Romanos 12 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho añ poktetsa oꞌch eꞌñe yapwer Yompor yechets

¹ Ñeñthoꞌmarña theꞌpaꞌ oꞌch, masheñneshachaꞌ ñamha noxhaneshachaꞌ, notas, attho Yomporpaꞌ atarr moerenya, yapaꞌ añ eꞌñe poktetsa oꞌch yapwer Yompor yechets. Oꞌch yapwer allowen yechets ateth ñerraꞌmrratheꞌ ñeñth moetseteꞌth awath Yomporekop ñeñthchaꞌ nenet ñokop. Tharraña ya yechets eꞌñech bethnathoth yapwer Yompor tharroꞌmar ñeñthpaꞌ eꞌñech ñokpa, ñeñthchaꞌ nanak koshateneꞌ ña. Atthochña eꞌñech yeyoxhrokmañen kowen yokther Yompor.

² Allochñapaꞌ amach alloꞌna ateth es yephatseꞌtyesneno ñeñth ateth yeyxhen ya añe patsro, ellochña yokthapeꞌcherr etserra atthoch etserrataterrnay Yompor yokthaphña. Atthochña eꞌñe kowen señoch erraꞌtsentheꞌña moenen Yompor ñeñth eꞌñe kowen enten ña, ñamha ñeñthchaꞌña koshateneꞌ eꞌñe poktakma.

Attho Yomporpaꞌ ama pokteyeꞌ entenye oꞌch yot yañeña yoꞌña nanak sherbets

³ Yompor poemoereñothenpaꞌ awoꞌt llesensenen atthoch nach thorretsa ñokop. Ñeñthoꞌmarña theꞌpaꞌ notenes ñeñth ateth moenen Yompor. Amaꞌt poesheñarrothesapaꞌ amach sentatsto sañeña ñeñthesoꞌ ello nanak sherbets. Añchaꞌña pokteꞌ sentena allpon sesherben attho poesheñaꞌttsos Yomporpaꞌ awoꞌt apaꞌyesas atthoch eꞌñe seyemteñoth sethorraꞌyesa ñokop.

⁴ Ñatoꞌ oꞌch yetmaꞌntacha ñeñth ateth pena yechets. Ñewa, yechetspaꞌ ama eꞌñe pathrrayaya, ateth ñerraꞌm yeklleꞌ ñamha yot ñamha yetak. Ñamha ama eꞌñe pathrrayaye sherbenye, eꞌñe poꞌpoñeꞌttsokma sherbeney. Tharraña amaꞌt poꞌpoñeꞌttsokma sherbeneypaꞌ eꞌñe yokma yechets yephoweñ, tharroꞌmar eꞌñe pathrra yechets ateth petsa.

⁵ Ñamha atthekma yepena alloweney ñeñthey ameꞌñenaya Cristo. Amaꞌt shonteyeñ ñamha amaꞌtchaꞌ poꞌpoñeꞌttsokma yethorraꞌyesa ñokoppaꞌ ñañapaꞌ eꞌñech pathrra enteney, ateth ñerraꞌmrratheꞌ eꞌñe poꞌchets peney. Atthochña eꞌñech yeparrokmaten eꞌñe poesheñaꞌttsoy epay Cristo. Atthoña eꞌñe yeparrokmateñoth Cristopaꞌ oꞌch yeparrokmatwawa alloweney ñeñthey ameꞌñenaya Cristo.

⁶ Eꞌñech poꞌpoñeꞌttsokma yethorraꞌyena Yomporekop, tharroꞌmar ñapaꞌ awoꞌt apaꞌyesey eꞌñe poꞌpoñeꞌttsokma ñeñthchaꞌ ateth yesherbeꞌ eꞌñe kowen. Ñewa, ñerraꞌm añ apoeney alloch yaꞌpothoñ poꞌñoñpaꞌ yaꞌpothepaꞌch errponchaꞌ yemtatenya.

⁷ Amapaꞌ ñerraꞌm añ apoeney atthoch yesherbeꞌ poꞌpsheññexhno eꞌñepaꞌchña kowen yesherbenanet. Amapaꞌ ñerraꞌm añ apoeney atthoch yeyxhateñ poꞌpsheññexhno eꞌñepaꞌchña kowen yeyxhatyenanet.

⁸ Amapaꞌ ñerraꞌm añ yeñoten atthoch yokthapeꞌchatyesanet ñeñth kowentetsa Yomporekop, eꞌñepaꞌchña kowen yokthapeꞌchateñ acheñeneshaꞌ. Amapaꞌ ñerraꞌm añ yeñoten atthoch es yapaꞌyes acheñeneshaꞌ ñeñth es palltaꞌyetsapaꞌ eꞌñepaꞌchña yeñmañeshokmañen es yapaꞌyenanet, amachña xha yempaꞌtanaꞌtatsche. Amapaꞌ ñerraꞌm añ yeñoten atthoch yaꞌmhchaꞌtarethtena, eꞌñepaꞌchña yoksheñeshokmañen yaꞌmhchaꞌtarethtena, amachña xha yemoenmeꞌchatsche. Amapaꞌ ñerraꞌm añ yeñoten atthoch yeyenpoeꞌ ñeñth moeroxhtetsa, eꞌñepaꞌchña yoksheñeshaꞌ yeyenpoenanet.

Atethchaꞌ phaꞌyesa ñeñth poeyochreshaꞌ pen Cristo

⁹ Amorrentannaꞌtpawepaꞌch yentannena eꞌñe yeñmañeshokmañen. Ñamha allowen ñeñth ama kowenayeꞌ enteno Yompor oꞌch eꞌñe yaꞌmñechya nanak atthoch yaꞌypoꞌñeꞌ. Tharraña allowen ñeñth eꞌñe kowen enten Yomporpaꞌ amach xha yaꞌypoꞌñatsche.

