Romanos 14 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho eñall ñeñth epwoyeꞌ ameꞌñenayañ Cristo tharroꞌmar ama womenkayeꞌ penano poeyoxher Yomporekop

¹ Ñamha theꞌpaꞌ oꞌch notas poꞌpoñ ñeñthchaꞌ ateth sepha. Ñerraꞌm eñall sesho acheñ ñeñth ameꞌñetsañ tharraña ñapaꞌ ama womenkayeꞌ penano poeyoxher Yomporekop tharroꞌmar ama eꞌñe eñoteñe poꞌñoxh ateth yeyemteña Cristo, sañapaꞌ oꞌch sagaph eꞌñe kowen atthochña eꞌñech parrokma seyemteña Cristo. Tharraña amach añekpa sagape atthoch sapaꞌ oꞌch sotnareꞌch tharroꞌmar ñapaꞌ poꞌpoñoneth kothapeꞌchyen.

² Ateth ñatoꞌ eñall acheñ ñeñth ama womenkayeꞌ penano poeyoxher Yomporekop tharroꞌmar ama eꞌñe eñoteñe ñeñth ateth poꞌñoxh yeyemteña Cristo; ñeñthoꞌmarña ñapaꞌ xhach oten ama pokteyaye oꞌch yerraꞌyes berr poꞌchets, añach patherr yerren narmetsoxhno. Elloña poꞌpsheññexhno eꞌñe poeyemteñothet Cristo ñetñapaꞌ otenet eꞌñe pokteꞌ oꞌch yerraꞌyes amaꞌt erraꞌtsena rreñets.

³ Ñeñthey paꞌnamen es rraꞌyetspaꞌ amoepaꞌch yentatsche ñeñth thoreꞌtetsa ñapaꞌ ama es eñoto. Ñamha ñeñth es thoreꞌtetsapaꞌ amoepaꞌch otatsetye ya ñeñthey paꞌnamen es rraꞌyets ama pokteyaye oꞌch yerratseꞌtyes paꞌnamen ñeñth ama arrapawoyaye. Tharroꞌmar Yomporpaꞌ ñaña oꞌ agërrey atthoch poeyochreshaꞌ perrey.

⁴ Ñeñthoꞌmarña yapaꞌ yeñoteñ ama pokteyaye oꞌch yotannaꞌtena eꞌñe yagattsa Yompor poeyochreshaꞌpaꞌ ama pokteyaye ñeñth ateth penet. Tharroꞌmar ñetpaꞌ Ayochreshathekpoet tharroꞌmar ñapaꞌ ñaña ñapoeth otets attho pokteꞌ entenan poeyochreshaꞌ amapaꞌ ñerraꞌm ama pokteyeꞌ entenano poeyochreshaꞌ. Ñamha Ayochreshath Cristopaꞌ xhokmach eꞌñe pokteꞌ entenan poeyochreshaꞌ tharroꞌmar ñapaꞌ ñach awamenkath phawet poeyoxhro.

⁵ Ñamha ñatoꞌ eñall acheñ ñeñth ama eꞌñe eñotenaye ñeñth ateth eꞌñe poꞌñoxh yeyemteña Cristo, ñeñthoꞌmarña ñetpaꞌ xha otenet añ poktetsa oꞌch yonañchaꞌyen patheꞌtets yeth ñeñthchaꞌ ateth yetsotayes atthochña eꞌñe pokteꞌ enteney Yompor. Ñamha ñatoꞌ poꞌpsheññexhno ñeñth ateth ñerraꞌm yapaꞌ otenet ama yepallteno oꞌch yonañchaꞌyen patheꞌtets yeth ñeñthchaꞌ ateth yetsotayes tharroꞌmar allpon yethpaꞌ Yomporekma poeyexhkatwar. Tharraña poesheñaꞌttsoypaꞌ yeñochepaꞌch ñeñth eꞌñe pokteꞌ yentyen ya eꞌñe yeyoxhro ñeñthchaꞌ ateth yepha.

⁶ Tharroꞌmar ñerraꞌm eseshaꞌ onañchaꞌyeneꞌ yeth ñeñthchaꞌ ateth etsotayes, ñapaꞌ ateth oten ñeñthpaꞌ ateth yameꞌñeña ya Yompor. Atthekma yepena yamha ñeñthey ama onañchaꞌyenaye yeth, yapaꞌxhoꞌña ateth yameꞌñeña Yompor. Ñamha ñeñthey paꞌnamen es rraꞌyetspaꞌ yapaꞌxhoꞌña ateth yameꞌñeña Yompor, tharroꞌmar yeparasyosoꞌteñeshaꞌ Yompor es yerraꞌyen. Atthekma pena ñamha ñeñth es thoreꞌtetsa, ñetpaꞌxhoꞌña ateth ameꞌñeñet Yompor ñamha ñetpaꞌ eꞌñe poeparasyosoꞌteñeshet Yompor es thoreꞌtyenet.

