth ateth oteney Yompor poꞌñoñ, alloweney ñeñthey ateth petsa ateth kothapeꞌchateney Parets Poekamkëñ, ñeñthey oꞌwañ ateth yephatseꞌtyesa ñeñth ateth kothapeꞌchatseꞌtateney yoꞌchñar ñeñth yeyoxhroꞌtsen.

⁵ Tharroꞌmar ñeñth ateth petsa ñeñth ateth kothapeꞌchatenanet sosyaꞌtsañ ñeñth poeyoxhroꞌtsenetpaꞌ añachña eꞌnenet ñeñth ateth moenatseꞌtatenanet poꞌchets. Tharraña ñeñth ateth petsa ñeñth ateth kothapeꞌchatenanet Parets Poekamkëñpaꞌ añchaꞌña eꞌmhñotenet ñeñth ateth moenatenanet Parets Poekamkëñ.

⁶ Tharroꞌmar ñerraꞌm añach yeꞌnen ñeñth ateth moenatseꞌtateney yechetspaꞌ ñeñthpaꞌ ñeñthchaꞌña yanerreꞌ rromoeñtso ñeñthara koñcheñtso. Tharraña ñerraꞌm añ yeꞌmhñoten ñeñth ateth kothapeꞌchateney Parets Poekamkëñpaꞌ ñeñthpaꞌ ñeñthchaꞌña allochña yapaꞌ korretsayach eꞌñe kowen yoksheñeshokmañen.

Attho ñerraꞌm añach yeꞌnen ñeñth moenatseꞌtateney yechetspaꞌ amach errothenoth yameꞌñeroña Yompor

^7-8 Tharroꞌmar ñerraꞌm añach yeꞌnen ñeñth ateth moenatseꞌtateney yechetspaꞌ ñeñthpaꞌ ateth yepena ñerraꞌmrratheꞌ xha yeꞌmoñeꞌteñ Yompor, ñeñthoꞌmarña xhach yathpareꞌteññañ poꞌñoñ. Amach errothenoth yameꞌñeroña Yompor ñerraꞌm añach yeꞌnen ñeñth ateth moenatseꞌtateney yechets. Ñamha ñerraꞌm atthach yepenapaꞌ amach errothenoth yokshacheña Yompor.

⁹ Tharraña sapaꞌ ama añeyeꞌ sokthapeꞌchatenaye sechets; añña sokthapeꞌchateneꞌ Parets Poekamkëñ ñerraꞌm poꞌñoxh Poekamkëñpaꞌ oꞌ yexherra seyoxhro. Tharraña ñerraꞌm eseshas ama echenaye Cristo Poekamkëñ seyoxhropaꞌ ñeñthesña poꞌñoxhpaꞌ ama poechemereyayso Yompor.

¹⁰ Ñewa, ya arromñatheypaꞌ xhokmach yerroma arr patsro ochñartsoꞌmarekop. Tharraña ñerraꞌm Cristo yexhena yeyoxhro yekamkëñothpaꞌ xhokmach yokrrena tharroꞌmar Yomporpaꞌ eꞌñe pokteꞌ enteney.

¹¹ Yapaꞌ yeñoteñ Yomporpaꞌ awoꞌt tantaterran Poechemer ñeñth Cristo Jesús poꞌrromñoth. Ñamha ñerraꞌm Yompor Poekamkëñ yexhena ya yeyoxhro, amaꞌt arromñatheypaꞌ yapaꞌxhoꞌña tantatwerreychaꞌ yerromñoth. Parets Poekamkëñothñapaꞌ yokrraꞌwerrach, ñeñthara Poekamkëñ ñeñth yexhetsa theꞌ yeyoxhro.

¹² Ñeñthoꞌmarña masheñnesha ñamha noxhanesha, theꞌpaꞌ añ eꞌñe poktetsa oꞌch eꞌñe ateth yepena ñeñth ateth kothapeꞌchateney Parets Poekamkëñ, ama pokteyaye oꞌch ateth yepena ñeñth ateth kothapeꞌchateney yechets.

