Romanos 10 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

¹ Oꞌch masheñneshachaꞌ ñamha noxhaneshachaꞌ notas, napaꞌ neyoxhrokmañen nemneñ namoꞌtseshaꞌ ñeñthara israelenaꞌtarpaꞌ oꞌtheꞌ keshphaꞌwerret ñamet. Ñeñthoꞌmarña ñokpoetpaꞌ xhokma nemaꞌyochampenanet Yompor.

² Napaꞌ neñotenanetañ eꞌñe poꞌñoxh moeneñetañ oꞌch eꞌñe sherberet Yompor, tharraña amaꞌt ateth moenenetañpaꞌ poꞌñoxhpaꞌ ama xhenanetoña poeyoxhreto ñeñth poꞌñoxh ateth moenen Yompor.

³ Poꞌñoxhpaꞌ ama xhenaneto poeyoxhreto ñeñth ateth moenen Yompor atethchaꞌ yepha atthoch pokteꞌ enteney amaꞌt eꞌñe alloweney. Ñetpaꞌ otenapoetañ eꞌñe poeyexhkateñothet ñeñth kowen entenet ñetpaꞌ Yomporñapaꞌ pokteꞌtheꞌ entapretenanet. Elloña ñetpaꞌ ama moeneñeto oꞌch yemterrñañet ñeñth ateth oteney Yompor, ñeñthchaꞌ atthoch eꞌñe poꞌñoxh pokteꞌ enterrey ña.

⁴ Tharroꞌmar theꞌpaꞌ oꞌ wapa Cristo ñamha ateth oteney Yompor ñerraꞌm yameꞌñerrñaña Poechemer ñeñth Cristotetspaꞌ atthochña eꞌñech pokteꞌ enterreyña, amaꞌt erraꞌtsena ñeñthchaꞌ ameꞌñerraya. Allochñapaꞌ oꞌwañchaꞌ aña yeyemtena oꞌch ateth yephowen eꞌñe kowen ora allpon ñoñets ñeñth ateth anareth atthochña pokteꞌ enterryeñ Yompor.

Arrpaꞌ atthoch eꞌñe pokteꞌ enteney Yompor amaꞌt eseshaya

⁵ Amaꞌt Moiséspaꞌ ateth oteꞌth awath: “Ñerraꞌm yephowenach eꞌñe poktakma ñeñth ateth anarethpaꞌ eshekchaꞌña korretsayach errponowañen.”

⁶ Tharraña atthoch poꞌñoxh pokteꞌ enteney Yompor ñeñthpaꞌ eꞌñech yeyemteñoth ña ñeñth ateth oteney: “Amach yokthapeꞌchatsto yeyoxhro, ñatoꞌ estheꞌ yepalltena tharroꞌmar ama yepallteno oꞌch awey ento atthoch yaꞌswater Cristo arr patsro.

⁷ Amaña yepallteno oꞌch awey ñamha arromñathneshesho ñeñth oꞌponoꞌtsaꞌyen patso oꞌch yetantateraꞌ Cristo tharroꞌmar ñapaꞌ awathotheñ oꞌ tanterra, ama arromñatheshoꞌtsenayaye.”

⁸ Tharroꞌmar Yompor poꞌñoñpaꞌ ateth oten: “Añ kowen ñoñets alloch yekeshperra, ñeñthpaꞌ ama thorrapawoyaye atthoch yenter, tharroꞌmar ñeñthpaꞌ eꞌñe yeshoꞌtsen. Ñamha ama echarroyaye atthoch yeꞌñoroña, tharroꞌmar ñeñthpaꞌ eꞌñe yeyoxhroꞌtsen.” Ñeñthpaꞌ ñeñthara ñoñets ñeñth oꞌ neserrpareꞌtatas ateth añ poktetsa oꞌch yameꞌñera Cristo.

⁹ Tharroꞌmar ñerraꞌm xho yeꞌñorena attho Jesúspaꞌ Yepartseshar yepeñ, ñamha ñerraꞌm eꞌñe yeyoxhrokmañen yameꞌñeña attho Yomporpaꞌ awoꞌt tantater poꞌrromñothpaꞌ, allochñapaꞌ yapaꞌxhoꞌña aꞌkeshphataretheychaꞌ.

¹⁰ Tharroꞌmar ñerraꞌm yameꞌñera Cristo yeyoxhrokmañen, Pomporñapaꞌ eꞌñech pokteꞌ enteney, ñamha ñerraꞌm xhochña yeꞌñorena attho oꞌ yameꞌñera Cristo, atthochña yapaꞌ aꞌkeshphataretheychaꞌ.

¹¹ Ñamha Yompor poꞌñoñ ñeñth akellkaꞌwareth awathotheñ, ñeñthpaꞌ ateth oten: “Amaꞌt erraꞌtsena ñeñthchaꞌ ameꞌñerraya Yomporpaꞌ ñetña ellopaꞌ amach alla es eꞌnerreteꞌthe.”

¹² Tharroꞌmar ama judioneshayaya ñapoeth ameꞌñenayoña Yompor. Amaꞌt ñeñth ama judioneshayaye, ñetpaꞌxhoꞌña atthekma ameꞌñeñet Yompor. Tharroꞌmar eꞌñe pathrra Yepartseshar ñeñth eꞌñe allowenakpay. Shonteꞌch esokmañen apaꞌyesway amaꞌt eseshaychaꞌ ñeñthey enamoeneꞌ.

¹³ Tharroꞌmar ateth oten Yompor poꞌñoñ: “Allowenotheypaꞌ amaꞌt erraꞌtsenotheta xhoreꞌteꞌ Yompor poeyoxhrokmañen atthoch aꞌkeshphatarethterretpaꞌ Yomporñapaꞌ aꞌkeshphaterranetchaꞌ.”

