San Mateo 25 - Yompor Poꞌñoñ Ñeñth attho Yepartseshar Jesucristo eꞌñe etserra aꞌpoktaterrnay Yomporesho

All atmaꞌntatarethta ñeñth ateth pena xharrasheña shopshareꞌ

¹ Jesúsñapaꞌ alla yexhaterraneterr, ñeñthpaꞌ ateth otanet: —Allempoch amhchaꞌtarethterra Yompor ñeñth poeꞌntañoꞌtsen allempoch nowerra na, ñeñthña allempopaꞌ atethchaꞌ perra eꞌñech ateth ñerraꞌmrratheꞌ xharrasheña shopshareꞌ ñeñthchaꞌ tatsa allchaꞌ kowoset allempoch werranet ñeñth eꞌñe errteꞌ senaꞌtetsa. Ñetñapaꞌ anomyeset poꞌlampareñ alloch poktapoeñet ñerraꞌm esempoch werra.

^2-4 Ñeñthña amnarsheña ñetpaꞌ attha es poexhaꞌyenet ñeñthoꞌmarña ama anmoetoña poꞌpoñ aceiteꞌ alloch aꞌwortaterret poꞌlampareñ allempoch wañ ñeñth anmamphset poꞌlamparñemho. Poꞌpotantañ amnarsheña ñetpaꞌ atarr eñotenet atthoch eñoseꞌrteñet eꞌñe kowen, ñeñthoꞌmarña ñet eꞌñe ellonethpaꞌ anomyeset aceiteꞌ poetellmho alloch aꞌwortaterret poꞌlampareñ ñerraꞌm esempo wañaphset ñeñth poꞌlampareñemhoꞌtsenet.

⁵ Allña ñetpaꞌ koweñet, ama awenayeꞌ werranetoña ñeñth senaꞌtetsa. Ñetña all machayotha moñeꞌtyesetpaꞌ xhepaꞌtchaꞌ manrraꞌtwatset.

⁶ Oꞌña ñarenen tsappaꞌ allempoñapaꞌ machayotha eꞌmoet rranarets, ñeñthñapaꞌ ateth oten: “Thayakaꞌyeña wennasaña ñeñth senaꞌtetsa ñeñth atarr sekwen. Sexhaꞌnomñakaꞌyeꞌ oꞌch sepokteñ.”

⁷ Allempoñapaꞌ allentha tantrraꞌtwaña allowen shopshareꞌ ñetñapaꞌ aꞌkowenetyeset poꞌlampareñ.

⁸ Amnarsheñaña ñeñth ama yerpaꞌpesnomaye aceiteꞌ ñetñapaꞌ ateth otareꞌchet poꞌpotantañ amnarsheña ñeñth xhokma anmoeꞌ aceiteꞌ: “Theꞌpaꞌ oꞌch sokyaꞌy yamha aceiteꞌ ñeñthchaꞌ yaꞌwortatnom. Yapaꞌ oꞌ mayaꞌwaña yelampareñ.”

⁹ Ñeñthña eꞌñe kowen eñoteneꞌ eñoseꞌrtatsapaꞌ ñetñapaꞌ ateth ochetña poꞌpoñ amnarsheña ñeñth enamoenawet aceiteꞌ: “Amachkaꞌye yokyaso theꞌt yewañapen yamha. Sapaꞌ arrña seta all pomoeñet oꞌch serañtheñaꞌ samha sokop.”

¹⁰ Ñet awanmatset oꞌch rañtheñetaꞌpaꞌ ñeñthña senaꞌtetsapaꞌ eꞌñe allorokma xhen. Ñeñthña poꞌpoñ amnarsheña ñeñth eꞌñe poꞌñoxh xhokma eñoseꞌrtetsa, ñetñapaꞌ beꞌthosxhaꞌtet parro epoet ñeñth senaꞌtetsa. Allñapaꞌ allchaꞌ atarr koshameꞌtapreteret. Allñapaꞌ eꞌñe echarr yottamphset.

¹¹ Allña eꞌñe oꞌchtatsapaꞌ oꞌ waxherraña poꞌpotantañ amnarsheña shopshareꞌ ñeñth awanmatsa ñorraꞌ. Ñetñapaꞌ ateth otwerret: “Petoramphsayeꞌchapoerrey Nepapareshachaꞌ.”

¹² Ñañapaꞌ ateth otapoerranet: “Theꞌ napaꞌ oꞌch notapoerres, sa amakaꞌye poꞌñoxhayeꞌ seyemtenno.”

