Romanos 13 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho añ poktetsa oꞌch yameꞌñeña ñeñth amhchaꞌtarethetyetsa añe patsro allochñapaꞌ atthoch yokrrena eꞌñe kowen moecheth

¹ Ñamha añ poktetsa eꞌñe poesheñaꞌttsoypaꞌ oꞌch yameꞌñya ñeñth amhchaꞌtarethetyetsa ñeñth poeyochreshaꞌ pen gobiernoꞌ. Tharroꞌmar amach eñallñeña ñeñthchaꞌ amhchaꞌtarethetyetsa ñerraꞌm ama Yompor moenatenaweto oꞌch ateth pet. Tharroꞌmar ñeñth amhchaꞌtarethetyetsa arr patsropaꞌ ñetpaꞌ Yompor moenatenawet oꞌch ateth pet.

² Ñeñthoꞌmarña yeñoteñ ñerraꞌm eseshaꞌ athpareꞌteneꞌ ñeñth amhchaꞌtarethtetsa arr patsro ñapaꞌ añeꞌna athpareꞌten Yompor, tharroꞌmar Yomporpaꞌ ña moenatenawet oꞌch amhchaꞌtarethetyenet arr patsro. Ñamha ñeñth athpareꞌteneꞌ ñeñth amhchaꞌtarethtetsa arr patsro ñapaꞌ eꞌñe ñañeña pathpareꞌteñoth atsaꞌtatarethtach.

³ Ñamha ñerraꞌm xhokma yephaꞌyen ñeñth kowen enten amhchaꞌtarethpaꞌ amach amhchaꞌnoxhenayeꞌ yenteñeña ñeñth amhchaꞌtarethtetsa, tharroꞌmar eꞌñe atthothapaꞌ amach erroth phaꞌye. Tharraña ñeñth athpareꞌteneꞌ ñeñth ateth moenen amhchaꞌtarethpaꞌ ñetñapaꞌ atarrchaꞌ amhchaꞌnoxhen enteñetña amhchaꞌtareth tharroꞌmar amhchaꞌtarethpaꞌ xhokmach tsaꞌtaterranaña ñeñth athpareꞌteneꞌ ña. Ñewa, ñerraꞌm ama semno oꞌch amhchaꞌnoxhen señch amhchaꞌtarethpaꞌ eꞌñechña kowen es sephaꞌyen, atthochña amhchaꞌtarethpaꞌ eꞌñech kowen entenes, amach erroth phaso amaꞌt mamesha.

⁴ Tharroꞌmar ñeñth amhchaꞌtarethtetsa arr patsropaꞌ añ thorrenet ñeñth ateth moenatenanet Yompor, allochñapaꞌ atthoch aꞌpoktatenet eshekchaꞌ eꞌñe kowen yokrrena arr patsro. Tharraña ñerraꞌm añ ateth sepen ñeñth ama kowenayayepaꞌ pokteꞌñaxhoꞌña allochñapaꞌ atthoch semhchaꞌteñ amhchaꞌtareth, tharroꞌmar ñapaꞌ ama orrena amhchaꞌtarethteno, xhokmach tsaꞌtatana ñeñth athpareꞌteneꞌ. Tharroꞌmar ñapaꞌ Yompor moenateneꞌ ñapaꞌ ñach tsaꞌtatenaya allowen ñeñth ateth peneꞌ ñeñth ama kowenayaye.

⁵ Ñeñthoꞌmarña añ pokteꞌ oꞌch yameꞌñya ñeñth amhchaꞌtarethtetsa arr patsro, allochñapaꞌ atthoch amach tsaꞌtaterrye Yompor eꞌñe ya yathparñoth. Elloña ñeñth ateth yameꞌñena, tharroꞌmar eꞌñe yeyoxhropaꞌ yeñotena ñeñthpaꞌ eꞌñe pokteꞌ oꞌch eꞌñe yameꞌñena.

⁶ Ñeñthoꞌmarña ñamha añ poktetsa oꞌch yetsaꞌta impuesto, ñeñth ateth anareth ñoñets ñeñth cobrenyet amhchaꞌtaretheshoth tharroꞌmar ñeñth amhchaꞌtarethetyetsa añ patsro, ñeñthpaꞌ ateth moenatenanet Yompor ñeñthchaꞌ ateth thorrenet ñeñth poꞌtarwas penet.

⁷ Xhokmach setsaꞌta allowen ñeñth ateth anareth ñoñets attho cobrenyet ateth ñerraꞌm allpon kelle ñeñth enamoeney amhchaꞌtarethneshaꞌ ateth ñerraꞌm impuestoxhno, xhokmach setsaꞌcha. Ñamha acheñ ñeñth amhchaꞌnaꞌtpoꞌ entenetpaꞌ xhokmoepaꞌch semhchaꞌnaꞌtweñ. Ñamha acheñ ñeñth atarr amorrentarethapaꞌ xhokmoepaꞌch semorrentweña.

