Romanos 7 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho oꞌwañ amhchaꞌnoxhtanaꞌtenya añ ñoñets ñeñth ateth anareth awath Moiséseshoth

¹ Theꞌpaꞌ oꞌch masheñneshachaꞌ ñamha noxhaneshachaꞌ netmaꞌntatasa poꞌpoñ kothaphñats. Ñewa, sapaꞌ oꞌ eꞌñe señotweñ ateth pena ñoñets ñeñth ateth anareth arr patsro ñeñthchaꞌ ateth yepena. Sapaꞌ señoten añ ñoñetspaꞌ sherben tharrempowach allempo yokrrena añe patsro. Tharraña ñerraꞌm esempo yerromapaꞌ añ ñoñetspaꞌ amach errothenoth alloꞌna yameꞌñaꞌneño. Oꞌwañchaꞌ yameꞌñeña.

^2-3 Ateth ñerraꞌmrratheꞌ ñeñth oteney patherr ñoñets ñeñth ateth anareth. Ñeñthpaꞌ ateth oteney: Koyaneshaꞌ arrollareꞌtañpaꞌ amach satstano poerrollar allempo korrena añe patsro. Ñamha ñerraꞌm allempo korrena poerrollar, ñerraꞌm oꞌch yorer poꞌpsheñeñ ñeñthchaꞌ poerrollar perrpaꞌ ñeñthpaꞌ ama pokteyaye tharroꞌmar ñeñthpaꞌ oꞌchñaꞌtampeñets enteñ Yompor. Tharraña ñerraꞌm esempoch rromapes poerrollarpaꞌ allempoñapaꞌ oꞌwañchaꞌ ameꞌñatacha añ ñoñets ñeñth ateth anareth poerrollarekop. Ñamha ñerraꞌm allempo yorer poꞌpsheñeñ ñeñthchaꞌ poerrollar perrpaꞌ allempo ñeñthpaꞌ eꞌñe pokteꞌ tharroꞌmar allempo, ñeñthpaꞌ ama oꞌchñaꞌtampeñtsoyeꞌ enteñe Yompor.

⁴ Ñeñthoꞌmarña oꞌch, masheñnesha ñamha noxhanesha, notas, yapaꞌxhoꞌña oꞌwañchaꞌ amhchaꞌnoxhtanaꞌtenya añ ñoñets ñeñth ateth anareth awath Moiséseshoth, tharroꞌmar ñeñthey oꞌ yameꞌñerrapaꞌ oꞌ yerromapretera Cristo. Ñeñthoꞌmarña theꞌpaꞌ eꞌñe pokteꞌ oꞌch yoꞌpatera poꞌpsheñeñ. Ñamha ñeñth oꞌ yoꞌpaterra theꞌ, ñeñthpaꞌ Cristo ñeñthara ñeñth tanterrtsa rromoth. Allochñapaꞌ atthoch yorrtatyen ñeñth eꞌñe kowen ateth moenen Yompor.

⁵ Tharroꞌmar awath allempo eꞌñe yañeña yokthaphña ora yokthenpaꞌ amaꞌt yeñoteneñ añ ñoñets ñeñth ateth anarethpaꞌ atthera moenateney oꞌch alloꞌna tarwasatneney yoꞌchñar. Atthoña allach xhapaterryeñ rromoeñtso atthoch eꞌñe yechenkaꞌwerrañ.

⁶ Tharraña theꞌpaꞌ eꞌñe yerromapreteñoth Cristo añ ñoñets ñeñth ateth anarethpaꞌ oꞌwañ amhchaꞌnoxhtanaꞌtenya ateth ñerraꞌm awath. Ñeñthoꞌmarña theꞌpaꞌ eꞌñe kowen yokrrena Yomporekop. Theꞌpaꞌ ama añekpayaye ñeñth ateth yepeꞌth awath atthoch eꞌñe yaꞌmoeroxhtameꞌteñoth yetsotatwañ ñeñth ateth otyeꞌth ñoñets ñeñth ateth anareth. Añekopña yokrrena eꞌñe kowen Yomporekop tharroꞌmar theꞌ Parets Poekamkëñpaꞌ oꞌ etserrataterrnay yokthaphña.

