Romanos 6 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho ñeñth tomaꞌntena allempo yapatarethta Cristokop

¹ Theꞌpaꞌ eꞌñe yeñoteñ amaꞌt ateth yephatseꞌtyeseꞌth ñeñth ama kowenayaye, Yomporpaꞌ elloña nanak moererrya, attho peretnaꞌwerrnay yoꞌchñar. Tharraña amaꞌt attheñpaꞌ amach yotaphsaꞌtatsto “ñeñthepñapaꞌ oꞌch alloꞌna yephatseꞌtyesnena ñeñth sosyaꞌtsañ tharroꞌmar Yomporpaꞌ nankëpaꞌt moerenana ñeñth phatseꞌtyeneꞌ ñeñth ama kowenayaye ñamha ellopaꞌ oꞌchxhoꞌ alla moererrya.”

² Tharraña amach errothenoth alloꞌna yeseno phatseꞌtyesnomoeꞌ ñeñth ama kowenayaye tharroꞌmar oꞌ yaꞌypoꞌñerr yoꞌchñar allempotheñ oꞌ yagër Cristo.

³ Amaꞌt señoteñeña ñeñth tomaꞌntena allempo yapatarethta Cristokop. Añ tomaꞌntena attho oꞌ yeparrokmaterr epay Cristo, ateth ñerraꞌmrratheꞌ xho yerromapreteña Cristo alloweney ñeñthey apatarethtetsa eꞌñe yameꞌñeñoth Cristo Jesús.

⁴ Allempo yapatarethtapaꞌ eꞌñe ateth ñerraꞌmrratheꞌ xho yerromapreteña Cristo ñamha ateth ñerraꞌm xho yepampapreteña Cristo. Allempoña Yomporpaꞌ awoꞌt tantaterran Poechemer eꞌñe poꞌwamenkoth ñeñth atarr kowen, yapaꞌxhoꞌña ñeñthara poꞌwamenkarothña eꞌñe kowen oꞌ etserrataterrnay yokthaphña, ñeñthchaꞌ ateth yokrrena.

⁵ Tharroꞌmar eꞌñe yeparrokmateñoth epay Cristo oꞌ yerromaprecha. (Atthochña yaꞌypoꞌñerr ñeñth ama kowenayeꞌ entapretenye Cristo.) Ñamha ñerraꞌm yerromapreteña Cristo yeñoteñ oꞌ yetantapretera atthochña yokrrerra eꞌñe kowen ñokop.

⁶ Tharroꞌmar yeñoteñ ñeñthey acheñey ñeñth yeyoxhroꞌtsen ñeñth yokthapeꞌchatayeꞌth sosyaꞌtsañ awath ñeñthpaꞌ oꞌ aꞌmchechatarethetwerra ateth ñerraꞌmrratheꞌ akorsoꞌtamphsarethta epoet Cristo. Atthochña oꞌwañchaꞌ kothapeꞌchatseꞌtatneney yoꞌchñarañeña. Amach alloꞌna tarwasatnenye yoꞌchñar.

⁷ Ñatoꞌ oꞌch yetmaꞌntacha ateth pena arromñath. Ñewa, yapaꞌ yeñoteñ ñerraꞌm eseshaꞌ rromatspaꞌ amach errothenoth alloꞌna kothapeꞌchyesnenano sosyaꞌtsañ. Yapaꞌxhoꞌña atethchaꞌ yentena ñerraꞌmrratheꞌ xho yerromoen, amach errothenoth alloꞌna yokthapeꞌchyesneno ñeñth sosyaꞌtsañ enten Yompor.

⁸ Ñamha attho oꞌ yerromaprecha Cristo, yapaꞌ yeñoteñ ñamha eꞌñe yeparrokmateñoth Cristopaꞌ alloña korretsayach, ateth pena ñapaꞌ eꞌñe korretsa.

⁹ Tharroꞌmar yapaꞌ yeñoteñ Cristopaꞌ oꞌ tanterra poꞌrromñoth, amach alla rromoerreꞌthe. Amach errothenoth alla oꞌpatereꞌthe rromoeñets.

¹⁰ Tharroꞌmar ñapaꞌ attho rroma yoꞌchñarekoppaꞌ ñeñthpaꞌ eꞌñe parrocha rroma amaꞌt allowenakop. Ñamha attho korrena theꞌ ñeñthpaꞌ eꞌñe ora Pomporekpa.

¹¹ Yapaꞌxhoꞌña atthekmoepaꞌch yentena yamha yañeña. Eꞌñe yerromapreteñoth Cristo Jesúspaꞌ oꞌch yaꞌypoꞌñerr yoꞌchñar ñeñthoꞌmarña amach errothenoth alla tarwasaterryerro yoꞌchñar. Ñamha theꞌpaꞌ eꞌñe yeparrokmateñoth Yepartseshar Cristopaꞌ oꞌch yokrraprecha eꞌñe kowen Yomporekop.

Atthoch amach semnatatsche soꞌchñar oꞌch alla tarwasaterrnaserr saꞌrromñathechets

¹² Ñeñthoꞌmarña theꞌpaꞌ oꞌch notas, amach semnatatsche soꞌchñarpaꞌ oꞌch alla tarwasaterrnaserr saꞌrromñathechets. Allochñapaꞌ amach alloꞌna sephatseꞌtyesneno ñeñth ateth moenatseꞌtatyenes sechets.

