Romanos 3 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Theꞌña sapaꞌ xhatheꞌ sotenapañ judioneshaꞌpaꞌ amatheꞌ atarr sherbeno amapaꞌ xhatheꞌ sotenapañ ñeñth attho tsorrannenetpaꞌ amatheꞌ es sherbeno. Tharraña ñeñthpaꞌ ama attheyaye. Poꞌñoxhkaꞌye atarr sherbhaꞌyen judioneshaꞌ.

² Ñewa, oꞌch yot ñanom ñeñth attho sherbenet. Ñetña aparethet Yompor poꞌñoñ ñanom attho ñetchaꞌ aꞌpothenet ñeñthara ñoñets.

^3-4 Tharraña ama allowenakmayeꞌ ameꞌñeneto ñeñth ateth oteney Yompor poꞌñoñoth. Tharraña amaꞌt ateth phowanenetpaꞌ amatheꞌ errothenoth aꞌpsateretoña Yompor ñeñth ateth oteney poꞌñoñoth, amaꞌt mamesha. Ñapaꞌ xhokmach aꞌpoktatwonay poꞌñoñ ñeñth ateth oꞌ otweney. Amaꞌt allowen erraꞌtsen acheñerpaꞌ amaꞌtchaꞌ ama aꞌpoktatweneto ñeñth ateth eñorenetpaꞌ tharraña señochepaꞌch, Yompora eꞌñe ñaptha, ama poenesho poꞌñoñ. Amaꞌt ateth oteney Yompor poꞌñoñ ñeñth ateth akellkaꞌwareth awathotheñ, ñeñthpaꞌ all ateth oteney: Allowen acheñeneshaꞌpaꞌ eñotetepaꞌña attho Yomporpaꞌ ama poenesho poꞌñoñ, ñamha ñerraꞌm eseshaꞌ attha otatseꞌtyets attho Yomporpaꞌ añoꞌ pokteyeꞌ es peno, tharraña eñochetepaꞌña Yomporña eꞌñe pokteꞌ es pets.

⁵ Ñeñthoꞌmar napaꞌ oꞌch notas, eꞌñe ya yepeñoth ñeñth ama kowenayaye, atthoña yorrtateññañ Yompor ñapaꞌ ñaña eꞌñe kowenareꞌ es phaꞌyets. Ñewa, ñerraꞌm yoꞌchñaroth ateth yeyenpapreteñ Yompor orrtateꞌ poꞌkowenñapaꞌ sañapaꞌ xhatheꞌ sotenapañ, Yomporpaꞌ amatheꞌ pokteyayeña oꞌch tsaꞌtaterrya yoꞌchñaroꞌmar. Ñewa, añpaꞌ attha notenes ateth tharroꞌmar ñeñthpaꞌ ateth eñosatseꞌtyen acheñeneshaꞌ.

⁶ Poꞌñoxh yeñoteñ eꞌñe pokteꞌ atethchaꞌ tsaꞌtaterrya Yompor. Tharroꞌmar ñerraꞌm ama pokteyaye ñeñth ateth pena Yomporpaꞌ ñeñthepñapaꞌ amatheꞌxhoꞌ errotheno eñoteñe ñamha atethchaꞌ entyeswerrey alloweney esempowañen.

⁷ Ñamha yaña ñerraꞌm esempo yeñosatseꞌtyen es ñeñth ama attheyayepaꞌ atthoña yorrtateññañ Yompor ñapaꞌ ñaña eꞌñe poꞌñoxhareꞌ ñeñth ateth es otyen. Amaꞌt eꞌñe yeñosatseꞌteñothpaꞌ nanakchaꞌ yekowentateññañ Yompor. Ñewa, ñatoꞌ sapaꞌ xhatheꞌ ateth soten, ñerraꞌm ateth yeyenpapreteñ orrtateꞌ Yompor poꞌkowenña, amatheꞌ pokteyayeña oꞌch atthera enteney Yompor ñerraꞌm ñeñthey atarr sosey es phaꞌyets.

⁸ Sapaꞌ aña sotatseꞌtyen, amaꞌtpaꞌ aphapoꞌch ñeñth ama kowentetsomha allochñapaꞌ eꞌñe atthothpaꞌ oꞌch yorrtaten ñeñth kowentetsa. Poesheñaꞌtets acheñ eꞌñe poeyllatatseꞌteñmeꞌchatset neñoñpaꞌ otyenet, ñeñthñaxhoꞌ atarr otenña Pablo. Tharraña Yomporchaꞌña tsaꞌtaterrawet ñeñth ateth otatseꞌtyenet. Ñamha ñeñthpaꞌ eꞌñe pokteꞌ atsaꞌtatarethterretepaꞌchña.

