Romanos 11 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

Attho judioneshaꞌpaꞌ aꞌypoꞌñarethtenetañ, tharraña ama poktakmayeꞌ aꞌypoꞌñenanetoña Yompor

¹ Tharraña amaꞌt attheñ, napaꞌ oꞌch notas, poꞌñoxh Yomporpaꞌ ama eꞌñe poktakmoꞌ aꞌypoꞌñaꞌwerrano poeyochreshaxhno, ñeñthareta ñeñthet israelenaꞌtarneshaꞌ. Ateth ñerraꞌm na, napaꞌxhoꞌña israelenaꞌtaren tharroꞌmar napaꞌ poꞌmhrenñen Abrahamañ ñeñthara Benjamíñeñ mereñtsoren.

² Yomporpaꞌ ama aꞌypoꞌñaꞌwerrano poeyochreshaxhno. Ñetpaꞌ eꞌñe eñotwaneteꞌth awath ñeñthchaꞌ poeyochreneshaxhno phaꞌ. Ñamha napaꞌ neñoteñ amach aꞌypoꞌñaꞌwerraneto, tharroꞌmar ñeñthpaꞌ ateth akellkaꞌwareth Yompor poꞌñoño amaꞌt awathotheñ. Sapaꞌ amaꞌt seyerpoenoña ñeñth ateth peꞌth Elías awath. Ñapaꞌ awoꞌt otteñeꞌchan israelneshaꞌ eꞌñe poemaꞌyocheñoth Yompor.

³ Ñeñthpaꞌ ateth otan Yompor awath: “Nompore, namoꞌtseshaꞌ ñeñthara israelenaꞌtarpaꞌ epayeꞌ moetsanatennapet ñeñth phaꞌmhteneꞌ peñoñ. Amaꞌt ñamha Nompore ñeñth altar ñeñth alloth yesherbenpeñpaꞌ oꞌ eꞌñe toreꞌtatwonapet. Amaꞌt napaꞌ oꞌ eꞌñe napthamha ñeñthen phameꞌñenaya. Amaꞌt theꞌ Nompore napaꞌxhoꞌña oꞌpatennet awoꞌch moetsanet namha.” Arrpaꞌ allowa ñeñth ateth otteñeꞌchaneꞌth Elías pamoꞌtseshaꞌ Yomporesho awath.

⁴ Arrñapaꞌ attho eñoranaꞌtana Yompor Elías ñeñthpaꞌ ateth och: “Amakaꞌ phapthayaya ñeñtheph nameꞌñenaya, elloña eñallmeñ kanxhrroch mil israelenaꞌtarneshaꞌ ñeñth nameꞌñenaya ñeñth ama konkorpanaꞌtenanaꞌ maꞌyochaya ñeñth ayexhkatareth ñeñth sochenet Baal. Ñetñapaꞌ nenenanet elloneth nokop.” Arrpaꞌ allowa ñeñth ateth neyerpatensa ateth oteꞌth awath Yompor allempo eñoranaꞌtana Elías.

⁵ Ñamha ateth ñerraꞌm theꞌpaꞌ atthekma pena Yompor. Ama allowenakmayeꞌ aꞌypoꞌñenanetoña Yompor. Ñañapaꞌ amaꞌt poesheñaꞌttsapaꞌ awoꞌt yeꞌcherranet allochñapaꞌ atthochña eꞌñe poemoereñothanetpaꞌ oꞌch aꞌkeshphaterranet.

⁶ Tharraña eꞌñe poemoereñothanet awoꞌt aꞌkeshphatanet. Amaña añotheyaye attho kowen es yexhkatyenet ñet. Tharroꞌmar ñeñth kowen yexhkatyenet ñerraꞌm allo aꞌkeshphatenetañpaꞌ Yomporña poemoereñapaꞌ amatheꞌ aꞌkeshphatañeyeꞌ yenteñe.

