Romanos 16 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho Pablo arr poꞌcartothpaꞌ eꞌñe womhchaꞌtwan ora allowen ñeñth ameꞌñenaya Cristo all anetso Romo

¹ Ñamha theꞌpaꞌ añ necartothpaꞌ nemneñ oꞌch neñotatas ñeñth yoxh yepen ya arr ñeñthpaꞌ añ paꞌsoꞌcheñ Febe. Ñapaꞌ ña sherbets Yompor paꞌpakllo allekma apxhenet Yomporekop añ anetso Cencreo.

² Ñapaꞌ moeneñ awoꞌch awoꞌ sesho. Ñerraꞌm esempo xhap seshopaꞌ oꞌch sagaph kowen, ñeñth ateth poktetsa oꞌch yagapannena eꞌñe kowen, ñeñthey ameꞌñenaya Yepartseshar Cristo. Ñamha ñerraꞌm oꞌch xhap sesho, ñerraꞌm eschaꞌ palltosa amaꞌt erraꞌtsena, añ poktetsa sapaꞌ oꞌch seyenpoeñ tharroꞌmar ñapaꞌ atarr kowen ayenpañ; amaꞌt napaꞌ nanak yenpoenen.

³ Napaꞌ nemneñ añ necartoth oꞌch newomhchaꞌch noxh Priscila poerrollareꞌna ñeñthara masheñ Aquila, ñeñth parro nethorrena awañmoꞌcha Cristo Jesúsokop.

⁴ Ñetpaꞌ nanak yenpoennet awañmoꞌcha allempo moeneꞌ moetsanetañ. Ñetñapaꞌ awtsa rromatsetañ atthoth aꞌkeshphatnet na allempo moeneꞌ moetsaneñ ñeñth neꞌmoñeꞌteneꞌ. Ñeñthoꞌmarña napaꞌ atarr neparasyosoꞌtenanet ñamha ama napthayaya añña ñamha ñeñth allowen ñeñth ama judioneshayaye, ñeñth eꞌñe pameꞌñeñothet apxhaꞌyenet allemeñ anetsoꞌmar, ñetpaꞌxhoꞌña atarr parasyosoꞌteñet noxh Priscila ñamha masheñ Aquila, tharroꞌmar ñetpaꞌ awoꞌt aꞌkeshphatnet, atthoth ellopaꞌ oꞌ alla neserrpareꞌtatererr ñeñth ama judioneshayaye.

⁵ Ñamha theꞌpaꞌ oꞌch newomhchaꞌch allowen masheñneshaꞌ ñeñth pameꞌñeñothet xhokma apxhenet masheñ Aquila paꞌpakllo, all yexhena epoet poethapor Priscila. Ñamha arr necartothpaꞌ nemneñ oꞌch newomhchaꞌch masheñ Epeneto ñeñth nanak nemorrentena. Ñapaꞌ ña ñanom ameꞌñenaya Cristo all anetso Acayo.

⁶ Allothpaꞌ oꞌch newomhchaꞌch ñamha noxh María ñeñth nanak thorretsa sesho parro.

⁷ Theꞌñapaꞌ oꞌch newomhchaꞌch ñamha namoꞌts ñeñthara masheñ Andrónico ñamha masheñ Junias, tharroꞌmar ñet awañmoꞌchapaꞌ ñeñth parro ewankarethey. Ñetpaꞌ amaꞌt allsensarethneshaꞌpaꞌ nanak asherben entarethtet, tharroꞌmar ñetpaꞌ awathotheñ ameꞌñeret Cristo. Amaꞌt allempo napaꞌ ama nameꞌñenaꞌ ñetñapaꞌ oꞌ ameꞌñaꞌwet ñanom.

⁸ Allothpaꞌ nemneñ oꞌch newomhchaꞌch ñamha masheñ Amplias ñeñth atarr nemoerena eꞌñe yameꞌñeñoth Yepartseshar parro.

⁹ Allothpaꞌ ñamha masheñ Urbano, oꞌch newomhchaꞌch ñamha ñeñth parro yethorrena ñeñth poꞌtarwas pen Cristo Jesús. Allothpaꞌ eꞌñe nemorrenteñothpaꞌ oꞌch newomhchaꞌch ñamha masheñ Estaquis.

