Romanos 2 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho amaꞌt judioneshaꞌpaꞌxhoꞌña athpareꞌtoñeteꞌth Yompor poꞌñoñ

¹ Ñeñthoꞌmar theꞌpaꞌ oꞌch notas allowenes ñeñthes judioneshas, ñatoꞌ sapaꞌ xhatheꞌ sotenapañ sapaꞌxhoꞌña añoꞌtheꞌ attheyeꞌ seyxheno sosyaꞌtsañ ateth pena poꞌpotantañ. Tharraña amatheꞌ errothenoth soto ateth tharroꞌmar alloweneypaꞌ eꞌñe atthekma yepena. Ñerraꞌm xha yoten poꞌpsheñeñpaꞌ ama kowenayaye, tharraña atethpaꞌ yañeña ateth otetsa amaꞌt erraꞌtsenotheya ñeñthey ateth otets.

² Tharraña amaꞌt atethpaꞌ yeñoteñ Yomporpaꞌ xhokmach tsaꞌtaterrana allowen ñeñth ateth es phatseꞌtyets, errothenchaꞌ eꞌñe pokteꞌ ent ña.

³ Sapaꞌ xhatheꞌ sotenapañ sapthatheꞌ atarr morrentensa Yompor, amachña tsaꞌtaterrso sa, amaꞌt sapaꞌxhoꞌña atthekma sephatseꞌtyen sosyaꞌtsañ ñeñth ateth pena poꞌpotantañ, tharraña sapaꞌ xha sotenanet ñetpaꞌ amoꞌ kowenayayeto.

⁴ Amapaꞌ sapaꞌ xhatheꞌ sotenapañ Yompor poemoereñoth nanakpaꞌ amach tsaꞌtaterrso tharroꞌmar themeꞌttsen ama erroth penso, attha kowenes. Amaꞌt señoteñe añekopña themeꞌttsen moerensa Yompor atthoch ellopaꞌ oꞌch eꞌñe sokthapeꞌchwerr kowen allowenes.

⁵ Tharraña ñerraꞌm attha seꞌcharrtena seyoxhro, amachña sokthapeꞌchwerro kowen, allempochña alloꞌnach sesen atontatnomoeꞌ atthoch tsaꞌtatwerrsa Yompor esempowañenchaꞌ tsaꞌtatwerrya alloweney errothenchaꞌ eꞌñe pokteꞌ entyeswerrey eꞌñe poesheñaꞌttsoy. Allempoña allowen acheñeneshaꞌpaꞌ oꞌch eꞌñe eñotweret ñeñthchaꞌ eꞌñe ateth tsaꞌtatwerrya eꞌñe poesheñaꞌttsoy, ñeñthpaꞌ eꞌñech pokteꞌ.

⁶ Ñamha tsaꞌtwerryach alloweney ñeñthey korraꞌyetsa arr patsro errothentheꞌ yephaꞌyena eꞌñe ñokop.

⁷ Ñerraꞌm xhokma yokthapeꞌchen eꞌñe kowen Yomporekop, ñamha ñerraꞌm xhokma yoktheññañ poꞌkowenña, ñamha ñerraꞌm añ yeꞌnen atthoch ñapaꞌ eꞌñech kowen entwerrey, ñamha atthoch apwerreychaꞌ ñeñth alloch yokrrerra errponowañen, allempoña poꞌñoxhpaꞌ apwerreychaꞌ atthoch yapaꞌ korretsayach yoksheñeshokmañen thayothen eꞌñe errponañowen.

⁸ Tharraña ñerraꞌm yapaꞌ aña kowen yenten ñeñth yemnen ya, Yomporña poꞌñoññapaꞌ ñerraꞌm xha yathpareꞌteñ, aña yokthen ñeñth ama kowenayaye Yomporekoppaꞌ ñaña poꞌyoroxhenñoth poꞌñoxhpaꞌ xhokmach tsaꞌtatwerrya.