⁷ Ñeñthoꞌmarña yeñoteñ, israelenaꞌtarpaꞌ ama allowenakmayeꞌ enterreto ñeñth eꞌnenet. Ñewa, ñeñth eꞌnenetpaꞌ ñeñthpaꞌ atthoch eꞌñe pokteꞌ enterranet Yompor. Poesheñaꞌttsa enterreꞌ ñeñth yeꞌchena Yompor. Tharraña poꞌpotantaññapaꞌ ama entereto ñeñth ateth moenen Yompor ñeñth atthoch eꞌñe pokteꞌ entwerrey tharroꞌmar ñetpaꞌ xhokma echarrtenanet poeyoxhreto oꞌch pet ñeñth ateth moenen Yompor.

⁸ Ñetñapaꞌ oꞌ eꞌñe ateth phowet ñeñth eꞌñe ateth anwareth Yompor poꞌñoño amaꞌt awathotheñ. Ñeñthpaꞌ ateth oten: “Yomporpaꞌ ñach ama moenataweto oꞌch es xhapawet poeyoxhreto. Amaꞌtchaꞌ xho es entenetañ ñeñth ateth pena Yomporpaꞌ amach xhenaneto poeyoxhreto ñeñth ateth moenen Yompor. Ñamha amaꞌtchaꞌ eꞌmhñoteññañetañ Yompor poꞌñoñpaꞌ amach xhapaneto poeyoxhreto amaꞌt awatha ñeñth ateth moenen Yompor. Amaꞌt themeꞌttsenpaꞌ atthekma penet.” Arrpaꞌ allowa ñeñth ateth oteꞌth Isaías ñeñthchaꞌ ateth perra judioneshaꞌ.

⁹ Elloña Davidpaꞌxhoꞌña ñapaꞌ ateth oteꞌth awath, ñeñthpaꞌ ateth ot: Judioneshaꞌpaꞌ nanak aꞌnateña Yompor. Shonteꞌ esokmañen echenet ñeñth alloch rrallmeꞌchapretannenet. Tharraña ñeñthpaꞌ xha shekënanet tharroꞌmar ñetpaꞌ otenapoetañ Yomporpaꞌ eꞌñetheꞌ pokteꞌ entenanet. Tharraña ñeñthpaꞌ ama attheyaye. Ñeñthpaꞌ ñeñthchaꞌña aꞌchenkaterrawet. Atthoch eꞌñe tsaꞌtatwerranet.

¹⁰ Ellopaꞌ alla oterrerr David ñokpoet, ñeñthpaꞌ ateth ot: Arepaꞌch es xhapaweto poeyoxhreto ñeñth ateth moenen Yompor, atthetach ñerraꞌmrratheꞌ aporoꞌyeth ñeñth amach enteno. Xhokmoepaꞌch amoeroxhtatarethtenet eꞌñech atthet ñerraꞌmrratheꞌ eñerr aꞌmoꞌkaꞌnenawet ñeñth nanak amoeroxhtatañ.

Attho Yomporpaꞌ aꞌypoꞌñaneñ judioneshaꞌ, ñeñthpaꞌ añekop atthoch aꞌkeshphaterran ñamha ñeñth ama judioneshayaye

¹¹ Tharraña amaꞌt atarr athpareꞌtena judioneshaꞌ, napaꞌ oꞌch notas, amach eꞌñe aꞌypoꞌñaꞌwereto poktakma Yompor. Tharroꞌmar eꞌñe pathpareꞌteñothet ñetpaꞌ atthoña Yomporpaꞌ awoꞌt ameꞌñaterrana poꞌpoñ acheñ ñeñth ama judioneshayaye atthoch aꞌkeshphaterranet ñamet. Atthochña judioneshaꞌpaꞌxhoꞌña eꞌñe poempaꞌteñothet Yomporpaꞌ ñatoꞌ oꞌch alla ameꞌñeret Yompor eꞌñe kowen.