¹³ Tharroꞌmar ñerraꞌm alloꞌna yokrraꞌnena ñeñth ateth kothapeꞌchateney yechetspaꞌ ñerraꞌm yerromapaꞌ yechenkaꞌwerrach yoꞌchñaroth, tharraña ñerraꞌm Parets Poekamkëñoth oꞌch yaꞌypoꞌñerr ñeñth ateth phatseꞌtateney yechetspaꞌ yañapaꞌ korretsayach.

Attho ñeñthey eꞌmhñoteneꞌ ñeñth ateth kothapeꞌchateney Parets Poekamkëñ, ñeñtheyñapaꞌ oꞌ poꞌñoxh poechemer perrey Yompor

¹⁴ Tharroꞌmar alloweney ñeñthey eꞌmhñoteneꞌ ñeñth ateth kothapeꞌchateney Parets Poekamkëñ, ñeñtheyñapaꞌ oꞌ poꞌñoxh poechemer perrey Yompor.

¹⁵ Ñeñthoꞌmarña amach alla yemhchaꞌterrerro ateth ñerraꞌmrratheꞌ ñeñth ñañrets, atarrchaꞌ mechaꞌtenan pamoꞌmteꞌ. Tharroꞌmar yapaꞌ allempotheñ oꞌ yagërrñañ Yompor Poekamkëñ yañapaꞌ oꞌ poechemer perrey poꞌñoxh. Ñeñthoꞌmarña amach yemhchaꞌnañotheyeꞌ yemaꞌyocheñothpaꞌ oꞌch yexhoreꞌch, oꞌch yoch: “Apa.”

¹⁶ Tharroꞌmar ñeñthara Parets Poekamkëñ ñeñthña yeñotateneꞌ yeyoxhro poꞌñoxhpaꞌ oꞌ poechemer perrey Yompor.

¹⁷ Ñamha yapaꞌ yeñoteñ attho oꞌ poechemer perrey Yomporpaꞌ yapaꞌxhoꞌña yagapapreterchaꞌ Cristo ora ñeñth allpon oꞌpatatenya Yompor. Ñerraꞌm xho yemoeroxhta Cristoꞌmarekop theꞌ, ateth peꞌth ña atarr moeroxhteꞌth awath añe patsro, esempowañen yapaꞌxhoꞌña yekowentapreterach.

Attho amaꞌt yemoeroxhetwanena añe patsro, ñeñthpaꞌ ama esoyeꞌ yenteñe

¹⁸ Amaꞌt yemoeroxhetwanena añe patsro, ñeñthpaꞌ ama esoyeꞌ nenteñe. Tharroꞌmar neñoteñ esempowañenpaꞌ ellochña nanak yekowentapretera Cristo.

¹⁹ Amaꞌt ora allpon ñeñth yentyen arr patsro ñeñth yexhkatwa Yomporpaꞌ ñetpaꞌxhoꞌña elloña atarr koweñet esempowañenchaꞌ Yomporpaꞌ orrtatwerreychaꞌ ñeñthey oꞌ poechemereshaꞌ perrey, atthoch allempochña oꞌch yekowentapretera Cristo.

²⁰ Tharroꞌmar awath allempo athpareꞌteꞌth Adán, Yomporñapaꞌ awoꞌt aꞌwañatan attho atarr sherbhañ nanak ñeñth ora allpon poeyexhkatar. Allempoñapaꞌ oꞌwañ tama sherbhaꞌ. Tharraña poeyexhkatarpaꞌ ama erroth pho, tharroꞌmar ateth moenen Yompor. Tharraña amaꞌt ateth phanetañpaꞌ elloña theꞌpaꞌ xhokma koweñet atthoch esempowañen Yomporpaꞌ oꞌch alla aꞌkowentatwerranet.

²¹ Tharroꞌmar ora allpon ñeñth yentyen añe patsropaꞌ ateth anarethet ñamet xhokmach mellashaꞌtwet, allempoñapaꞌ oꞌwañchaꞌ sherbet. Tharraña ñerraꞌm esempowañenchaꞌ, ñeñthey oꞌ poechemer perrey Yompor oꞌch yekowentapretera Cristo, ñamha allempoña ora allpon Yompor poeyexhkatarpaꞌ ñetpaꞌxhoꞌña oꞌch alla aꞌkowentatarethetwerret ñamet.