¹³ Jesúsñapaꞌ alla oterranerr ñeñth eꞌmhñoteneꞌ: —Ñeñthoꞌmarña na theꞌpaꞌ oꞌch notas: Sapaꞌ xhokmoepaꞌchña eꞌñe kowen señoseꞌrtena, tharroꞌmar sapaꞌ amakaꞌye señoteñe erraꞌtsenchaꞌ yethñatsro allempoch nowerra na Ñeñthen Acheñetosets, ñamha erroꞌtsenchaꞌ yethro amaꞌt ñeñthpaꞌ ama señoteñe.

All atmaꞌntatarethta atarwasañexhno ñeñth aparethtatsa poesheñaꞌtets kelle ñeñth otenet talento

¹⁴ Jesúsñapaꞌ alla yexhaterraneterr poꞌpoñ, ñeñthpaꞌ ateth oterraneterr: —Allempoch amhchaꞌtarethterra Yompor ñeñth poeꞌntañoꞌtsen allempoch nowerra na, ñeñthña allempopaꞌ eꞌñech ateth perra ñerraꞌmrratheꞌ poesheñarr yakma oꞌch awoꞌ bhaxhayo. Ñeñthña yakmarpaꞌ oꞌch agotnoman paꞌtarwasañreneshaꞌpaꞌ oꞌch apaꞌyesnomanet kelle ñeñth allpon echen; ñetñapaꞌ oꞌch kowamphsoñet tharrempowach esempowañenchaꞌ werra.

¹⁵ ‘Poesheñarrpaꞌ apaꞌnemh amnarmeta talento, ñeñthpaꞌ atarr shonteꞌ kelle allpon ñerraꞌm amnar mil. Ñapaꞌ añekop apaꞌnemh atthoch ellopaꞌ oꞌch atontatan poꞌpatronar poꞌkhllayor. Poꞌpsheñeñpaꞌ apaꞌnemh epmeta talento, ñeñthpaꞌ allpon kelle allpon ñerraꞌm epa mil. Poꞌpsheñeñpa apaꞌnemh poemetarr talento. Ñeñthpaꞌxhoꞌña allpon kelle ñerraꞌmrratheꞌ patherr mil. Ñewa, poesheñaꞌttsetpaꞌ eꞌñe allpona apaꞌyesnomanet ñeñth eꞌñe allpona eñotyenet atthoch ellonethpaꞌ atontatet kelle. Ñeñtha apaꞌyeswanmanetpaꞌ ñañapaꞌ allentha awoꞌ bhaxhayo.

¹⁶ Ñeñth agapoeꞌ amnar mil ñañapaꞌ allorokma awoꞌ allchaꞌ tarwasatan kelle; atthoña ellonethpaꞌ oꞌ alla ganerrerr poꞌpoñ amnar mil kelle.

¹⁷ Ateth pha ñamha ñeñth agapoeꞌ epa mil. Ñapaꞌxhoꞌña ellonethpaꞌ ganerrerr poꞌpoñ epa mil kelle.

¹⁸ Tharraña añña ñeñth agapoeꞌ patherr mil ñañapaꞌ allentha anemh allchaꞌ pampoeñaꞌ; atthokaꞌyeña ñapaꞌ xha eꞌpotanña kelle.

¹⁹ ‘Oꞌña atomatpaꞌ oꞌ werranetña poꞌpatronaret, allentha agotatwerranet atthoch entwerranet poꞌtarwas errothentheꞌ tarwasaꞌyeset eꞌñe poesheñaꞌttset.

²⁰ Ñeñthña agapoeꞌ amnar mil ñañapaꞌ wapapaꞌ apapoenan poꞌpatronar poꞌpoñ amnar mil kelle, ñeñthpaꞌ ateth otapoeñ: “Añña Nomporchaꞌ ñeñth phapaꞌnmoen amnar mil kelle awaña, napaꞌ ellokaꞌye neganerrerrña pekhllayoroth poꞌpoñ amnar mil kelle.”

²¹ Poꞌpatronarpaꞌ ateth och: “Eꞌñe pokteꞌ neyochrechaꞌ; phapaꞌ atarr kowen pesherbenen. Phapaꞌ eꞌñe kowen petsoton ñeñth ateth notnomoeph. Amaꞌt allponatholla napaꞌnmaph awaña, phañapaꞌ atarroꞌt kowen pesherbhaton. Ñeñthoꞌmarña theꞌpaꞌ oꞌch nenwerreph phach nekwamphsapreterreꞌ ñeñth atarr aton. Theꞌña phapaꞌ pebeꞌthos allchaꞌ atarr phokshapreterrna.”

