Romanos 5 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho eꞌñe yeyemteñoth Yompor, eꞌñech pokteꞌ enteney, atarrchaꞌ kosheñtsoꞌtseney

¹ Ñeñthoꞌmarña theꞌpaꞌ yeñoteñ eꞌñe yeyemteñotha Jesucristo, Yomporñapaꞌ eꞌñe pokteꞌ enteney, oꞌwañchaꞌ yoroxhenoꞌtseney Yomporeshoth, tharroꞌmar Yepartseshar Jesucristopaꞌ awoꞌt aꞌpoktatwerrnay yoꞌchñar Yomporesho.

² Eꞌñe atthothña Cristopaꞌ xhapaterrey Yompor poemoereño atthoch xhokma bensareꞌtampeney; ñeñthpaꞌ eꞌñe yeyemteñoth Cristo. Ñamha yapaꞌ eꞌñech yoksheñeshaꞌ yekweñ esempowañenchaꞌ eꞌñe poktakma yekowentapretera Yompor.

³ Ñamha amaꞌt yemoeroxhteñoth oꞌch yokshena tharroꞌmar yeñoteñ eꞌñe yemoeroxhteñothpaꞌ allempoña yokthapeꞌchen atthoch awamenkath phaꞌy Yompor atthochña yaꞌwanten allowen ñeñth echarr yentyen.

⁴ Ñamha atthoña yaꞌwanten allowen ñeñth echarr yentyenpaꞌ yapaꞌ yeñoteñ Yomporñapaꞌ eꞌñech kowen entwerrey. Ñamha ñerraꞌm yeñoteñ Yomporpaꞌ eꞌñe kowen enterrey, yapaꞌ eꞌñe yeyemteñoth oꞌch yekwerr ñeñth oꞌpatatenya Yompor.

⁵ Ñamha eꞌñe yekweñoth ñeñth oꞌpatatenya Yompor ñapaꞌ xhokmach aꞌpoktatenan poꞌñoñ ñeñth ateth oten yokop. Yapaꞌ amaꞌt esempapaꞌ amach es yeꞌnaterrayeꞌthe poꞌpoñ, tharroꞌmar Yomporpaꞌ awoꞌt apoey Poekamkëñ ñeñthchaꞌ yexhetsa yeyoxhro ñeñthchaꞌña yeñotateneꞌ attho Yomporpaꞌ nanak morrentenya.

⁶ Yapaꞌ yeñoteñ nanak morrentenya Yompor tharroꞌmar awathpaꞌ ama es yokthapeꞌchpeno amaꞌt mamesha Yomporekop atthoch yekeshperrañ. Tharraña Yomporñapaꞌ eꞌñe allempokmapaꞌ awoꞌt moeñan Poechemer Cristo añe patsro ñeñthchaꞌ rromosets eꞌñe yokop ñeñthey ama es kothapeꞌchetso kowen amaꞌt mamesha Yomporekop.

⁷ Ñewa, yapaꞌ arromñatheypaꞌ yeñoteñ atarr thorrapoꞌ atthoch yerroma poꞌpsheññekop, amaꞌt añ acheñrekop ñeñth atarr kowen. Tharraña errothenopaꞌ ama tama thorrapawoyeꞌ yenteno oꞌch yerroma añ acheñrekop ñeñth atarr amoeraña.

⁸ Tharraña yapaꞌ amaꞌt allempo ora yephatseꞌtyen sosyaꞌtsañpaꞌ eꞌñe allempokmaña Cristopaꞌ awoꞌt rroma yokop. Atthoña Yomporpaꞌ eñotaterrey yapaꞌ nanak morrentenya.

⁹ Ñeñthoꞌmarña theꞌpaꞌ eꞌñe pokteꞌ enteney Yompor tharroꞌmar Cristopaꞌ awoꞌt rroma yokop. Elloña atthothña aꞌkeshphatey allochñapaꞌ amach aꞌkoñchataretheye amaꞌt errponaña.

¹⁰ Amaꞌt allempo ora yeꞌmoñeꞌteñ Yomporpaꞌ Poechemerña poꞌrromñothpaꞌ awoꞌt eꞌñe yamoꞌtstannerra epay Pompor. Elloña theꞌpaꞌ attho korrena Cristopaꞌ atthoña yapaꞌxhoꞌña aꞌkeshphaterreychaꞌ.

¹¹ Elloña theꞌpaꞌ eꞌñe yoksheña Yompor tharroꞌmar Poechemer ñeñthara Yepartseshar Jesucristopaꞌ awoꞌt amoꞌtstaterrya eꞌñe ña Pompor.

Attho yamoꞌmteꞌ Adánpaꞌ ñapaꞌ xha aꞌchenkatey; Yamoꞌmteꞌña Cristopaꞌ ñaña yaꞌkeshphaterreꞌ

¹² Awath poesheñarr yakma ñeñth paꞌsoꞌcheñ Adánpaꞌ awoꞌt orrtatan athpareꞌteñets añe patsro Yomporekop. Ñeñthoꞌmarña allempotheñ alloweney ñeñthey acheñeypaꞌ eꞌñe atthekma yephowa. Ñamha allempopaꞌ awoꞌt anarethta atthoch yoꞌchñarothpaꞌ oꞌch yerroma. Ñeñthoꞌmarña alloweney ñeñthey acheñeypaꞌ oꞌpatwaya rromoeñets tharroꞌmar alloweneypaꞌ ñeñtha yeñot ñeñth ateth pha ñanom yamoꞌmteꞌ Adán.