⁹ Aꞌkoñchatarethterrach allowen ñeñth kotheneꞌ ñeñth ama kowenayaye arr patsro, amoeroxhtatarethterretchaꞌ allowenet ñeñth ateth petset, amaꞌt ñanom ateth ñerraꞌm judioneshaꞌ allothpaꞌ ñamha ñeñth ama judioneshayaye.

¹⁰ Tharraña allowen ñeñth kotheneꞌ ñeñth kowentetsa Yomporekop arr patsropaꞌ Yomporñapaꞌ kowenchaꞌ enterranet, apwerranetchaꞌ alloch eꞌñe kowentapreteret, apwerranetchaꞌ ñamha atthoch koshaꞌwerret eꞌñe kowen poeyoxhreto. Atethchaꞌ perran allowen ñeñth eꞌñe kowen korraꞌyetsa, amaꞌt ñanom ateth ñerraꞌm judioneshaꞌ allothpaꞌ ñamha ñeñth ama judioneshayaye.

¹¹ Tharroꞌmar Yomporpaꞌ ama ñaptha judioneshaꞌ morrenteno, añña ñamha allowen acheñeneshaꞌpaꞌ eꞌñe morrentweña. Ñamha atthekma Yomporpaꞌ ama ñaptha koñchatenano ñeñth ama judioneshayaye, ñapaꞌ amaꞌt judioneshaꞌpaꞌ eꞌñech koñchatwer.

¹² Amaꞌt ateth ñerraꞌm ñeñth ama judioneshayaye ñeñth ama echenaye Moisés poꞌñoñ, ñerraꞌm añ kothenet ñeñth ama kowenayayepaꞌ elloña ñetpaꞌ chenkaꞌwerretchaꞌ, tharraña ñetpaꞌ amach añeyeꞌ aꞌchenkaterraweto Moisés poꞌñoñ. Tharraña judioneshaꞌñapaꞌ amaꞌt echeññañetañ Moisés poꞌñoñ, tharraña ñerraꞌm atthera, añach kothapeꞌchyenet ñeñth ama kowenayaye, ñetpaꞌ añachña aꞌchenkaterrawet ñeñthara Moisés poꞌñoñ.

¹³ Tharroꞌmar Yomporpaꞌ ama pokteyeꞌ entenano ñeñth attha eꞌmoeneꞌ orrena poꞌñoñ all serrpareꞌteññañet. Añña pokteꞌ enten Yompor, oꞌch ateth penet ñeñth eꞌñe ateth oten poꞌñoñ.

¹⁴ Ñewa, oꞌch yokthapeꞌch ñeñth ateth pena acheñeneshaꞌ ñeñth ama judioneshayaye, añeneshaꞌ ñeñth ama echenaye Yompor poꞌñoñ. Ñetpaꞌ amaꞌt ama echeneto Yompor poꞌñoñpaꞌ errothenopaꞌ eꞌñe poeyoxhretoth pokthapeꞌcheñothetpaꞌ awoꞌtchaꞌ ateth phaꞌyenet ñeñth eꞌñe kowentetsa Yomporekop, ñeñth eꞌñe ateth oꞌ anwarethetwa Yompor poꞌñoño ñeñth ateth poktetsa ñokop. Amaꞌt ama echeneto Yompor poꞌñoñ ñeñth ateth akellkarethpaꞌ tharraña poeyoxhretoñapaꞌ eꞌñe eñoteñet erraꞌtsentheꞌ ñeñth kowentetsa.

¹⁵ Ñeñth ateth phaꞌyeneꞌ ñeñth kowentetsa, yapaꞌ yeñoteñ poeyoxhretoña eñoteñet ñeñth ateth kowentetsa, ñeñthara ñeñth ateth oten Yompor poꞌñoñ ñeñth oꞌ anarethetwa. Ñewa, oꞌch yetmaꞌntacha ateth ñerraꞌmrratheꞌ Yompor poꞌñoñpaꞌ eꞌñech poeyoxhreto akellkarethtena. Tharroꞌmar eꞌñe ñet poeyoxhretothpaꞌ eñotenet ñerraꞌm esempopaꞌ oꞌch phowerret ñeñth ama kowenayaye, ñamha eñotenet ñerraꞌm esempopaꞌ oꞌch ateth penet ñamha ñeñth eꞌñe kowen.