⁷ Tharroꞌmar ama eꞌñe ya yemneññotheyeꞌ ateth es yephaꞌyeno añe patsro. Attho yokrrena añe patsropaꞌ ñeñthpaꞌ ama eꞌñe yapthekpayaye, ñamha allempoch yerromapaꞌ ñeñthpaꞌxhoꞌña ama yemneññotheyeꞌ yerromoeno.

⁸ Tharroꞌmar attho yokrrena allponmat añe patsro ñeñthpaꞌ añekop atthoch yesherbeñ Yepartseshar. Ñamha allempo yerromoenpaꞌ ñeñthpaꞌ tharroꞌmar ateth moenateney Yepartseshar. Ñeñthoꞌmarña yapaꞌ yoten allempo yokrrena añe patsro ñeñthpaꞌ ama yapthekpayeꞌ yokrreno, ñeñthpaꞌ Yepartsesharekop. Ñamha allempo yerromoen, ñeñthpaꞌxhoꞌña ama yapthekpayaye, ñeñthpaꞌxhoꞌña Yepartsesharekop. Ñeñthoꞌmarña ñeñthpaꞌ xhokma ateth pena tharroꞌmar ñapaꞌ eꞌñe oꞌpaterrya ñamha eꞌñe ñokpay.

⁹ Tharroꞌmar Cristopaꞌ ñeñthekop rroma, elloñapaꞌ alla korrerra atthochña ñapaꞌ ñach yamoꞌmteꞌ yepen alloweney. Amaꞌt allempo yokrrenmeñ, amaꞌt ñamha allempo yerromoen, attherach yamoꞌmteꞌ yepeñ, tharroꞌmar ñapaꞌ poeñotwaran ateth peney rromoeñets ñamha attho yokrrena ñeñthey arromñathey.

¹⁰ Ñeñthoꞌmarña amach yotatsche yemoꞌnasheñ ñeñth ateth pena ñapaꞌ ñeñthpaꞌ ama pokteyaye. Ñamha amach yotatsche ñapaꞌ ama es eñoteno. Tharroꞌmar Cristo ñapaꞌ ñach yoterreꞌ errothenchaꞌ entyerrey esempowañen allempoch yapxherra alloweney ñesho.

¹¹ Tharroꞌmar Yompor poꞌñoñ ñeñth anwareth awathotheñpaꞌ ñeñth allpaꞌ Yompor otatseꞌth ateth: Napaꞌ na ñeñthen ama arromñatheshayayno ñamha ama poenesho neñoñ. Poꞌñoxhpaꞌ atethchaꞌ perra esempowañen. Ora allowen acheñeneshaꞌpaꞌ konkorpanrrorterrnetchaꞌ. Allñapaꞌ otwerrnetchaꞌ: “Pha Yomporeph ñeñtheph atarr Partsoph.”

¹² Atthoña yeñoteñ alloweney poesheñaꞌttsoy Yomporpaꞌ aꞌmethataterreychaꞌ ñeñth ateth oꞌ yephowawena arr patsro.

Attho ama pokteyaye eꞌñe ateth yepeñoth ya oꞌch alla yaꞌpoerratater yemoꞌnasheñ

¹³ Ñeñthoꞌmar ama pokteyaye oꞌch yañeña yotannaꞌta ñeñth ateth yentannena arr patsro. Añchaꞌña yañeña eꞌñech yeñotena ñeñth ateth yephaꞌyena ya tharroꞌmar ñeñth ateth yephaꞌyena yapaꞌ ñatoꞌrraña xhatheꞌ yaꞌpoerratater yemoꞌnasheñ ñerraꞌm ñapaꞌ ama pokteyeꞌ entenano ñeñth ateth yephaꞌyen ya.

¹⁴ Napaꞌ eꞌñe neyemteñoth Yepartseshar Jesús neñoteñ eꞌñe pokteꞌ oꞌch es yerraꞌyes tharroꞌmar neñoten allowen rreñetspaꞌ eꞌñe arrapawokma Yomporekop. Tharraña ñerraꞌm eseshaꞌ ama arrapawoyeꞌ entenaye ñeñth allowen rreñetspaꞌ eꞌñe ñokoppaꞌ ama pokteyaye oꞌch rrenan ñeñth rreñets.

¹⁵ Amaꞌt eꞌñe pokteñ oꞌch yerraꞌyes, tharraña ñerraꞌm yemoꞌnasheñpaꞌ ama arrapawoyeꞌ enteñe, yapaꞌ eꞌñe ya yerreñothpaꞌ ñatoꞌ oꞌch yeyeꞌchateña allempoñapaꞌ oꞌch rreꞌ ñamha, ñañapaꞌ xhach enteñ ñeñthpaꞌ ochñaꞌteñets Yomporekop. Attheñapaꞌ ñatoꞌ oꞌch alla poeswerran Yompor. Ñatoꞌ yerreñoth amaꞌt eꞌñe koweneñpaꞌ oꞌtheꞌ yekexhpatater yemoꞌnasheñ Yompor. Ñeñthoꞌmarña notenes, amach yerratsto allempo, theꞌt ñeñthoꞌmara yekexhpatater yemoꞌnasheñ Yompor. Ñamha ñerraꞌm ateth yepeñ yemoꞌnasheñpaꞌ poꞌñoxhpaꞌ ama yemorrenteño, ñeñthara yemoꞌnasheñer amaꞌt Cristopaꞌ ñokpaꞌna rroma.

