Romanos 4 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Yompor awathpaꞌ eꞌñe pokteꞌ entaneꞌth Abraham

^1-2 Ñewa, theꞌpaꞌ oꞌch neyerpatasa ñeñth ateth peꞌth awath yatañ Abraham. Ñapaꞌ ama añotheyeꞌ pokteꞌ eñcheꞌtheña Yompor eꞌñe ñañeña poetsotateñoth ñeñth kowen enteꞌth ña. Ñeñthoꞌmar yatañ Abrahampaꞌ ama eñalle amaꞌt mamesha atthoch ommoꞌchena amaꞌt Yomporesho.

³ Tharroꞌmar yeñoteñ ñeñth ateth oten Yompor poꞌñoñ ñeñth akellkaꞌwareth awathotheñ. Ñeñthpaꞌ ateth oten: “Abrahampaꞌ eꞌñe attha yemtaneꞌth ñeñth ateth ocheꞌth Yompor, ñeñthoꞌmar allempotheñña Yomporpaꞌ eꞌñe pokteꞌ eñcheꞌth eꞌñe attha.”

^4-5 Ñeñthoꞌmarña yeñoteñ yapaꞌxhoꞌña ama añotheyeꞌ eꞌñe pokteꞌ entenye Yompor eꞌñe yethorreñoth ñeñth kowen yenten yañeña. Añothchaꞌña eꞌñech pokteꞌ enteney Yompor eꞌñe attha, ñerraꞌm esempo yapaꞌ oꞌch eꞌñe yeyemtera ñeñth ateth oteney; allochñapaꞌ atthoch eꞌñech pokteꞌ entweney ya ñeñthey ochñathey. Tharroꞌmar eꞌñe pokteꞌ enteney eꞌñe attha, ama es yethorreñotheyeꞌ ñeñth kowen yenten yañeña. Ñewa, ñatoꞌ oꞌch yetmaꞌntacha ateth. Ñerraꞌm esempo yetarwasen yepatronaresho, ñerraꞌm allempoch tsaꞌtyet yetarwasothpaꞌ ama yoteno eꞌñe attha apoenyet kelle, yetarwasothña tsaꞌtenyet. Tharraña atthoch pokteꞌ enterrey Yomporpaꞌ ama attheyaye. Ñapaꞌ eꞌñe attha pokteꞌ enteney, ama eꞌñe ya yethorreñotheyeꞌ ñeñth kowen yenten ya atthoch pokteꞌ enteney Yompor.

⁶ Ñamha amaꞌt yatañ Davidpaꞌ ñeñthekpaña eñoseꞌth awath. Ñapaꞌ ateth oteꞌth nanak kosheñtsoꞌtseney ñeñthey eꞌñe pokteꞌ enteney Yompor eꞌñe attha, ñeñthpaꞌ ama añotheyaye oꞌch es kowen yephaꞌyes eꞌñe yañeña.

⁷ Ñeñthpaꞌ ateth oteꞌth David: Nanak kosheñtsoꞌtseney ñeñthey oꞌ aphretnaꞌwarethterra yoꞌchñar, ñeñthey amach alloꞌna yerpoerrnayeꞌthe Yompor yoꞌchñar.

⁸ Ñamha nanak kosheñtsoꞌtseney ñeñthey Yomporpaꞌ amach alloꞌna otteñeꞌchnenye yoꞌchñaroꞌmar. Arrpaꞌ allowa ñeñth ateth ot awath yatañ David.

⁹ Ñamha añ kosheñetspaꞌ yeñoteñ ama ñapthekpayaya ñeñth judioneshakop ñeñthara ñeñth atsorrarethneshaꞌ. Añekpaꞌnaña ñeñth ama judioneshayaye ñeñth ama atsorraretheyayeto. Ñewa, ñeñthpaꞌ atthothña yeñoteñ. Oꞌ notwanmas attho Abrahampaꞌ eꞌñe attha yemtaneꞌth ñeñth ateth ocheꞌth Yompor, ñeñthoꞌmarña Yomporpaꞌ eꞌñe pokteꞌ eñcheꞌth eꞌñe attha.