¹⁰ Ñamha añ poktetsa amorrentannaꞌtpoꞌch yentannena alloweney ateth ñerraꞌm poꞌñoxh eꞌñe yemoꞌnasheñ yephannena. Oꞌch ateth yeñch poꞌpsheñeñ ñapaꞌ atarr sherben, amachña yañeña nanak asherben entetso.

¹¹ Amach xha sekhllanaꞌtatsto thorraya ñeñth kowen enten Yompor. Añchaꞌña eꞌñech seyoxhrokmañen sesherbeꞌ Yepartseshar attho awamenkath penes Parets Poekamkëñ.

¹² Ñamha eꞌñepaꞌch sokshena tharroꞌmar yapaꞌ eꞌñe yeyemteñoth yekwenña ñeñth oꞌpatatenya Yompor. Ñamha ñerraꞌm esempo waponasa moeroxhteñets eꞌñepaꞌchña saꞌwanteꞌ. Ñamha xhokmoepaꞌchña semaꞌyocheña Yompor.

¹³ Ñamha ñeñth poeyochreshaꞌ pen Yompor ñerraꞌm esempo es palltaꞌyenet, sañapaꞌ sapaꞌyesanetchaꞌ ñeñth palltaꞌyenet. Ñamha eꞌñepaꞌchña kowen sagapannena sepakllo.

¹⁴ Ñamha añ poktetsa oꞌch senamoñ Yompor atthoch aꞌnatana ñeñth seꞌmoñeꞌteneꞌ. Amachña xha sarrnomareꞌtatscho.

¹⁵ Ñamha ñerraꞌm esempo eseshaꞌ atarr koshetsa, sapaꞌxhoꞌña sokshapretanetepaꞌch. Ñamha ñerraꞌm esempo eseshaꞌ yawetsa poellkëñoth, sapaꞌxhoꞌña sellkapretanetepaꞌch.

¹⁶ Amachña xha atsrreꞌmoxhen sentannaꞌteno. Ñamha amach aña seꞌnatsto atthoch sommoꞌchena. Añchaꞌña pokteꞌ senten oꞌch seyemteña ñeñth ama esosheꞌmayeꞌ entyeneto. Ñamha amach sentatsto sañeña, soꞌña eꞌñe sapoeth atarroꞌ es señoten.

¹⁷ Ñamha ñerraꞌm poꞌpsheñeñ errothen phaspaꞌ sapaꞌ amach setsaꞌtatatsche amaꞌt koñeꞌtha. Sapaꞌ añchaꞌña eꞌñe semaꞌyoxhra ñeñth xhokma sepena ñeñth kowen enten allowen acheñeneshaꞌ.

¹⁸ Eꞌñe poesheñaꞌttsospaꞌ xhochña seꞌnyes ñeñthchaꞌ ateth sephaꞌyes ñeñth pokteꞌ enten allowen acheñeneshaꞌ; atthochña eꞌñe kowen sentannena. Allochñapaꞌ oꞌch sokrrena eꞌñe kowen moecheth eꞌñe sagattsa ñeñth parroꞌmarneshas.

¹⁹ Theꞌ oꞌch, masheñneshachaꞌ ñamha noxhaneshachaꞌ, eꞌñe nemorrenteñothespaꞌ oꞌch notas, ñerraꞌm esempo poꞌpsheñeñ erroth phaspaꞌ sañapaꞌ amaꞌt koñeꞌthapaꞌ amach setsaꞌtatatsche. Añchaꞌña semnat Yompor attho ñapaꞌ tsaꞌtaterranetchaꞌ. Tharroꞌmar ñeñthpaꞌ ateth oten Yompor poꞌñoñ ñeñth anwareth awathotheñ. Allempo ateth otaneteꞌth Yompor, ñeñthpaꞌ ateth ot: “Napaꞌ naña ñeñthen atsaꞌtatañen, napaꞌ nach tsaꞌtatwerrawet.” Arrpaꞌ allowa ñeñth ateth oteꞌth Yompor.

²⁰ Añchaꞌña ateth sephoñ ñeñth seꞌmoñeꞌteneꞌ ñeñth eꞌñe ateth oteney Yompor poꞌñoñ. Ñewa, ñeñthpaꞌ ateth oten: “Ñeñth seꞌmoñeꞌteneꞌ ñerraꞌm esempo cheporrenapaꞌ sañapaꞌ sapepaꞌch ñeñthchaꞌ rraꞌ. Ñamha ñerraꞌm esempo oñpaꞌten sañapaꞌ sapepaꞌch ñeñthchaꞌ orr. Ñerraꞌm atethchaꞌ sepeꞌpaꞌ ñañapaꞌ oꞌch penkëna nanak. Atarrchaꞌ atserr eꞌman attho penkëna. Allempoñapaꞌ ñatoꞌ eꞌñe poepenkëñothpaꞌ ñeñthchaꞌña kothapeꞌchaterreꞌ kowen.”

²¹ Ñeñthoꞌmarña notas, ñerraꞌm esempo poꞌpsheñeñ erroth phaspaꞌ sapaꞌ amach sañeña moenatstaye oꞌch alla setsaꞌtatera. Añchaꞌña ateth sephaꞌ ñeñth eꞌñe kowentetsa. Ñerraꞌm ateth yepenapaꞌ eꞌñe yepeñoth kowenpaꞌ oꞌch yaꞌwañat ñeñth ama kowenayaye.