¹⁶ Ñeñthoꞌmarña notenes, amaꞌt pokteñ ñeñth ateth pephaꞌyena, tharraña ñerraꞌm yemoꞌnasheñpaꞌ ama pokteyeꞌ enteñe, ñañapaꞌ ñeñthothach sasareꞌteney. Ñewa, amaꞌt eꞌñe pokteñ oꞌch ateth yepenañ, tharraña amach ateth yephatsche.

¹⁷ Tharroꞌmar ñerraꞌm añ yoktheññañ Yompor poꞌkowenña attho poeyochreshaꞌ peney, ñeñth attho es yerraꞌyen amapaꞌ attho es yethoreꞌtyena, ñeñthpaꞌ ama esoyayeña Yomporekop. Añña ñeñth nanak sherbets atthoch yoktheññañ Yompor poꞌkowenña, ñeñthpaꞌ attho eꞌñe pokteꞌ es yephannena añe patsro, ñamha attho eꞌñe kowen yentannena atthochña yokrrena eꞌñe kowen moecheth, ñamha atthochña Parets Poekamkëñpaꞌ xhokmach koshateney yeyoxhro.

¹⁸ Ñerraꞌm atethchaꞌ yameꞌñeña Cristo, Pomporñapaꞌ eꞌñech kowen enteney, amaꞌt allowen acheñeneshaꞌpaꞌxhoꞌña eꞌñech kowen entenyet.

¹⁹ Ñeñthoꞌmarña napaꞌ notenes, añepaꞌchña yeꞌnen ñeñth atthoch eꞌñe yeparrokmaterr alloweney ñamha atthochña eꞌñe kowen yeyenpannena. Allochñapaꞌ alloꞌnach eꞌñe womenk yephannaꞌtnena yeyoxher Yomporekop.

²⁰ Eꞌñe ya yerreñoth poꞌchetspaꞌ amach yaꞌwañatatsterrñañe poꞌpsheñeñ ñeñth ateth ameꞌñenanañ Yompor. Amaꞌt allowen rreñtsoxhno kowenakmañ ñeñthchaꞌ yerraꞌyeneñ, tharraña ñerraꞌm yerreñoth oꞌch alla yaꞌpoerratater poꞌpsheñeñ atthoch oꞌwañchaꞌ ameꞌñenana Cristo, ñeñthepñapaꞌ eꞌñe pokteꞌ amach yerratsto ñeñthchaꞌ aꞌpoerrataterreꞌ poꞌpsheñeñ, tharroꞌmar atethpaꞌ ama kowenayeꞌ enteñe Yompor.

²¹ Ñeñthoꞌmarña notenes, amaꞌt erraꞌtsena ñeñth ateth yepeñoth poꞌpsheñeñpaꞌ oꞌch alla yaꞌpoerratater, ñeñthepñapaꞌ amach ateth yephatsto, allochñapaꞌ amach poerrerro amaꞌt poesheñarra ñeñth ameꞌñenaya Cristo. Ateth ñerraꞌm allempo yerren berr poꞌchets ñamha allempo yorren koꞌnes, ñerraꞌm ateth yepeñoth oꞌch alla yaꞌpoerratater yemoꞌnasheñ, ñeñthepñapaꞌ añ poktetsa amach yerratsto berr poꞌchets, amach yorratsto ñamha koꞌnes, tharroꞌmar allempopaꞌ ama kowenayeꞌ enteñe Yompor.

²² Ñerraꞌm eꞌñe phameꞌñeñoth Yompor peñotena ñeñth ateth pephaꞌyena ñeñthpaꞌ eꞌñe pokteꞌ entapreteneph Yompor, tharraña phapaꞌ eꞌñech peyoxhro phokthapeꞌcheñ Yompor ateth, amachña xha peꞌmatareꞌtatstoña allo. Nanak kosheñtsoꞌtseney ñerraꞌm yeñotena poꞌñoxh eꞌñe pokteꞌ entapreteney Yompor ñeñth ateth es yephaꞌyen, tharroꞌmar yeyoxhropaꞌ ama epwoyeꞌ es yephaꞌyeno.

²³ Tharraña ñerraꞌm eseshaꞌ ñeñth epwoyeꞌ es rraꞌyenpaꞌ ñokoppaꞌ ama pokteyaye oꞌch rren, ñañapaꞌ ñeñthaña poꞌchñar pen. Tharroꞌmar ama poeñmañeshokmañenayeꞌ es rreno, ñamha yapaꞌ yeñoteñ ñerraꞌm ama yeñmañeshokmañenayeꞌ es yephaꞌyeno, ñeñthpaꞌ ñeñtha yoꞌchñar entennay Yompor.