⁸ Amach eseshaꞌ setebhatsto, amaꞌt poesheñarra. Añchaꞌña sepha ñeñth poktetsa sokop, oꞌch semorreñcha samoꞌts. Tharroꞌmar ñerraꞌm eꞌñe yemorrenteña yamoꞌtspaꞌ atthochña yetsotwa ora Yompor poꞌñoñ ñeñth ateth anareth ñeñthchaꞌ ateth yepenanet eꞌñe kowen.

⁹ Ateth ñerraꞌm patherr ñoñets ñeñth ateth anareth ñeñthpaꞌ ateth oten: “Amach sechtapretannaꞌtatsto sethapor.” Poꞌpoñ ñoñetspaꞌ ñeñthpaꞌ ateth oten: “Amach semtsannaꞌtatsto.” Poꞌpoñpaꞌ ateth oten: “Amach setyesatsto”; poꞌpoñpaꞌ ateth oten: “Amach setomaꞌtamphsatsche samoꞌts.” Poꞌpoñpaꞌ ateth oten: “Amach seyeꞌchapretannaꞌtatsto”, ñamha eñall poꞌpoñexhno ñoñets ñeñth ateth yexhateney. Allowen añ ñoñets amaꞌt poꞌpoñeꞌttsokma ateth yexhatenyeñ, tharraña poꞌñoxhpaꞌ eꞌñe pathrra oteney, ñeñthpaꞌ ateth oteney: “Atarrepaꞌchña yemorrenteña yamoꞌts eꞌñe ateth atarr yemorrentena yañeña.” Ñerraꞌm xhokma yemorrenteña yamoꞌtspaꞌ allempoña poꞌñoxhpaꞌ yetsotwach ora allowen ñeñth ateth yexhatyeney poꞌpoñeꞌttsokma ñoñets ñeñth ateth anareth.

¹⁰ Tharroꞌmar ñerraꞌm poꞌñoxh xhokma yemorrenteña yamoꞌtspaꞌ amach yemno oꞌch erroth yephanet theꞌt xha yellkatenanet. Añexhno atethpaꞌ ama morrenteñtsoyaye. Ñeñthoꞌmarña yeñoteñ ñerraꞌm poꞌñoxh xhokma yemorrenteña yamoꞌtspaꞌ ñeñthpaꞌ atthochña eꞌñe yetsotwa ora allowen ñoñets ñeñth ateth anareth awathotheñ Yomporeshoth.

¹¹ Atethchaꞌ sephowa ñeñth ateth oꞌ notwas, tharroꞌmar yeñoteñ oꞌ xhapmoch allempoch werra Cristo, ñeñthoꞌmar sokoppaꞌ añ poktetsa oꞌch alla setanterra Cristokop amachña sekhllañotha es sephaꞌyeno ateth ñerraꞌm xha semoen. Tharroꞌmar awañmoꞌcha allempo ñanom yameꞌñera Cristopaꞌ allempo atarr atomat palltenmeñ atthoch yaꞌkeshphatarethterra. Tharraña theꞌpaꞌ ama atarr atomatmeñeyaye. Oꞌ mameshamerra atthoch yaꞌkeshphatarethterra.

¹² Arr patsropaꞌ eñall shonteꞌ sosyaꞌtsañexhno. Ñatoꞌ oꞌch yetmaꞌntacha ateth ñerraꞌmrratheꞌ yapaꞌ chekmeta yeyxhena. Tharraña theꞌpaꞌ eꞌñe ateth pena ñerraꞌmrratheꞌ oꞌ metwamoch chekmeteꞌ oꞌ poetarenmoch, tharroꞌmar yapaꞌ yeñoteñ oꞌ xhapmoch allempoch werra Cristo. Ñeñthoꞌmarña añ poktetsa oꞌch yeswanom allowen ñeñth ama kowenayaye ñeñth ateth atmaꞌntatareth chekmeteꞌ. Añchaꞌña ateth yephaꞌyen ñeñth kowen enten Yompor ñeñth ateth atmaꞌntatareth poetareꞌ. Atthochña yethorrena Yomporekop ateth ñerraꞌmrratheꞌ xho yekhllarena ñokop.

¹³ Añepaꞌchña yephaꞌyen kowen ñeñth ateth penet yetho, ñeñth ama apenkoxhenayaye ñeñthpaꞌ ama attheyaye ñerraꞌm ñeñth ateth penet tsapo. Amach yokthapretatsto all nanak koshena aposañethexhno, eꞌñe porrareꞌteñothet all atarr paꞌnamen koshatseꞌtyenet. Ñamha amach yechtaꞌyesatsto koyaneshaxhno, amach ateth yephatsto ñeñth paꞌnamen sosyaꞌtsañexhno. Amach yeꞌnatsto atsrreꞌmoxhen, ñamha amach yeꞌmoñeꞌtannaꞌtatsto eꞌñe yesopeꞌcheñoth.

¹⁴ Añchaꞌña awamenkath sepeneꞌ Yepartseshar Jesucristo, allochñapaꞌ atthoch amach semnatatsto sechets oꞌch moenatseꞌtatas ñeñth ama kowenayaye.