¹² Attho athpareꞌtenan judioneshaꞌ Yomporpaꞌ poꞌpoñexhnoña acheñeneshaꞌ arr patsropaꞌ awoꞌt xhapanet atthoch ameꞌñeret ñamet Yompor. Ñewa, attho amaꞌt pathpareꞌteñothetpaꞌ yenpoeñet poꞌpoñ acheñ ñeñth ama judioneshayaye, yapaꞌ yeñoteñ esempowañen allempoch alla ameꞌñaꞌweret Yomporpaꞌ elloña pameꞌñaꞌweñothetpaꞌ nanakchaꞌ yenpoeret poꞌpoñ acheñ ñeñth ama judioneshayaye.

¹³ Ñeñthpaꞌ ateth notenes ñeñthes ama judioneshayayso tharroꞌmar napaꞌ allsensarethen nach serrpareꞌteneꞌ Yompor poꞌñoñ sokop ñeñthes ama judioneshayayso. Ñeñthoꞌmarña napaꞌ nokshena, atarr kowen asherben nenteñ ñeñth ateth llesensenen Yompor.

¹⁴ Tharroꞌmar allochñapaꞌ atthoch nameꞌñatera ñeñth amaꞌt ama judioneshayaye. Atthochña ñatoꞌ judioneshaꞌ ñeñth eꞌñe namoꞌtsnaꞌtaranetpaꞌ eꞌñe poempaꞌteñothet Yomporpaꞌ oꞌch alla moeneret oꞌch ameꞌñerret ello ateth sepena sa. Allochñapaꞌ atthochña aꞌkeshphatarethterret ñamet, amaꞌt poesheñaꞌttsotha.

¹⁵ Tharroꞌmar ñeñth attho Yomporpaꞌ awoꞌt aꞌypoꞌñan judioneshaꞌ, ñeñthpaꞌ añekop atthoch amoꞌtsterrana poꞌpoñexhno acheñeneshaꞌ arr patsro ñeñth ama judioneshayaye. Ñamha yapaꞌ yeñoteñ ñerraꞌm esempowañen allempoch judioneshaꞌpaꞌ oꞌch alla ameꞌñaꞌweret Yompor, atthochña oꞌch alla agërranet; ñetña allempopaꞌ xhach otterret ñerraꞌmrratheꞌ rromoth oꞌ tantwerret.

¹⁶ Tharroꞌmar attho ñeñth ñanom judioneshatatseꞌth awathpaꞌ ñetpaꞌ anarethteteꞌth Partsokop, allochñapaꞌ poꞌmhrenñeneshaꞌpaꞌxhoꞌña ñetpaꞌ akrarethterretchaꞌ ñamet eꞌñe atthekma. Ñatoꞌ oꞌch yetmaꞌntacha ateth peteꞌth awath pokrramh ñeñth neteꞌth Partsokop. Ñeñth ñenmath pokrrametpaꞌ awoꞌch yoreñet koñeꞌth ñeñth nanak kowen ñeñthchaꞌ nenet Yomporekop. Ñamha attho ñeñth ñanom pokrramh yorenet Partsokoppaꞌ ñeñthpaꞌ eꞌñe kowen, añña alloth yoret pokrrametpaꞌ ñeñthña pokrramet orapaꞌ eꞌñech kowenareꞌ. Ñamha ñatoꞌ oꞌch yetmaꞌntacha poꞌpoñ ñeñth ateth pena tsachrexh. Ñewa, ñerraꞌm erraꞌtsen tsach ñerraꞌm poerxhoxhno eꞌñe kowenareꞌ poetakrexhnopaꞌxhoꞌña eꞌñech kowenareꞌ.