²² Yapaꞌ yeñoteñ ora allpon ñeñth yentyen añe patsropaꞌ xhokma moeroxheꞌtyenet amaꞌt themeꞌttsen, tharroꞌmar ama aꞌkowentatwarethterraꞌ. Nanak llekanrroretyenet ateth ñerraꞌmrratheꞌ koyaneshaꞌ ñerraꞌm oꞌ xhap allempoch cheyoreꞌten nanakchaꞌ atsotenana poeꞌmar. Nanak llekëñtsoꞌtsen tharrempowach allempoch eñalletatwan poeꞌmar. Allempoñapaꞌ nanakchaꞌ kosheñtsoꞌtsen, tharroꞌmar oꞌ eñalletatwan poeꞌmaretholl. Atethchaꞌ perraña ñamha Yompor poeyexhkatarexhno, nanakchaꞌ koshaꞌrrterret esempowañenchaꞌ allempoch aꞌkowentatarethetwerret.

²³ Ama ñapthayaya Yompor poeyexhkatar moeroxhtetso. Yapaꞌxhoꞌña xhokma yemoeroxhetyena arr patsro, amach eꞌñeyeꞌ yeñmateno yeyoxhro. Tharraña amaꞌt atethpaꞌ oꞌ yechen Parets Poekamkëñ ñeñth yexhetsa yeyoxhro ñeñth ñanom apoeney Yompor, allothñapaꞌ orameñ ñamha ñeñth oꞌpatatenya paꞌnamen. Ñeñthoꞌmarña yeñoteñ esempowañenpaꞌ apwerreychaꞌ ora allpon ñeñth oꞌpatatenya. Ñeñthoꞌmarña yekweñ esempowañen Yomporpaꞌ oꞌch orrtatwerrnay ñamha attho yapaꞌ oꞌ poechemereshaꞌ perrey. Allempoña ya yechetspaꞌ aꞌpoꞌpoñetwerrnaychaꞌ atthochña yekowentapretera Cristo.

²⁴ Allempotheñ oꞌ yagërrñañ Yompor Poechemer ñeñth Cristo yapaꞌ yeyemteññaña ñeñth oꞌpatatenya ñeñthchaꞌ ateth perrnay esempowañen. Ñeñthoꞌmarña allempotheñ oꞌ yaꞌkeshphatarethterra xhokmach yekweñ esempowañen allempoch aꞌpoꞌpoñetwerrnay yechets atthochña yekowentapretera Cristo. Poꞌñoxhpaꞌ ama aꞌpoꞌpoñetwerrnayaꞌ yechets, ñeñthoꞌmarña themeꞌttsen yekweñ. Ñerraꞌm oꞌ aꞌpoꞌpoñetwerrnayeñ yechetspaꞌ allempoñapaꞌ amatheꞌ palltenañe oꞌch yeyemteññaña ñeñth ateth moenateney ña.

²⁵ Tharraña ñerraꞌm xhokma yeyemteña Yompor ñeñth ateth oteney yeñoteñ atethchaꞌña perrnay esempowañen. Ñewa, amaꞌt ama orrtenaꞌ, theꞌpaꞌ yeyemteñoth ñapaꞌ eꞌñepaꞌchña yoksheñeshokmañen yekweñ. Amachña xha yemoenmeꞌchatsche.

Attho enamoennay Parets Poekamkëñ Yomporeshoth

²⁶ Ñamha atthekma Yompor Poekamkëñ ñach yeyenpoeneꞌ ñerraꞌm esempo ama erroth es apen yenteno. Ñewa, ateth ñerraꞌmrratheꞌ allempo yellkëñeshaꞌ yemaꞌyochena ñatoꞌ ama yeñoteñe eschaꞌña yenamhña Yompor ñeñth eꞌñe pokteꞌ enten ña. Allempoña Parets Poekamkëñpaꞌ ñachña enamats yokop eꞌñe poellkapreteñothey ya, eꞌñech poeꞌnarñaꞌteñoth, amach xhoyeꞌ eñoreno atthoña enamatennay Yompor yokop.