¹³ Ñamha allempotheñ korreꞌth Adán, acheñeneshaꞌ arr patsropaꞌ ñeñtha eñotet ñeñth ateth athpareꞌtan Adán Yompor. Tharraña allempopaꞌ ama eñalletenaꞌ ñoñets ñeñth ateth anareth alloch aꞌkoñchatarethterret.

¹⁴ Tharraña atthera oꞌpatenanet rromoeñets eꞌñe allempotheñ korreꞌth Adán ñeñtha atthera ñamha tharrempowa allempo korreꞌth ñamha Moisés ñeñth nawet ñoñets. Amaꞌt ama athpareꞌteññañeto Yompor poꞌñoñ eꞌñe ateth athpareꞌteꞌth Adán, tharraña atthera oꞌpatenanet rromoeñets. (Ñeñthoꞌmar yeñoteñ Adán poꞌchñarothpaꞌ awoꞌt anarethta atthoch oꞌpatwaya alloweney rromoeñets.) Ñeñthña yamoꞌmteꞌ Adánpaꞌ aña oꞌpatatwaya ñeñth ama kowenayaye, tharraña Yamoꞌmteꞌña Cristopaꞌ allempo wapapaꞌ ñapaꞌ añña oꞌpatatosya ñeñth eꞌñe kowenareꞌ.

¹⁵ Tharroꞌmar eꞌñe pathparñesharrmoroth Adánpaꞌ ama attheyaye ñerraꞌm ñeñth ateth atarr moerenya Cristo. Tharroꞌmar eꞌñe poesheñarra poꞌchñaroth oꞌpatya rromoeñets alloweney paꞌnamen acheñey. Tharraña elloñapaꞌ eñall poꞌpsheñeñ, ñeñthara Jesucristo ñeñth yemoererraya. Atthoña Yomporpaꞌ orrtatonay poemoereña yokop alloña nanak kowen es apatweney eꞌñe attha alloweney paꞌnamen ñeñthey acheñey.

¹⁶ Ñamha ñeñth ateth moererrya Yompor, ñeñthpaꞌ ama attheyaye ñerraꞌm ñeñth ateth oꞌpatwaya ochñarets amaꞌt eꞌñe poesheñarrotha. Tharroꞌmar ñeñth ateth pha Adán amaꞌt parrochapaꞌ ñeñthaña yoꞌpatatwenaya koñcheñets. Tharraña ñeñth ateth aꞌkeshphaterrey Yomporpaꞌ ñeñthpaꞌ ateth pha. Amaꞌt shonteñ yoꞌchñarpaꞌ ñañapaꞌ eꞌñech pokteꞌ enteney eꞌñe attha tharroꞌmar ñeñthpaꞌ oꞌ aꞌpoktatwonay Cristo.

¹⁷ Ñamha attho eꞌñe poesheñarrotha poꞌchñaroth oꞌpatenya rromoeñets, tharraña elloña nanak moererrya Yompor atthothña aꞌrroyerrnay Poechemer ñeñthara Jesucristo ñeñth oꞌ aꞌpoktatwerrnay yoꞌchñar Yomporesho atthochña yapaꞌ korretsayach.

¹⁸ Ñeñthoꞌmarña yeñoteñ attho eꞌñe poesheñarrotha poꞌchñaroth awoꞌt oꞌpatatyet koñcheñets, atthekma ñamha poesheñarr ñeñth Jesucristopaꞌ awoꞌt phowa ñeñth eꞌñe kowen, alloña aꞌpoktaterrey, atthochña yapaꞌ korretsayach yoksheñeshokmañen thayotheñ errponowañen.

¹⁹ Attho eꞌñe poesheñarra ñeñth Adán ñeñth athpareꞌteneꞌ Yompor, ñeñthoꞌmarña ñesharrmoroth Yomporñapaꞌ eꞌñe ochñathocheꞌ entweney amaꞌt shonteꞌ paꞌnamenaꞌttsokmay ñeñthey acheñey. Tharraña poesheñarr ñeñth Cristo ñeñth eꞌñe kowen ameꞌñenaya Yompor, ñeñthñapaꞌ alloch eꞌñe pokteꞌ enteney Yompor, amaꞌt shontey paꞌnamenaꞌttsokmay ñeñthey acheñey.

²⁰ Ñamha allempo xhap allempoch anarethta ñoñets ñeñthchaꞌ eñotaterrawet ñeñthchaꞌ ateth pet ñamha ñeñthchaꞌ ama ateth aphapawo elloña allempopaꞌ ñetpaꞌ oꞌ eñoterret atarr athparñathterret. Tharraña amaꞌt attho nanak yathpareꞌtena elloña Yomporpaꞌ nanak moererrya.

²¹ Atthoña eꞌñe yephatseꞌtyeñoth ñeñth ama kowenayayepaꞌ awoꞌt anarethta rromoeñets ñeñthchaꞌ yoꞌpatenaya ñeñthñapaꞌ koñcheñets. Tharraña elloña Jesucristo ñeñth Yepartseshar yepen awoꞌt orrtatonay attho Yomporpaꞌ nanak moererrya atthoña aꞌpoktatwerrnay yoꞌchñar. Atthochña yapaꞌ korretsayach yoksheñeshokmañen thayotheñ errponowañen.