¹⁰ Oꞌch newomhchaꞌch ñamha masheñ Apeles ñeñth xhokma awanteneꞌ allowen paꞌnamen topateñets atthoña eꞌñe kowen kothenan Cristo. Allothpaꞌ ñamha oꞌch newomhchaꞌch allowen ñeñth pamoꞌts pen Aristóbulo.

¹¹ Allothpaꞌ ñamha namoꞌts Herodión, allothpaꞌ ñamha ñeñth pamoꞌtseshaꞌ pen Narciso. Ñetpaꞌ atarr ameꞌñeñet Yepartseshar.

¹² Theꞌñapaꞌ nemneñ oꞌch newomhchaꞌch ñamha noxh Trifena ñamha noxh Trifosa. Ñetñapaꞌ nanak thorreññañet Yepartseshar poꞌtarwas, allothpaꞌ noxh Pérsida ñapaꞌxhoꞌña nanak yemorrenteña attho nanak thorrena ñamha Yepartsesharekop.

¹³ Ñamha arrpaꞌ oꞌch newomhchaꞌch ñamha poꞌpsheñeñ masheñ Rufo ñeñth pameꞌñeñoth nanak asherben yenteñ Yepartsesharekop. Ñamha pachoreꞌna oꞌch newomhchaꞌch, tharroꞌmar ñapaꞌ eꞌñe ateth nenteñ ñerraꞌmrratheꞌ ñeñth eꞌñe nachor nepen.

¹⁴ Theꞌñapaꞌ oꞌch newomhchaꞌtererr poꞌpotantañ masheñneshaꞌ ñeñth añ Asíncrito, ñamha Flegonte ñamha Hermas, ñamha Patrobas, allothpaꞌ ñamha Hermes, ñamha poꞌpotantañ masheñneshaꞌ ñeñth parrompañoꞌtsaꞌyenet.

¹⁵ Theꞌpaꞌ oꞌch alla newomhchaꞌtererr ñeñth masheñ Filólogo ñamha noxh Julia, allothpaꞌ ñamha masheñ Nereo epoet ñamha poꞌxh, allothpaꞌ ñamha Olimpas, ñamha amaꞌt allowenet masheñneshaꞌ ñeñth parrompañoꞌtsaꞌyenet.

¹⁶ Eꞌñe semorrentannaꞌteñothpaꞌ atethchaꞌ sewomhchaꞌtannaꞌtena ñeñth ateth poktetsa Partsokop. Ñamha allowenet masheñneshaꞌ ñeñth apxhaꞌyetset allemeñ anetsoꞌmar eꞌñe pameꞌñeñothet Cristo, ñetpaꞌxhoꞌña moeneñet oꞌch womhchaꞌtaset ñamha arr necartoth.

Attho Pablo arr poꞌcartothpaꞌ oꞌ alla kothapeꞌchaterraneterr poꞌpocheño

¹⁷ Oꞌch, masheñneshachaꞌ ñamha noxhaneshachaꞌ, noterrserr poꞌpoñ añ necartoth. Señotchaꞌ añ acheñeneshar ñeñth moeneneꞌ oꞌch ellopaꞌtetstatonaset sokthaphña ñeñth attho sameꞌñeña Cristo, tharroꞌmar ñetpaꞌ moeneñet oꞌch kothapeꞌchataset ñeñth ama attheyaye ñeñth ateth oꞌ yeyxhatwas. Ñeñth acheñer atethpaꞌ oꞌch selloꞌtsentach seshoth, amach seyemtatstaneto ñeñth ateth yexhatenet.

¹⁸ Tharroꞌmar ñetpaꞌ ama añeyeꞌ sherbeneto Yepartseshar Jesucristo. Aña kothapeꞌchenet ñeñth ateth moenenet ñet poꞌchets attho korrenet. Attho serrpareꞌtenet koxhneshaꞌ ñoñets, ñeñthpaꞌ attha shekëñet acheñeneshaꞌ ñeñth ama womenkayeꞌ penaye poeyoxher.