Attho yoꞌchñarpaꞌ atarr mopaꞌteney; amach moenatenye oꞌch ateth yephowa ñeñth ateth oteney ñoñets ñeñth ateth anareth

⁷ Ñewa, ñatoꞌ sapaꞌ xhatheꞌ sotenapañ napaꞌ notenestheꞌ Yompor poꞌñoñ ñeñth ateth anarethpaꞌ ñeñthpaꞌ amatheꞌ kowenayaye. Tharraña ñeñthpaꞌ ama attheyeꞌ notenso amaꞌt mamesha. Ateth napaꞌ ñerraꞌm ama eñallñeña añ ñoñets ñeñth ateth anareth, napaꞌ amatheꞌ xhaponañeña neyoxhro ñeñth ama pokteyeꞌ enteno Yompor. Ateth ñerraꞌm ama eñallñeña añ ñoñets ñeñth yoteneꞌ “amach yeyeꞌchapretannaꞌtatsto”, napaꞌ amatheꞌ xhaponañeña neyoxhro ñeñth ama pokteyeꞌ enteno Yompor ñerraꞌm esempo es yeyeꞌchapretannena.

⁸ Tharraña allempo xhapona neyoxhro poꞌñoxh ateth oteney ñoñets ñeñth ateth anareth ama es ayeꞌchapretannaꞌtpawo, noꞌchñar ñeñth neyoxhroꞌtsenpaꞌ elloña nanakchaꞌ es yeꞌchatseꞌtatyenen. Ñerraꞌm ama neñotenñe añ ñoñets ñeñth yoteneꞌ ama es ayeꞌchapretannaꞌtpawo, ñerraꞌmañpaꞌ amatheꞌ neñotenñe ñeñth ateth neyeꞌchapreteña poꞌpsheñeñ ñeñthpaꞌ ñeñthña poꞌñoxh noꞌchñar entapretenen Yompor.

⁹ Awath napaꞌ allempo ama neñotenaꞌ ñoñets ñeñth ateth anareth, nañapaꞌ nanak kosheñtsoꞌtsennoñ allempo. Tharraña allempoña neñoter ñeñth ateth oteney ñeñthchaꞌ ateth yepha kowen ñamha ñeñth ama ateth aphapawopaꞌ allempotheñña napaꞌ neñotena poꞌñoxhpaꞌ shonteꞌ noꞌchñar ñeñth neyoxhroꞌtsen. Allempotheñña napaꞌ atarr nellkërra nanak. Neñoteñ aña noꞌpatenaya rromoeñets ñeñthara koñcheñets.

¹⁰ Ñamha añ ñeñthara ñoñets ñeñth ateth anareth alloꞌch yokrrenañ eꞌñe kowenpaꞌ tharraña arepaꞌt attheyaye, naña noꞌchñar allo nathpareꞌten ñoñets ñeñth ateth anareth ñeñthach nanmayeñ rromoeñtso.

^11-12 Tharroꞌmar allempotheñ neñoterr añ ñoñets ñeñth ateth anarethpaꞌ noꞌchñar ñeñth neyoxhroꞌtsenpaꞌ elloña nanak kothapeꞌchatseꞌtatenen sosey. Amaꞌt nanak koweneñ Parets poꞌñoñ ñeñth ateth anaretheñ, ñamha ateth oteney Parets ñeñthchaꞌ ateth yephaꞌ kowen, ñamha ñeñthchaꞌ ama ateth aphapawoyaye, ñeñthpaꞌ eꞌñe kowen, pokteñ. Tharraña na noꞌchñarpaꞌ ama moenatenno oꞌch kowen es nephaꞌ, ñeñthpaꞌ atthepaꞌt shekaꞌneꞌth. Napaꞌ ama erroth nepeno, neñoteñ aña noꞌpatenaya rromoeñets ñeñthara koñcheñets.

¹³ Theꞌña sapaꞌ xhatheꞌ sotenapañ añ ñoñets ñeñth eꞌñe otets kowenpaꞌ ñeñthepaꞌtña yoꞌpatatenaya rromoeñets. Tharraña ñeñthpaꞌ ama attheyaye. Añña ñeñth yoꞌpatatenaya rromoeñets, ñeñthpaꞌ yoꞌchñar. Ñamha Yompor poꞌñoñ ñeñth ateth anareth ñeñth eꞌñe kowenpaꞌ ñeñthña oꞌ aꞌpotherrnay yoꞌchñar. Atthochña yeñoterr yoꞌchñarpaꞌ nanak sosey entapreteney Yompor.

Attho eñall epa ñeñth womenk yepeneꞌ yeyoxhro

¹⁴ Yapaꞌ yeñoteñ añ ñoñets ñeñth ateth anarethpaꞌ Partseshoth eꞌñe kowen anaretheñ, tharraña ateth ñerraꞌm napaꞌ arromñathotha ateth nepena, xhokmach nephatseꞌtyen ñeñth ama kowenayeꞌ enteno Yompor. Eꞌñe ateth nepena ñerraꞌmrratheꞌ aña netarwasateneꞌ noꞌchñar.