¹⁷ Theꞌpaꞌ ñeñthes ama judioneshayayso napaꞌ oꞌch notas, Yomporpaꞌ awoꞌt ellopaꞌtetstatan patantarr judioneshaꞌ ñeñth athpareꞌteneꞌ ña. Allochñapaꞌ atthoch sapaꞌ oꞌch separrokmaterr epas ñeñth ameꞌñenaya Yompor. Ñatoꞌ oꞌch netmaꞌntacha ateth pena tsach ñeñth otenet olivoch. Ñewa, judioneshaꞌpaꞌ ñetpaꞌ atthet ñerraꞌmrratheꞌ olivoch ñeñth eꞌñe kowen narmets. Tharraña ñatoꞌ ñeñth allpon poetakërpaꞌ awoꞌt pechaꞌtamphset awoꞌt waporeꞌchet. Allochñapaꞌ atthoch aꞌtapaꞌllateret epoet ñeñth poetsathoꞌmar olivochtakër ñeñth ama narmetsoyaye. Sa ñeñthes ama judioneshayaysopaꞌ sapaꞌ aña poetakër sepeneꞌ ñeñth poetsathoꞌmar olivochtakër. Theꞌñapaꞌ oꞌ aꞌtapaꞌllataterrset olivochtakro alloth apechaꞌtareth ñeñth awaporeꞌtareth. Allochñapaꞌ atthochña sapaꞌxhoꞌña oꞌch separrokmaterr epas ñeñth ameꞌñenaya Yompor, ñamha atthoch sagapapreter Yompor paꞌnateña ñeñth ateth otaneꞌth Yompor judioneshaꞌ paꞌtañneshañ awath.

¹⁸ Tharraña amaꞌt attheñpaꞌ sapaꞌ amach sañeña nanak asherben sentatsterro. Ñamha amach sotatsto oꞌwañtheꞌ sherbenña añ judioneshaꞌ ñeñth tomaꞌntenaya olivochtakër ñeñth awaporeꞌtareth, tharroꞌmar sapaꞌ señochepaꞌch allothkaꞌyeña wenaña sa sewamenk tsachrexhoth ñeñth atmaꞌntatareth judioneshaꞌ paꞌtañneshañ awath. Ama attheyayso ñerraꞌm ñeñth eꞌñe poetakres oꞌch awamenkath sephoñ poerexh, tharroꞌmar ama attheyaye, poerexhña eꞌñe awamenkath sepeneꞌña sa.

¹⁹ Ñeñthes ama judioneshayayso, sapaꞌ xhatheꞌ sotenapañ soꞌtheꞌña nanak sherbets ñeñthoꞌmaroꞌ Yomporpaꞌ awoꞌt pechaꞌtamphsan judioneshaꞌ olivochtakroth allochñapaꞌ atthoꞌch sapaꞌ oꞌch eꞌñe separrokmaterr.

²⁰ Tharraña napaꞌ oꞌch notas, amaꞌt poꞌñoxh oꞌ aꞌypoꞌñarethta judioneshaꞌ añekopña aꞌypoꞌñarethterret eꞌñe pathpareꞌteñothet Yompor. Ñewa, theꞌña sapaꞌ eꞌñe seyemteñotha Yompor oꞌ separrokmaterr sa. Ñeñthoꞌmarña oꞌch notas, amach sommoꞌchatsto, eꞌñepaꞌchña semhchaꞌnaꞌteñoth sameꞌñeña Yompor.

²¹ Tharroꞌmar attho Yomporpaꞌ awoꞌt waporeꞌtan olivochtakër ñeñth eꞌñe poetakra ñeñth tomaꞌntenaya judioneshaꞌ ñeñth ama ameꞌñenayo ña, sapaꞌxhoꞌña ñerraꞌm atthach sepena samhapaꞌ awaporeꞌtaretheschaꞌ samha.