Attho alloweney ñeñthey acheñey xhokma ochñathekmay

⁹ Ñewa, sapaꞌ xhatheꞌ sotenapañ yapaꞌ poꞌñoxhtheꞌ Yomporpaꞌ enteney ñeñthey judioneshay eꞌñe kowenareꞌ es yephaꞌyen. Ñamha xhatheꞌ sotenapañ poꞌpotantañ ñeñth ama judioneshayayepaꞌ ñetñapaꞌ amoꞌ attheyeꞌ entenaneto Yompor. Tharraña amaꞌt mameshapaꞌ ama attheyaye. Tharroꞌmar napaꞌ oꞌ neñotatwanmas attho amaꞌt alloweney ñeñthey acheñey xhokma ochñathekmay amaꞌt ñeñthey judioneshay. Amaꞌt ñamha ñeñth ama judioneshayayepaꞌ eꞌñe atthekmay ochñathekmay.

¹⁰ Amaꞌt Yompor poꞌñoñ ñeñth ateth akellkaꞌwareth awathotheñpaꞌ eꞌñe atthekma oteney, ñeñthpaꞌ ateth oten: Amaꞌt poesheñarrotheyapaꞌ ama eñallyeña ñeñthey eꞌñe pokteꞌ peneꞌ ñeñth poktetsa Yomporekop.

¹¹ Ñamha amaꞌt poesheñarrotheya ama xhennayo yeyoxhro atthoch yeñotoñ Yompor poꞌkowenña. Amachña añeyeꞌ yeꞌneno ñeñth ateth moenen Yompor, amaꞌt poesheñarrotheya.

¹² Amaꞌt alloweney awoꞌt yesaꞌnemh Yompor, amaꞌt mamesha oꞌwañ yesherbhaꞌ ñokop, amaꞌt alloweney. Amaꞌt poesheñarrotheya ama eñallyeña ñeñthey eꞌñe kowen es pets Yomporekop.

¹³ Attho eꞌñe ya yeñosatseꞌteñoth sosyaꞌtsañexhno yeñyaphñapaꞌ xha ottena ñerraꞌmrratheꞌ apampaña ñeñth atoramphsareth. Attho yeñen yenamothpaꞌ nanakchaꞌ yeshkannena. Attho yeshkëñ yamoꞌts yenamothpaꞌ xhach yottena ñerraꞌmrratheꞌ shecheph amtsañeph atserr yepeneꞌ poenamoth.

¹⁴ Ñamha ñetpaꞌ añach eñotenet parrnomarña, ñamha xhach chemamaꞌtannenet.

¹⁵ Ñamha paꞌtsrreꞌmoeñothetpaꞌ machayothach moetseñet acheñ.

¹⁶ Pottatseꞌteñothetpaꞌ xhach nanak moeroxhtatyeñet acheñeneshaꞌ, nanakchaꞌ llekatyeñet.

¹⁷ Amaꞌt awathotheñpaꞌ ama añeyeꞌ yexheneto atthoch eꞌñe moetsoññenothpaꞌ kowen yemtannenet.

¹⁸ Ñamha amaꞌt mameshapaꞌ amach amhchaꞌnaꞌtpawoyeꞌ enteñeto Yompor. Arrpaꞌ allowa ñeñth notenes eꞌñe Yompor poꞌñoñoth ñeñth ateth akellkaꞌwareth awathotheñ.

¹⁹ Ñamha yapaꞌ yeñoteñ ñeñth ateth otyen Yompor poꞌñoñ ñeñth akellkaꞌwareth awathotheñpaꞌ añekopña oten ñeñth echeneꞌ poꞌñoñ, amaña añekpayaye ñeñth ama echayeꞌthe poꞌñoñ allempo. (Ateth ñerraꞌm judioneshaꞌpaꞌ amaꞌt awathotheñ echeññañet Yompor poꞌñoñ, ñeñthara ñoñets ñeñth oꞌ notwanmas ñorraꞌ arr.) Ñeñthoꞌmarña amaꞌt poesheñarrothesa sa amaꞌt ñeñthes judioneshaspaꞌ amatheꞌ errothenoth soto, sapaꞌ eꞌñoꞌ kowen entenes Yompor. Atthoña yeñoteñ amaꞌt alloweney ñeñthey korretsa añe patsropaꞌ ama pokteyeꞌ entenye Yompor ñeñth ateth yephaꞌyena.

²⁰ Tharroꞌmar yeñoteñ eꞌñe yetsotateñotha añ ñoñets ñeñth ateth anareth awathotheñpaꞌ amach errothenoth amaꞌt poesheñarrotheya eꞌñe yaꞌpoktatoña yañeña atthoch eꞌñe pokteꞌ enteney Yompor. Añekpaña sherbeney añ ñoñets ñeñth ateth anareth, ñeñthchaꞌ yeñotateneꞌ poꞌñoxh yapaꞌ nanak ochñath enteney Yompor.

Attho Yomporpaꞌ eꞌñech pokteꞌ entweney, eꞌñe yeyemteñotha Jesucristo

²¹ Tharraña theꞌña Yomporpaꞌ oꞌ eñotatey attho ellonethpaꞌ eñall poꞌpoñ atthoch pokteꞌ entweney Yompor, ñeñthpaꞌ ama añeyaye oꞌch yetsotatwen ora ñoñets ñeñth ateth anareth awathotheñ. Tharraña Yompor poꞌñoñ ñeñth anwareth amaꞌt awathotheñpaꞌ ñeñtharekpa eñen añekop.