¹³ Amach semnatatsche sechets oꞌch aña thorrena ñeñth ama kowenayeꞌ enteno Yompor. Añchaꞌña oꞌch sapwer Yompor sechets allochñapaꞌ ñachña thorratenaya añekop ñeñth eꞌñe kowen enten ña. Ñatoꞌ oꞌch yetmaꞌntacha ateth ñerraꞌmrratheꞌ xho yerromoen tharraña theꞌpaꞌ oꞌch alla yokrrerra kowen Yomporekop.

¹⁴ Tharroꞌmar theꞌpaꞌ amach errothenoth alloꞌna tarwasatnenye yoꞌchñar, tharroꞌmar theꞌpaꞌ añ yeyemtena Yompor attho moerenyapaꞌ awoꞌt aꞌpoktatonay yoꞌchñar. Ama añeyeꞌ yeyemteno ñoñets ñeñth ateth anareth ñeñthchaꞌ ateth yephowa eshekchaꞌ kowen enteney Yompor.

¹⁵ Theꞌpaꞌ yeñoteñ ama añeyeꞌ yeyemteno ñoñets ñeñth ateth anareth. Añña yeyemtena Yompor poemoereñoth eꞌñe yenpoeney. Tharraña amaꞌt attheñpaꞌ ama pokteyaye oꞌch alloꞌna yesen phatseꞌtyerrayerr ñeñth ama kowenayeꞌ enteno Yompor amaꞌt mamesha.

¹⁶ Ñatoꞌ oꞌch yetmaꞌntacha ateth. Ñewa, yapaꞌ yeñoteñ ñerraꞌm eseshaꞌ yemnen ñeñthchaꞌ yetarwasateneꞌ añe patsro, ñeñthpaꞌ poꞌñoxh ñeñthchaꞌ yepatronar yepen, ñamha eꞌñech pawner yentatena atthochña ñeñthach yameꞌñena ñeñth yepatronar yepen. Ñamha atthekmach yepena ñerraꞌm añ yemnen yoꞌchñarach yetarwasateneꞌ, tharraña ñerraꞌm añ yetarwasateneꞌ yoꞌchñarpaꞌ ñeñthpaꞌ tsaꞌtaterryach rromoeñtso ñeñthara koñcheñtso. Tharraña ñerraꞌm añ yameꞌñena Yompor ñeñth ateth oteney poꞌñoñoth, ñeñthpaꞌ alloch yorrtatyen eꞌñe kowen ñeñth eꞌñe ateth moenen ña.

¹⁷ Ñamha sapaꞌ awathpaꞌ aña setarwasatayeꞌth soꞌchñar, tharraña theꞌñapaꞌ eꞌñe seyoxhrokmañen oꞌ sameꞌñera ora ñeñth ateth pena Yompor paꞌpotheñ ñeñthara ñeñth serrpareꞌtataseteꞌth. Ñeñthoꞌmarña theꞌpaꞌ napaꞌ atarr nokshena, atarr neparasyosoꞌteñ Yompor sokop.

¹⁸ Ñamha theꞌpaꞌ oꞌwañchaꞌ tarwasaterrserr soꞌchñar. Añchaꞌña setarwasaterreꞌ Yompor erraꞌtsentheꞌ moenen ña.

¹⁹ Ñewa, Yompor pokthaphñothpaꞌ ateth netmaꞌntatensa attho yokrrena acheñey arr patsro allochñapaꞌ kowenchaꞌ xhaponasa seyoxhro Yompor pokthaphña. Ñeñth notenes poꞌñoxhpaꞌ ñeñthpaꞌ ateth sepeꞌth awath eꞌñe pokteꞌ senteꞌth eꞌñe ora sechtsowen alloꞌna seteꞌth phatseꞌtnomoeꞌ sosyaꞌtsañ ñeñth ama kowenayeꞌ enteno Yompor. Theꞌpaꞌxhoꞌña atthekmoepaꞌch eꞌñe pokteꞌ senteñ ora sechtsowen oꞌch sepomoerra Yomporekop, allochñapaꞌ atthoch saꞌkowentatarethterra eꞌñe kowen Partsokop ñeñth eꞌñe ateth moenen ña.

²⁰ Ñewa, awath allempo aña setarwasatayeꞌth soꞌchñarpaꞌ ama añeyeꞌ sokthapeꞌcheꞌthe ñeñth eꞌñe kowen enten Yompor.

²¹ Tharraña ñeñth ateth sephatseꞌtyeseꞌth sosyaꞌtsañ awathpaꞌ ama es sherbhaseꞌthe amaꞌt mamesha, ñeñthara amaꞌt theꞌpaꞌ penknaꞌntatenes. Yapaꞌ yeñoteñ ñeñthpaꞌ allach tsaꞌtaterryañ rromoeñtso, ñeñthara koñcheñtso.

²² Tharraña theꞌpaꞌ oꞌwañchaꞌ alla tarwasaterryerr yoꞌchñar. Añchaꞌña yethorrateneꞌ Yompor poꞌtarwas atthoch yesherbeñ. Allochñapaꞌ ñach yetsaꞌtenaya alloch yaꞌkowentatarethterra eꞌñe kowen ñokop añe patsro. Allochñapaꞌ atthochña apwerrey allochña yapaꞌ korretsayach yoksheñeshokmañen thayotheñ errponañowen.

²³ Tharroꞌmar yoꞌchñarpaꞌ allach tsaꞌtaterrya rromoeñtso, ñeñthara koñcheñtso. Tharraña eꞌñe yeparrokmateñoth epay Yepartseshar Cristo Jesúspaꞌ Yomporñapaꞌ apwerreychaꞌ eꞌñe attha allochña yapaꞌ korretsayach yoksheñeshokmañen thayotheñ errponañowen.