²² Señochepaꞌch poꞌñoxh Yomporpaꞌ atarr kowen amoeraña. Tharraña amaꞌt amoerañañpaꞌ ama allokchamaꞌmetsoyaye, tharroꞌmar ñapaꞌ xhokmach tsaꞌtaterrana ñeñth ama ameꞌñenayo ña. Ñerraꞌm xhokmach seyemteña attho nanak moerensa ñañapaꞌ eꞌñech kowen entenes. Ñerraꞌm amach ateth sephopaꞌ sapaꞌxhoꞌña awaporeꞌtaretheschaꞌ ateth ñerraꞌm tsachtakër.

²³ Ñamha amaꞌt judioneshaꞌ ñeñth aꞌypoꞌñarethtetsapaꞌ ñerraꞌm oꞌch alla ameꞌñaꞌweret Yompor, ñañapaꞌ oꞌch alla parrokmataterranet poꞌpocheño. Tharroꞌmar Yomporpaꞌ nanak awamenkath, ña poꞌwamenkothpaꞌ oꞌch alla parrokmataterranet poꞌpocheño.

²⁴ Tharroꞌmar sa ñeñthes ama judioneshayayso Yomporpaꞌ eꞌñe pokteꞌ eñch oꞌch parrokmataterres, amaꞌt sapaꞌ ateth entenes ñerraꞌmrratheꞌ nanak allapharoꞌtsenes ateth pena ñeñth poetsathoꞌmar olivoch. Ñamha sapaꞌ apechtakreꞌcharethes poꞌpchañoth, ñañapaꞌ awoꞌt aꞌparrokmaterres olivochtakro ñeñth narmets olivoch amaꞌt sapaꞌ ama eꞌñe poetakreyayso ñeñth narmets olivoch. Attho pokteꞌ eñch Yompor ñeñth ateth phonas sa, elloña judioneshaꞌpaꞌ nanakchaꞌ kowen enterranet oꞌch alla parrokmataterranet, oꞌch alla poetakër phaterranet olivoch ñeñth eꞌñe ño poetakër.

Attho judioneshaꞌpaꞌ aꞌkeshphatarethterretchaꞌ ñamet esempowañen

²⁵ Theꞌpaꞌ oꞌch, masheñneshachaꞌ ñamha noxhaneshachaꞌ, neñotatas ñeñth awathotheñ ama eñotpawoyaye. Ñeñthes ama judioneshayayso napaꞌ nemneñ oꞌch eꞌñe señoch allochñapaꞌ atthoch amach sotaphsaꞌtatsto sapaꞌ atarroꞌ es señoten. Ñeñth ateth athpareꞌtena patantarr israelenaꞌtarpaꞌ ñeñthpaꞌ mamekpa ateth moenatenanet Yompor tharrempowach allempoch eꞌñe etsotwa atthoch ameꞌñaꞌwerra allpon acheñeneshaꞌ ñeñth ama judioneshayaye.

²⁶ Allempochña allowen israelenaꞌtarneshaꞌpaꞌ aꞌkeshphatarethterretchaꞌ ñamet. Oꞌch etsoterra eꞌñe ateth akellkaꞌwareth Yompor poꞌñoñ awathotheñ, ñeñthpaꞌ ateth oteꞌth Yompor: Ñeñthchaꞌ aꞌkeshphaterrawetpaꞌ wapach. Arrothchaꞌ wapa ñeñth anetserpaꞌ añ paꞌsoꞌcheñ Sión. Ñeñthoꞌmarña pamoꞌtsnaꞌtarchaꞌ phosan israelenaꞌtarneshaꞌ. Oꞌch wapapaꞌ aꞌwañamperranchaꞌ Jacoboñ poꞌmhreneñ ñeñth attho nanak athpareꞌteñet Yompor.

²⁷ Allempochña nawanmamperranet poꞌchñaretpaꞌ allempochña etsoterra ñeñth ateth notaneteꞌth awath ñeñthchaꞌ ateth neperranet esempo. Arrpaꞌ allowa ñeñth ateth ot Yompor awath.