¹⁴ Tharraña amach errothenoth yexhoreꞌcheña Cristo ñerraꞌm ama xho yeyemteño. Ñamha amatheꞌ errothenoth yeyemteroña ñerraꞌm ama es yeꞌmareꞌtperro Cristokop. Ñamha amach errothenoth yeꞌmareꞌche ñerraꞌm ama eñalle ñeñthchaꞌ aꞌpotheꞌ poꞌñoñ.

¹⁵ Ñamha amach errothenoth aꞌpotheññañetoña Yompor poꞌñoñ, ñerraꞌm ama ña llesensenaweto. “Nanak kosheñtsoꞌtseney ñerraꞌm esempo wapa ñeñthchaꞌ aꞌpothoseꞌ kowen ñoñets ñeñth wetsa Yomporeshoth alloch yoksherra eꞌñe kowen yeyoxhro.” Añpaꞌ allowa ñeñth eꞌñe ateth akellkaꞌwareth Yompor poꞌñoño awathotheñ.

¹⁶ Tharraña amaꞌt ñeñth poeꞌmaran Yompor poꞌñoñ amaña allowenakmayeꞌ ameꞌñereto añ kowen ñoñets ñeñth wetsa Yomporeshoth. Amaꞌt ateth oteꞌth Isaías awath, ñeñthpaꞌ ateth ot: “Ama Nompore eseshayeꞌ ameꞌñenayo ñeñth ateth oꞌ neserrpareꞌtatwanet.” Arrpaꞌ allowa ñeñth ateth oteꞌth Isaías awath.

¹⁷ Tharraña amaꞌt attheñpaꞌ elloña napaꞌ oꞌch notas, eꞌñe yeserrpareꞌteñoth Cristo poꞌñoñ, acheñeneshaꞌñapaꞌ oꞌch eꞌmhñoteñet. Allochñapaꞌ eꞌñe poeꞌmhñoteñothetpaꞌ oꞌch ameꞌñeret Cristo.

¹⁸ Ñatoꞌ sapaꞌ xhatheꞌ sotenapañ judioneshaꞌpaꞌ ñatoꞌ amatheꞌ poeꞌmareto añ kowen ñoñets ñeñth wetsa Yomporeshoth. Tharraña napaꞌ oꞌch notas, poꞌñoxhkaꞌye poeꞌmaret tharroꞌmar ateth oten Yompor poꞌñoñ: Ñeñth aꞌpotheneꞌ Yompor poꞌñoñpaꞌ oꞌ eñotatyeset errakmañen arr patsro, oꞌ epaꞌwamocha Yompor poꞌñoñ errapharen.

¹⁹ Theꞌña sapaꞌ ñatoꞌ xhatheꞌ sotenapañ judioneshaꞌ ñeñthara israelenaꞌtarpaꞌ ñatoꞌ amatheꞌ xhenaneto poeyoxhreto ñeñth ateth kothapeꞌchen Yompor. Tharraña napaꞌ oꞌch notas, poꞌñoxhkaꞌye eñoteñetañ Yomporñapaꞌ oꞌch ameꞌñaterrana ñamha poꞌpoñ acheñ ñeñth ama judioneshayaye. Ñewa, ñanompaꞌ oꞌch neyerpaterrsa ñeñth ateth oteꞌth Moisés. Moisés awathpaꞌ awoꞌt kellkanet añ ñoñets ñeñth ateth och Yompor, ñeñthpaꞌ ateth ot Yompor: Napaꞌ oꞌch nameꞌñatera poꞌpoñ acheñeneshaꞌ ñeñth sapaꞌ attha senteñ ateth ñerraꞌmrratheꞌ ama nechemereyeꞌ nepenaneto ñamha attha senteñ ñerraꞌmrratheꞌ ama es eñoteneto. Tharraña napaꞌ oꞌch nameꞌñatwerranet ñetpaꞌ sañapaꞌ eꞌñe sempaꞌteñothenpaꞌ oꞌch seꞌmoñeꞌterranet, tharroꞌmar allempo ñetpaꞌ oꞌch nechemereshaꞌ neperranet ñamet. Arrpaꞌ allowa ñeñth Moisés poꞌñoñ ñeñth ateth och Yompor awath.

²⁰ Allothpaꞌ ñamha Isaías awath ñañapaꞌ ama mechaꞌtenano judioneshaꞌ. Ñapaꞌ awoꞌt eñotatanet ñeñth ateth och Yompor, ñeñthpaꞌ ateth ot Yompor: Poꞌpoñ acheñ ñeñth ama judioneshayaye amaꞌt ñetpaꞌ ama eseshayeꞌ neꞌnenaye, ñetñapaꞌ oꞌ enterrnet. Amaꞌt ama eseshayeꞌ naꞌphthoꞌtenaye errothenentheꞌña na ñeñth ateth nepena, tharraña nañapaꞌ oꞌch neñotaterranet ñeñth ateth nepena.

²¹ Ñamha elloneth Isaíaspaꞌ serrpareꞌteꞌth atethchaꞌ perra judioneshaꞌ ñeñth ateth eñorena Yompor ñokpoet, ñeñthpaꞌ ateth ot Yompor: “Napaꞌ nellapeneꞌthchaꞌ xhoreꞌtameꞌteneꞌ añ acheñeneshar atthoch ñetpaꞌ oꞌch ameꞌñerrnet. Tharraña amachña eseshayeꞌ nameꞌñenayo, xhachña poꞌpoñ entwennet allowenet.”