¹⁰ Ñewa, theꞌpaꞌ oꞌch yokthapeꞌch allempo Yomporpaꞌ eꞌñe pokteꞌ entaneꞌth Abrahampaꞌ allempo Abrahampaꞌ ama atsorrarethtenaꞌ, tharroꞌmar allempopaꞌ ama orrtenaꞌ attheñats.

¹¹ Tharraña elloñapaꞌ awoꞌt tsorratena Abraham; ñeñthpaꞌ ñeñthchaꞌ eñotaterrawet poꞌñoxh Yomporpaꞌ oꞌ pokteꞌ entenan Abraham eꞌñe poeyemteñotha, amaꞌt allempo ama atsorrarethtenaꞌ. Ñeñthoꞌmarña ateth pha awath atthoch pompor phoweret amaꞌt ñamha allowenet ñeñth ama atsorraretheyaye; tharraña amaꞌt ama atsorraretheyayeto, eꞌñe poeyemteñotheta Yomporpaꞌ eꞌñech pokteꞌ entenanet eꞌñe attha.

¹² Ñamha ñeñthoꞌmar ateth pha atthoch pompor phower allowen ñeñth atsorrareth, tharraña añach ñapoeth pompor perreꞌ ñeñth poꞌñoxh yemtenaya Yompor. Tharroꞌmar ama añekpayeꞌ pompor peñeto attho atsorrarethtenet, añekopña pompor peñet eꞌñe poeyemteñotheta Yompor ñeñth eꞌñe ateth peteꞌth pomporet Abraham, amaꞌt allempo ama atsorrarethtenaꞌ.

¹³ Yapaꞌ yeñoteñ awath Yomporpaꞌ awoꞌt otan Abraham oꞌch apoer errakmañen pats allowen poechemereshowen esempowañen. Ñamha ateth otan Yompor Abrahampaꞌ ama poetsotateñotheyeꞌ añ ñoñets ñeñth ateth anareth ocheña Yompor. Añña eꞌñe poeyemteñotha Yompor ateth och, tharroꞌmar Yomporpaꞌ eꞌñe pokteꞌ eñch.

¹⁴ Ñerraꞌm poꞌñoxh yetsotateñotha añ ñoñets ñeñth ateth anareth apwerryeñ añ patspaꞌ yapaꞌ eꞌñetheꞌ orrena yeyemteñañ Yompor; tharroꞌmar ñerraꞌm attheñpaꞌ Yomporpaꞌ amatheꞌ aꞌpoktatanñeña poꞌñoñ ñeñth ateth otan awath Abraham.

¹⁵ Ñamha ñerraꞌm añ yokthen añ ñoñets ñeñth ateth anarethpaꞌ nanakchaꞌ aꞌkoñchatarethey ñerraꞌm ama yetsotweno ora allpon ñoñets. Ñamha ñerraꞌm ama eñallñe añ ñoñets ñeñth ateth anarethpaꞌ amatheꞌ errothenoth koñchatyeto tharroꞌmar amatheꞌ eñallñe ñoñets ñeñthchaꞌ yaꞌpotheꞌ ñeñth ochñartsotets.

Atthoch aꞌnaterrya Yomporpaꞌ ñeñthpaꞌ eꞌñech yeyemteñotha ña

¹⁶ Ñeñthoꞌmarña yeñoteñ atthoch aꞌnaterrya Yompor ñeñth ateth otwawapaꞌ ñeñth poꞌñoxhpaꞌ eꞌñech yeyemteñotha ña atthochña eꞌñe poemoereñothey eꞌñech aꞌnatwerrya alloweney. Amach ñapthayaya judioneshaꞌ ñeñth kotheneꞌ añ ñoñtsor ñeñth ateth anareth, añekpaꞌnaña alloweney ñeñtheychaꞌ yemterraya Yompor eꞌñe atthekoptar ateth peꞌth awath yatañ Abraham. Tharroꞌmar ñapaꞌ poꞌñoxh yatañ yepeñ alloweney.