²⁷ Tharraña Yomporpaꞌ kowennay alloweney ñeñth ateth yokthapeꞌchen yeyoxhro, ñeñthoꞌmarña ñapaꞌ eñoteñ ñeñth ateth enamoennay Poekamkëñ, tharroꞌmar Poekamkëñpaꞌ añach enamoennay ñeñth eꞌñe pokteꞌ enten Yompor yokop ñeñthey oꞌ poeyochreshaꞌ perrey Parets.

Ñeñthey eꞌñe eñotwayeꞌth awath Yomporpaꞌ ñapaꞌ atarr koxhneshaꞌ oꞌpatatenya

²⁸ Ñamha amaꞌt es yewapoya, yapaꞌ yeñoteñ Yomporpaꞌ ñach aꞌpoktateneꞌ yokop, alloweney ñeñthey morrentenaya ña, ñeñthey akrarethey oꞌch ateth yepeññañ ñeñth ateth moenen ña.

²⁹ Tharroꞌmar alloweney ñeñthey eꞌñe eñotwayeꞌth Yompor awath, ñeñtheychaꞌ ameꞌñerraya esempo, ñañapaꞌ kothapeꞌcheꞌth awath yokop ñeñthchaꞌ ateth moenatey, allochñapaꞌ yach kothapeꞌcherrets kowen atthochña yeyexhkërra eꞌñe ora ateth ñerraꞌm Poechemer ñeñth Cristotets. Allochñapaꞌ alloweney yepoꞌnarchaꞌ yepeñ Cristo amaꞌt shontey ñeñthey ameꞌñetsa.

³⁰ Ñewa, allowen ñeñth ateth kothapeꞌcheꞌth Yompor yokop awathpaꞌ allempoña awoꞌt xhap allempoch xhoreꞌterrey oꞌch yameꞌñera. Allochña ñeñthey axhoreꞌtaretheypaꞌ ñañapaꞌ oten yokop eꞌñoꞌ pokteꞌ enteney eꞌñe yeyemteñoth Cristo. Allochñapaꞌ alloweney ñeñthey eꞌñe pokteꞌ enteney, Yomporñapaꞌ oten yokop yekowentapreteroꞌch Cristo esempowañen.

³¹ Ñeñthoꞌmar theꞌpaꞌ oꞌch notas, Yomporpaꞌ atarr kowen morrentenya. Ñamha yapaꞌ yeñoteñ attho nanak morrentenya Yomporpaꞌ amaꞌt eseshapaꞌ amach errothenoth aꞌwañamperetoña attho morrentenya.

³² Eꞌñe poemorrenteñothey ya amaꞌt eꞌñe ña Poechemerpaꞌ ama mopaꞌtampesye, elloña aꞌrroyonay Poechemer ñach rromosets yokop allowenakpay. Attho atarr morrentenya atthoña yapaꞌ yeñoteñ elloña atthekma esokmañenchaꞌ apaꞌyeney eꞌñe allempotheñ apoerrey ñamha Poechemer Cristo.

³³ Ñeñthey akrerr Yompor ñeñtheychaꞌ poechemer perr, amaꞌt eseshaꞌ moenenayeñ oꞌch otteñeꞌchenyetañ, tharraña ñeñthpaꞌ ama esoyeꞌ yenteñe yokop, tharroꞌmar Yomporpaꞌ oten eꞌñoꞌ pokteꞌ enteney. Amach errothenoth eseshaꞌ yetsaꞌtaterrayo yoꞌchñar,

³⁴ tharroꞌmar Cristo Jesúspaꞌ ña rromats yoꞌchñarekop, elloña ñaña tanterrtsa poꞌrromñoth, ñamha theꞌpaꞌ ña partsotapretenaya Pompor poꞌkowenroth; allotheñña ñapaꞌ eñorena yokop Pomporesho atthoch es eꞌñe aꞌpoktatennay.