¹⁶ Tharroꞌmar yeñoteñ esempowañen Yomporpaꞌ eñotatwerreychaꞌ ñeñth ora allpon yaꞌnasotena theꞌ. Yompor Poechemerña ñeñth Jesucristo ñach otats atthoch tsaꞌtatya. Ñeñthpaꞌ eꞌñe ateth ñeñth oꞌ notwas ñeñthara noten allempo neserrpareꞌten añ kowen ñoñets alloch yekeshperra.

Attho judioneshaꞌ amaꞌt echenetañ Yompor poꞌñoñ pathpareꞌteñothetpaꞌ nanak ayowarethtenet

¹⁷ Theꞌpaꞌ oꞌch alla neserrpareꞌtaterrserr ñeñthes judioneshas. Ñewa, sapaꞌ xha soten sapaꞌ judioneshasoꞌ ñamha aña atarr seyemtena ñeñth nonaseꞌth Moisés, ñamha atarr sommoꞌchena tharroꞌmar sapaꞌ soteneñ eꞌñoꞌ poechemer penes Yompor.

¹⁸ Ñamha soteneñ eꞌñoꞌ señotweñ ñeñth ateth moenen ña. Ñamha poꞌñoñ ñeñth ateth anarethpaꞌ ñeñthoꞌña seyxhateneꞌ ñeñth atarr kowentetsa Yomporekop.

¹⁹ Ñeñthoꞌmarña sapaꞌ soteneñ, poꞌñoxh atarroꞌ es señoten, atthoch seyxhateñ poꞌpotantañ ñeñth ama es eñoteneto. Xha sottena ñerraꞌm ñeñthesoꞌ echaꞌneneꞌ ñeñth ama entetso, amapaꞌ ñerraꞌm ñeñthesoꞌ xhoyoꞌtampeneꞌ ñeñth chopeñeꞌchets chekmeto.

²⁰ Ñamha sapaꞌ xhatheꞌ sotenapañ poꞌñoxh atarrtheꞌ kowen seyxhateñ poꞌpotantañ ñeñth ama eñotenaye ñeñth kowentetsa, ñeñth ateth petsa ñerraꞌmrratheꞌ cheshatholleshaꞌ ñeñth ama eñotenanaꞌ ñeñth kowentetsa. Ñamha sapaꞌ soteneñ poꞌñoxhoꞌ esokmañenoꞌ señotwawen, ora amaꞌt allpon ñeñth poꞌñoxhotets, tharroꞌmar sapaꞌ secheññañoꞌ Yompor poꞌñoñ ñeñthoꞌña esokmañen señotateneꞌ.

²¹ Ñewa, theꞌpaꞌ oꞌch notas, sapaꞌ amaꞌt oꞌ atarr seyxhateñ poꞌpotantañpaꞌ tharraña amaña seyxhatenoña eꞌñe sañeña ñeñth kowentetsa Yomporekop. Ñamha sapaꞌ amaꞌt oꞌ atarr seserrpareꞌten attho ama etannaꞌtpawo, tharraña sañapaꞌ xhokma setannaꞌtyena.

²² Ñamha sapaꞌ amaꞌt seserrpareneñ attho amoꞌ achtapretpawo thaporets, tharraña elloña sapaꞌ xhokma sapretannena sethapor. Ñamha sapaꞌ amaꞌt setsenaꞌteneñ ñeñth ayexhkatareth, tharraña sañapaꞌ awoꞌt seyorayesña poerawoth ñeñth atarr koxhneshaꞌ ñeñth allo arkaꞌtampenet ñeñth poꞌyoser penet. Ñeñth ateth etetspaꞌ ñeñthpaꞌxhoꞌña atthekma enteñ Yompor ama aphapawoyaye ateth.