²⁸ Tharraña theꞌ Yomporpaꞌ ateth entenanet ñerraꞌmrratheꞌ ñeñth eꞌmoñeꞌteneꞌ tharroꞌmar ñetpaꞌ ama moeneto oꞌch ameꞌñeññañet poꞌñoñ ñeñth alloch poꞌñoxh yekeshperra. Tharroꞌmar ateth pena allochñapaꞌ oꞌch saꞌkeshphatarethterra samha ñeñthes ama judioneshayayso. Tharroꞌmar Yomporpaꞌ awathotheñ akraneꞌth judioneshaꞌ ñeñthchaꞌ atarr morrentena tharroꞌmar ñeñth paꞌtañneshañ peteꞌthpaꞌ ña aꞌkraweteꞌth awath ñeñthchaꞌ atarr morrentena.

²⁹ Tharroꞌmar Yomporpaꞌ ama poenesho poꞌñoñ. Ateth otaneteꞌth awath ñeñthchaꞌ oꞌpataterranetpaꞌ eꞌñech etsotwerra. Ñamha ateth otaneteꞌth ñeñthchaꞌ ateth xhoreꞌterranet atthoch eꞌñe ameꞌñaꞌweretpaꞌ ñeñthpaꞌxhoꞌña eꞌñech etsotwerra.

³⁰ Awath sapaꞌ atarr sathpareꞌcheꞌth Yompor, theꞌñapaꞌ judioneshaꞌ ateth petsa ateth sathpareꞌteꞌth sa awath. Tharraña theꞌpaꞌ allempo athpareꞌta judioneshaꞌpaꞌ ñeñthpaꞌ atthoch Yomporpaꞌ oꞌch moererrsa samha.

³¹ Ñamha theꞌpaꞌ attho judioneshaꞌ atthekma athpareꞌteñet Yompor ateth sathpareꞌcheꞌth samha awath, ñetpaꞌxhoꞌña moererranetchaꞌ ateth moerensa samha theꞌ.

³² Tharroꞌmar ateth penaña Yompor. Ñapaꞌ moenatenan ora paꞌnamen acheñ oꞌch athpareꞌtyeñet allochñapaꞌ atthochña ellopaꞌ oꞌch alla moererraneterr allowenet.

Attho Yomporpaꞌ ama eñotpawoyaye ñeñth eꞌñe ateth kothapeꞌchen ña

³³ Yomporpaꞌ poemorrenteñothpaꞌ esokmañen apaꞌyeney, ñeñthara Parets ñeñth atarr eñotañtetsa. Shonteꞌ esokmañen eñoten paꞌnamen. Ya arromñatheypaꞌ amatheꞌ errothenoth yeñotwoñeña ñeñth ateth penaña ña. Ñamha amaꞌt mameshapaꞌ amatheꞌ errothenoth xhaponayoña ya yeyoxhro ñeñth ora allpon ñeñth ateth kothapeꞌchyen ña.

³⁴ “Tharroꞌmar yapaꞌ amaꞌt poesheñarrotheya amatheꞌ errothenoth yeñotwoña ora ñeñth ateth kothapeꞌchen Yompor. Ñamha yapaꞌ amaꞌt poesheñarrotheya amatheꞌ errothenoth yokthapeꞌchacheña Parets.

³⁵ Ñamha yapaꞌ amaꞌt poesheñarrotheyapaꞌ amatheꞌ errothenoth yetsaꞌchoña Yompor atthoch apwerrey ñeñth yemnen ya.”

³⁶ Tharroꞌmar amaꞌt allowen ñeñth allpon es eñalletyetsa eꞌñe Yomporeshothekma wena, eꞌñe ña poꞌwamenkoth eñalletena, ñamha eꞌñe ñokop yexhkatwe. Eꞌñepaꞌch yaꞌyeꞌchoxhtateññañ thayotheñ amaꞌt errponañowen. Ñeñthpaꞌ atthetepaꞌch Nompore.