¹⁷ Amaꞌt Yompor poꞌñoño ñeñth ateth anwareth awathotheñpaꞌ all orrtena ñeñth ateth Yomporpaꞌ otan awath Abraham, ñeñthpaꞌ ateth ocheꞌth: “Shonteꞌ paꞌnamen acheñpaꞌ ñetñapaꞌ pomporchaꞌ phowerrpet. Añpaꞌ eꞌñe na ateth oꞌ nephonaph.” Ñeñthoꞌmar yeñoteñ Abraham eꞌñe poeyemteñoth Yomporpaꞌ ateth eñcheꞌth Yompor ñapaꞌ pomporchaꞌ per shonteꞌ paꞌnamen acheñ. Ñeñthñapaꞌ ñeñthara Yompor ñeñth nanak awamenkath ñeñth eñoteneꞌ oꞌch tantaterran amaꞌt ñeñth rromoets, ñamha ñeñth eñoteneꞌ eꞌñe poꞌñoñothpaꞌ oꞌch orrtatan amaꞌt ñeñth ama eñalle theꞌ.

^18-19 Allempo Yomporpaꞌ ateth otan Abraham “peshothpaꞌ merenach shonteꞌ paꞌnamen acheñ ñeñthchaꞌ phomporterraya” allempo Abrahampaꞌ oꞌ nanak poꞌnmeꞌten —xharroch xharraꞌ chartheꞌ echen. Tharraña Abrahampaꞌ amaꞌt eñotena oꞌ nanak poꞌnmeꞌten, oꞌ meten allempo atthoch chemereꞌten, ñamha poethapor Sarapaꞌxhoꞌña oꞌ nanak poꞌnmeꞌten, amatheꞌ errothenoth cheyoreꞌterro, tharraña Abrahampaꞌ ama kexhpoenano attho yemtenana ñeñth ateth otwe Yompor. Eꞌñe poeyemteñoth Yomporpaꞌ alloꞌna sen koweneꞌ Yompor oꞌch aph amaꞌt pathrra poechemer.

²⁰ Ama echarrteno poeyoxhro amaꞌt mamesha añekop ñeñth ateth oꞌ otwe Yompor. Alloꞌna sen yemoetnomaya Yompor ñeñth nanak awamenkath peneꞌ. Eꞌñe poeyemteñothan Yompor, ñapaꞌ xhokmach otaphsaꞌtyesaneteꞌth Yomporpaꞌ ñaptha atarr awamenkath.

²¹ Tharroꞌmar eñocheꞌth eꞌñe Yompor poꞌwamenkoth, poꞌñoxhpaꞌ oꞌch aph amaꞌt pathrra poechemer ñeñth ateth oꞌ otwe.

²² Ñeñthoꞌmarña Abraham eꞌñe poeyemteñothan Yompor Yomporñapaꞌ eꞌñe pokteꞌ eñcheꞌth.

²³ Tharraña añ ñoñetspaꞌ ama ñapthekpayaye Abrahamakop anarethe.

^24-25 Yokpaꞌnaña anarethteꞌth alloweney ñeñthey yemtenaya Yompor, attho ñapaꞌ aꞌrroyonay Poechemer ñeñth Jesús ñeñthchaꞌ rromats eꞌñe ya yoꞌchñarekop, ñeñthara Jesús ñeñth Yepartseshar yepen, ñamha attho Yomporpaꞌ tantaterran Poechemer poꞌrromñoth, atthoch yeñoch yoꞌchñarpaꞌ oꞌ eꞌñe atsaꞌtarethetwa. Ñeñthoꞌmarña theꞌpaꞌ eꞌñe yeyemteñoth Yompor ñeñth attho aꞌpoktatonay, yapaꞌxhoꞌña eꞌñech pokteꞌ enteney yamha.