²³ Ñamha sapaꞌ nanak sommoꞌchena tharroꞌmar sapaꞌ secheññañoꞌ Yompor poꞌñoñ ñeñth ateth anareth amaꞌt awathotheñ. Tharraña amaꞌt attheñpaꞌ amaña attheyeꞌña sepeno ñeñth ateth oteney añ ñoñets ñeñthchaꞌ ateth sepha. Yomporñapaꞌ xha sottatateñ ñerraꞌmrratheꞌ ñapaꞌ ama es eñotpeno amaꞌt mamesha.

²⁴ Amaꞌt ateth oten Yompor poꞌñoñ ñeñth ateth anwareth awathotheñ, ñeñthpaꞌ ateth oten: “Amaꞌt ñeñth ama judioneshayayepaꞌ achmhareꞌteñet Yompor eꞌñe sesharrmoroth, eꞌñe sephatseꞌtyeñoth ñeñth amaꞌt mameshapaꞌ ama pokteyeꞌ enteneto amaꞌt ñameꞌttseta.”

Attho ñeñth poꞌñoxh poechemer pen Yompor

²⁵ Poꞌñoxhña ñerraꞌm añ semnen oꞌch setsoteññañ Moisés poꞌñoñ ñeñth ateth anwarethpaꞌ añ poktetsañ oꞌch setsorrannena, tharroꞌmar ñeñthpaꞌ sherbeneñ. Tharraña ñerraꞌm elloña sathpareꞌteññañ poꞌpoñ Moisés poꞌñoñ ñeñth ateth oteney ñeñthchaꞌ ateth yephapaꞌ amaꞌt attho oꞌ saꞌtsorrarethetwapaꞌ ñeñthpaꞌ eꞌñe orrena, atthekma ñerraꞌm ama atsorraretheyayye.

²⁶ Ñeñthoꞌmarña yeñoteñ ñamha, amaꞌt ñeñth ama atsorraretheyayepaꞌ ñerraꞌm añ ateth penet ñeñth ateth oteney Yompor poꞌñoñothpaꞌ amaꞌt ama atsorraretheyayye, Yomporñapaꞌ atethchaꞌ enteney ñerraꞌm eꞌñe poechemer peney poꞌñoxh. Atthekmach enteney ñerraꞌmrratheꞌ ñeñth atsorrareth, tharraña eꞌñech poechemer perrey poꞌñoxh.

²⁷ Ñeñthoꞌmarña yeñoteñ amaꞌt ñeñth attha korretsa ateth eñalleta, ama atsorraretheyaye, ñerraꞌm añ ateth penet poꞌñoxh ñeñth ateth oteney Yompor poꞌñoñothpaꞌ ñetñapaꞌ penkaterrsetchaꞌ, tharroꞌmar ñetpaꞌ ello metanennaset ñeñth allpon kowen oꞌ sephowa Yomporekop. Tharroꞌmar sapaꞌ sathpareꞌteññañ poꞌñoñ ñeñth ateth anareth. Metanenset sa, amaꞌt sapaꞌ secheññañeñ Yompor poꞌñoñ awathotheñ, ñamha amaꞌt sapaꞌ eꞌñe atsorrwaretheseñ.

^28-29 Ñeñth eꞌñe poꞌñoxh poechemer pen Yomporpaꞌ ama ñapthayaye ñeñth eñalletetsa judionesheshoth. Añña poꞌñoxh eꞌñe poechemer pen ñeñth eꞌñech kowen kothapeꞌchenet poeyoxhreto ñokop. Ñamha tsorranneñets eꞌñe attha yechtsopaꞌ ama esoyaye Yomporekop. Añña sherbets Yomporekop attho kowen es yokthapeꞌchen eꞌñe yeyoxhroth. Ñamha ñeñthpaꞌ wena eꞌñe Parets Poekamkëñoth, ama añotheyeꞌ weno oꞌch eꞌñe yephaꞌyeswa ñeñth akellkaꞌyesareth eshekchaꞌña poechemer perrey Yompor. Ñerraꞌm atethchaꞌ yokthapeꞌcherr kowen yeyoxhro Yomporekoppaꞌ atthochña Yomporpaꞌ eꞌñech pokteꞌ entwerrey, amaꞌtchaꞌ acheñeneshaꞌpaꞌ ama pokteyeꞌ entenyeto.