¹⁵ Ama neñoteñe esoꞌmartheꞌña ateth nepena, tharroꞌmar amaꞌt ñeñthchaꞌ ateth oꞌ nephowapaꞌ amaꞌt napaꞌ amach eꞌñe pokteyeꞌ nenteñe. Tharroꞌmar amaꞌt nemneñeñ añtheꞌ ateth nephowa ñeñth eꞌñe kowen enten Yompor, tharraña arepaꞌtña attheyeꞌ nepeno. Añepaꞌt ateth nepen ñeñth ama nemnenñe, ñeñth poꞌñoxh ama kowenayeꞌ enteno Yompor.

¹⁶ Ñamha esempo oꞌch nephowa ñeñth ama kowenayaye, ñeñth amaꞌt napaꞌ ama nemnenñe, nañapaꞌ neñoteñ atthothña oꞌ nathpareꞌtwa ñoñets ñeñth ateth anareth ñeñth eꞌñe kowen.

¹⁷ Ñeñthoꞌmarña neñoteñ ñerraꞌm esempo oꞌ ateth nephowa ñeñth amaꞌt napaꞌ netsenaꞌten, ñeñthpaꞌ neñoteñ ama eꞌñe nayeꞌ ateth petso. Añña ateth nephateneꞌ noꞌchñar ñeñth alloꞌtsenara neyoxhro.

¹⁸ Napaꞌ neñotena eꞌñe attha eñalletñan, neyoxhroñapaꞌ ama eñalle atthoch kowen enten Yompor, amaꞌt koñeꞌtha. Amaꞌt nemneñeñ oꞌch ateth nephañ ñeñth eꞌñe kowen enten Yompor, tharraña ama erroth nepeñe ateth phatsa ñeñth ateth kowentetsa.

¹⁹ Ñeñth ateth nepenapaꞌ amaꞌt napaꞌ ama pokteyeꞌ nenteñe. Tharroꞌmar amaꞌt nemneñeñ oꞌtheꞌ ateth nephowa ñeñth eꞌñe kowen enten Yompor, tharraña arepaꞌtña attheyeꞌ nepeno. Añach ateth nepena ñeñth ama nemnenñe ñeñth poꞌñoxhpaꞌ ama kowenayeꞌ enteno Yompor.

²⁰ Ñeñthoꞌmarña neñoteñ, ñerraꞌm esempo oꞌ ateth nephowa ñeñth amaꞌt napaꞌ ama nemnenñe, ñeñthpaꞌ neñoteñ ama eꞌñe nayeꞌ ateth petso. Añña ateth nephateneꞌ noꞌchñar ñeñth alloꞌtsenara neyoxhro.

²¹ Ñeñthoꞌmarña theꞌpaꞌ neñotena ñerraꞌm esempo yemneñeñ oꞌtheꞌ ateth yephañ ñeñth eꞌñe kowen enten Yompor, tharraña yoꞌchñar ñeñth yeyoxhroꞌtsenpaꞌ xhokmach kothapeꞌchateney ñeñth ama kowenayeꞌ enteno Yompor.

²² Tharraña attho Yompor oꞌ kothapeꞌchaterrey kowen yeyoxhropaꞌ ñeñthpaꞌ alloch eꞌñe yoksheññaña poꞌñoñ.

²³ Tharraña amaꞌt atethpaꞌ yapaꞌ yeñotena eñall poꞌpoñ ñeñth womenk yepeneꞌ yeyoxhro ñeñth xhokmach eꞌmoñeꞌtenan ñeñth ateth yokthapeꞌchen kowen Yomporekop. Ñamha yoꞌchñar ñeñth womenk yepeneꞌ yeyoxhropaꞌ ñeñthña nanak mopaꞌteneꞌ yechets.

²⁴ ¡Ee-say! Nanak llekëñtsoꞌtseney ya. Eseshaꞌwachkaꞌ yaꞌwañamperreꞌtheꞌ yoꞌchñar ñeñth nanak yemoeroxhtateneꞌ ñeñthchaꞌ yanerreꞌtheꞌ rromoeñtso.

²⁵ Nanak neparasyosoꞌteñ Yompor tharroꞌmar neñoteññañ Poechemer ñeñth Yepartseshar Jesucristo ñepaꞌtña eꞌñe yaꞌwañamperreꞌ yoꞌchñar. Ñeñthoꞌmarña eꞌñe yeyoxhropaꞌ yemneñeñ oꞌch yokthapeꞌcherrñañeñ Yompor poꞌñoñ, tharraña yoꞌchñarñapaꞌ ñeñthaña xhokmach yetarwasateneꞌ eꞌñe yechtso.