³⁵ Atarr nanak morrentenya Cristo. Amaꞌt eseshapaꞌ amach errothenoth poerratampesyetoña attho nanak morrentenya Cristo. Ñamha amaꞌt errothenoꞌtsenya amach wañerroña attho nanak morrentenya Cristo. Amaꞌtchaꞌ añ yexhapoya moeroxhteñets, amaꞌtchaꞌ nanak llekëñtsoꞌtseney, amaꞌtchaꞌ ñerraꞌm esempo poeꞌmoñeꞌteñothetay kothareꞌtenyet, amaꞌtchaꞌ ñerraꞌm esempo yepalltaꞌyena ñeñthchaꞌ yerren, amaꞌtchaꞌ ñerraꞌm esempo yepalltaꞌyena ñeñthchaꞌ yechorrena, amaꞌt ñerraꞌm esempo amhchaꞌnoxhenoꞌtseney, amaꞌtchaꞌ ñamha allempoch moetsayet, amach errothenoth poerratampesyetoña attho nanak morrentenya Cristo.

³⁶ Atethchaꞌ perryetña ya esempo eꞌñe ateth anareth Yompor poꞌñoño ñeñth akellkaꞌwareth awathotheñ. All anwareth ñeñth attho poesheñarr ñeñth ameꞌñatseꞌthpaꞌ otaneꞌth Yompor, ñeñthpaꞌ eꞌñe ateth ot: Eꞌñe yameꞌñeñotheph phapaꞌ yellapeneꞌthchaꞌ eꞌñe awtsa yemtsanateꞌ ñeñth yeꞌmoñeꞌteneꞌ. Ñetpaꞌ eꞌñe amtsen entenyet eꞌñe ateth ñerraꞌm carnero ñeñth xhokmach aneñet allchaꞌ moetsanachet.

³⁷ Amaꞌt yemoeroxhetwawapaꞌ elloña nanakchaꞌ awamenkath perrey Cristo ñeñth nanak amorrentña yenten.

³⁸ Ñeñthoꞌmarña napaꞌ neñoteñ, ñeñthey ameꞌñenaya Cristo Jesús ñeñth Yepartseshar yepenpaꞌ amaꞌt errothenoꞌtsenya amach errothenoth wañerroña ñeñth attho nanak morrentenya Yompor. Amaꞌt allempoch yerroma, amaꞌt allempo ñamha yokrrenmeñpaꞌ xhokmachña morrentenya. Amaꞌt Yompor poꞌmhllañotheñnaneshar ñeñth wetsa poeꞌntañothpaꞌ amach errothenoth poerratampesyetoña ñeñth attho morrentenya. Amaꞌt ora allpon ñeñth amhchaꞌnoxhetyetsa, amaꞌt ñamha ora allpon ñeñth amhchaꞌtarethetyetsa arr patsropaꞌ ñetpaꞌxhoꞌña amach errothenoth poerratampesyetoña ñeñth attho Yomporpaꞌ nanak morrentenya. Amaꞌt ñeñthchaꞌ yewapoya theꞌ amaꞌt ñamha ñeñthchaꞌ yewapoya tsapathoneth, ñeñthpaꞌxhoꞌña amach errothenoth aꞌwañampesyetoña attho Yomporpaꞌ atarr morrentenya.

³⁹ Amaꞌt errponenapharen yetwanena atarr eno, amapaꞌ ñamha oꞌpono patso amaꞌt ñamha oño oꞌpono, allpaꞌxhoꞌña amach errothenoth yesaꞌnmoña attho Yomporpaꞌ nanak morrentenya. Amaꞌt ora allpon ñeñth yexhkatwa Yompor añe patsropaꞌ ñetpaꞌxhoꞌña amach errothenoth aꞌwañampesyetoña ñeñth attho nanak morrentenya Yompor, alloweney ñeñthey ameꞌñenaya Poechemer ñeñth Cristo Jesús ñeñth Yepartseshar yepen.