²² Atthochña Yomporpaꞌ eꞌñech pokteꞌ entenanet amaꞌt allowen erraꞌtsenchaꞌ yemtenaya Poechemer ñeñthara Jesucristo. Amaꞌt alloweney atthekmach eꞌñe pokteꞌ entweney, eꞌñe yeyemteñotha Jesucristo.

²³ Tharroꞌmar alloweney atthekmay eꞌñe yoꞌchñaꞌtwen. Ama yetsoteññañe Yompor poꞌkowenña ñeñth eꞌñe ateth moenen ña.

²⁴ Ñeñth atthoch eꞌñe pokteꞌ enteney Yomporpaꞌ ñeñthpaꞌ ateth: Eꞌñe poemoereñothey awoꞌt apoey Poechemer ñeñth Cristo Jesús attho ñachña eꞌñe yetsaꞌtwoya allowen yoꞌchñar. Ñeñthpaꞌ eꞌñe attha apoey Yompor, ama eso yetsaꞌteño amaꞌt koñeꞌtha.

²⁵ Ñamha Yomporpaꞌ awoꞌt orrtatan Poechemer Cristo ñeñthchaꞌ rromosets añe patsro, oꞌch ashatarethta poꞌrras eꞌñe yokop. Allochñapaꞌ eꞌñech eꞌshowarethterra yoꞌchñar ñerraꞌm yeyemterach ña. Ñamha awoꞌt ateth pha Yompor atthoch yeñoch, ñapaꞌ eꞌñe pokteꞌ ateth peꞌth awath, tharroꞌmar acheñeneshaꞌ ñeñth korratseꞌth awathpaꞌ Yomporpaꞌ attha awantenanet poꞌchñar, ama awenayeꞌ atsaꞌtatarethtwerreto poꞌchñaret. (Tharroꞌmar ñapaꞌ eꞌñe eñoteñ, Cristochña tsaꞌtwerrawet poꞌchñaret ñamet ñeñth allpon ameꞌñayeꞌth ña awath.)

²⁶ Ñamha awoꞌt ateth pha Yompor allochñapaꞌ atthoch yeñoch ñapaꞌ eꞌñe pokteꞌ ateth pena; themeꞌttsen atthochña eꞌñech pokteꞌ enteney eꞌñe yeyemteñoth Jesús.

Attho eꞌñe yephaꞌyeñotha yañeña ñeñth kowen yenten ya, Yomporñapaꞌ amach kowenayeꞌ entenye

²⁷ Ñewa, attho eꞌñe yeyemteñotha Cristo Yomporñapaꞌ eꞌñech pokteꞌ enteney, ñeñthoꞌmarña oꞌwañchaꞌ eñalleta ñeñth allo yommoꞌchena eꞌñe yañeña, ñeñth eꞌñe yetsotateñoth. Tharroꞌmar eꞌñe yephaꞌyeñotha yañeña ñeñth eꞌñe kowen yenten ya, Yomporñapaꞌ amach pokteyeꞌ entenye.

²⁸ Ñeñthoꞌmarña theꞌpaꞌ eꞌñe poꞌñoxh yeñoteñ eꞌñe yeyemteñotha Cristopaꞌ eꞌñech pokteꞌ enteney Yompor amaꞌt ama yetsoteno ñoñets ñeñth ateth anareth awathotheñ.

²⁹ Ñewa, oꞌch noterrserr masheñnesha judioneshachaꞌ, ñatoꞌ sapaꞌ xhatheꞌ sotenapañ Yomporpaꞌ sapthatheꞌ Seyomporer sepeñ ñeñthes judioneshas, amatheꞌña añekpaꞌnayaye ñeñth ama judioneshayaye. Tharraña napaꞌ oꞌch notas, amaꞌt ñeñth ama judioneshayayepaꞌ ñetpaꞌxhoꞌña Poꞌyomporer peñet.

³⁰ Tharroꞌmar eꞌñe pathrra Yompor. Ñamha amaꞌt erraꞌtsena judioneshaꞌ ñeñthchaꞌ ameꞌñerraya Cristopaꞌ Yomporñapaꞌ eꞌñech pokteꞌ entenanet. Ñamha atthekma amaꞌt erraꞌtsena ñeñth ama judioneshayaye ñeñthchaꞌ yemterraya Cristo, ñetpaꞌxhoꞌña eꞌñech pokteꞌ entenanet Yompor.

³¹ Ñatoꞌ sa theꞌpaꞌ xhatheꞌ sotenapañ yeyemteñoth Cristo, theꞌpaꞌ Yompor poꞌñoñ ñeñth ateth anareth awathotheñpaꞌ oꞌch yewaporeꞌch, oꞌwañchaꞌ sherbhaꞌy. Tharraña oꞌch notas, elloña atthoña eꞌñe yeñoten, ñeñthoꞌmarña Yompor poꞌñoñpaꞌ atarr sherbeney.