¹⁹ Ñewa, alloweney yeñotenes sapaꞌ oꞌ sameꞌñera Cristo ñeñthoꞌmarña napaꞌ atarr nokshensa. Añña nemnen oꞌch eꞌñe señot ñeñth eꞌñe kowentetsa Yomporekop. Allochñapaꞌ amach sokthapeꞌchatsto ñeñth ama kowenayaye.

²⁰ Allochñapaꞌ Yomporpaꞌ awenchaꞌ aꞌwañamphsonas ñeñth attho atarr shekënes oneñeth, ñeñthara Yompor ñeñth eꞌñe kowen yokshateneꞌ yeyoxhro. Yepartsesharepaꞌchña Jesucristo eꞌñe saꞌnatenaya.

²¹ Theꞌpaꞌ oꞌch alla neñotaterrserr añ necartoth, masheñ Timoteopaꞌxhoꞌña moeneñ oꞌch womhchaꞌtas ñamha, ñapaꞌ ñeñth epan nethorrena. Allothpaꞌ ñamha añ namoꞌts maꞌpsheñoꞌmaret ñetpaꞌxhoꞌña moeneñet oꞌch womhchaꞌtaset ñamet. Poesheñarrpaꞌ añ masheñ Lucio, allothpaꞌ ñamha masheñ Jasón, ñamha masheñ Sosípater.

²² Napaꞌxhoꞌña ñeñthen sochetsa Tercio, eꞌñe nameꞌñeñoth Yepartseshar nemneñ oꞌch newomhchaꞌtas añ masheñ Pablo poꞌcartoth. Napaꞌ ñeñthen kellkaten masheñ Pablo.

²³ Masheñ Gayopaꞌxhoꞌña moenen oꞌch womhchaꞌtas ñamha. Na theꞌpaꞌ eꞌñe paꞌpaklloꞌtsenen ña, tharroꞌmar all nexhap. Ñapaꞌ ateth otenanet xhokmach apxhenet allowenet paꞌpakllo ñeñth ameꞌñetsa arr. Ñamha masheñ Erasto moeneñ oꞌch womhchaꞌtas ñamha. Ñapaꞌ ña tesorerotets arr Corinto, ña aññoꞌteneꞌ kelle anetsokop. Ñamha masheñ Cuartopaꞌxhoꞌña moeneñ oꞌch womhchaꞌtas ñeñthara añ necartoth.

²⁴ Yepartsesharepaꞌchña Jesucristo saꞌnataya allowenes. Ñeñthpaꞌ atthetepaꞌch Nompore.

Attho all wañen Yompor poꞌñoñ añ cartothpaꞌ yaꞌyeꞌchoxhtatoñepaꞌch ora alloweney

²⁵ Theꞌñapaꞌ yaꞌyeꞌchoxhtatoñepaꞌch Yompor tharroꞌmar ñapaꞌ ñach awamenkath sepeneꞌ, ñeñth eꞌñe ateth oten añ kowen ñoñets alloch yekeshperra. Ñeñthara añ kowen kothaphñats ñeñth neserrpareꞌtatenes ñeñth eꞌñe ateth pena Jesucristo ñeñth awathotheñ ama eñotpawo.

²⁶ Tharraña theꞌpaꞌ Yompor ñeñth ama arromñatheshayayepaꞌ moenaterrey oꞌch yeñoter ñeñth ama eñotpawo awathotheñ. Ñewa, ñapaꞌ awathpaꞌ añ eñotateꞌth ñeñth aꞌmhtaꞌyesayeꞌth poꞌñoñ, ñetñapaꞌ awoꞌch kellkënet ñeñth ateth eñotatenanet Yompor. Atthochña yeñoter yamha, amaꞌt ñamha allowen paꞌnamen acheñeneshaꞌ; allochñapaꞌ atthoch eꞌñe yameꞌñaꞌwerra ora errapharen, ñeñthey paꞌnamen acheñey.

²⁷ Eꞌñe poemoereñothey Jesucristo ayeꞌchoxhtatarethtepaꞌch Yompor errponowañen, ñeñthara Yompor ñeñth ñapoeth eꞌñe eñotañtetsa. Ñeñthpaꞌ atthetepaꞌch Nompore. Allowa wañ añ necarta. Pablo