²² Allempoñapaꞌ ñeñth agapoeꞌ ñamha epa mil, ñapaꞌxhoꞌ wapapaꞌ apapoenan poꞌpatronar poꞌpoñ epa mil kelle. Ñapaꞌxhoꞌña ateth otapoeñ: “Nomporchaꞌ ñeñth phapaꞌnmoen namha epa mil, napaꞌxhoꞌña ellokaꞌye neganerrerrña pekhllayoroth poꞌpoñ epa mil kelle.”

²³ Ñapaꞌxhoꞌña poꞌpatronarpaꞌ ateth och: “Eꞌñe pokteꞌ; phapaꞌxhoꞌña atarroꞌt kowen pesherbenen. Phapaꞌxhoꞌña eꞌñe kowen petsoton ñeñth ateth notnomoeph. Amaꞌt allponatholla napaꞌnmaph awaña, phañapaꞌ atarroꞌt kowen pesherbhaton. Ñeñthoꞌmarña theꞌpaꞌ oꞌch nenwerreph phamha phach nekwamphsapreterreꞌ ñeñth atarr aton. Phapaꞌxhoꞌña theꞌpaꞌ pebeꞌthos phamha allchaꞌ atarr phokshapreterrna.”

²⁴ Allempoñapaꞌ wapa ñamha ñeñth agapoeꞌ patherr mil kelle. Ñañapaꞌ ateth otapoeñ: “Napaꞌ neñoteneph Nomporchaꞌ. Phapaꞌ amakaꞌye matsrreꞌmñape; phapaꞌ xhokmakaꞌye peprratampesyen amaꞌt ñeñthpaꞌ ama phoyaye ñamha xhokmakaꞌye phoksechatyenña ñeñth ama phayeꞌ nareꞌtatyenaye; xhokma es phaꞌyapaxhaꞌyen amaꞌt ñeñthpaꞌ amakaꞌye phayeꞌ naꞌyenaye.

²⁵ Ñeñthoꞌmarña napaꞌ xha nemhchaꞌteneph. Ñeñthoꞌmarña ñeñth phapaꞌnmoen awaña patherr mil kellepaꞌ nañapaꞌ xha nepamponaph. Theꞌñapaꞌ oꞌch alla napapoerreph ñeñth eꞌñe pho.”

²⁶ Allempoña poꞌpatronarpaꞌ ateth och: “Phaña poꞌñoxhpaꞌ amakaꞌye kowenayeꞌ pesherbenno amaꞌt mamesha; atarrkaꞌye kellañtsoph. Ñerraꞌm eꞌñe poꞌñoxh peñotennoñ xhokma es neprratampesyeneñ ñeñth ama noyaye; ñerraꞌm poꞌñoxh xhokma noksechatyeneñ ñeñth ama nayeꞌ nareꞌtatyenaye; ñerraꞌm poꞌñoxh xhokma es naꞌyapaxhaꞌyeneñ ñeñth ama nayeꞌ naꞌyenayñe, ñerraꞌm eꞌñe poꞌñoxh ateth pentennoñpaꞌ

²⁷ esoꞌmarwañakaꞌye amaña bancoyeꞌ penennanoña nekhllayor allochñapaꞌ theꞌña oꞌ newerrapaꞌ nagapwerreñchaꞌ ñamha allo atontatonet nekhllayor.”

²⁸ Allempoñapaꞌ ateth otan ñeñth thomxhaꞌtyets all: “Theꞌpaꞌ xhosa poerratamperreꞌña ñeñth patherr mil kelle oꞌch sapoer ñeñth echeneꞌ xharraꞌ mil kelle.”

²⁹ Ñeñthoꞌmarña theꞌ napaꞌ oꞌch notas: “Ñeñth es echets shonteꞌ eꞌñe poesherbhateñothet pamoꞌmteꞌ, ñetña ellonethpaꞌ oꞌch alla aparethterret poꞌpoñ aton. Tharraña ñeñth ama es echetsopaꞌ amaꞌt allponatholla ñeñth echyenetañ aprratamphsarethterretchaꞌ.

³⁰ Ñamha añ atarwasañer ñeñth ama nesherbenaye, theꞌñapaꞌ xhosaña waporeꞌteꞌ aꞌyoth chekmetoth. Allñapaꞌ allchaꞌ yawanrrortenet panmoeñothet atserrpaꞌ rrasoꞌtyesosetchaꞌ paꞌs.”

Allempoch ellopaꞌtetstatarethterra ñeñth tomaꞌntenaya carneroxhno ñamha ñeñth tomaꞌntenaya cabraxhno

³¹ Allempoch nowerra na Ñeñthen Acheñetosets, nowerrach eꞌñe nepartsoteñowen epan allowen nemhllañotheñnaneshar. Allempopaꞌ nanorrwerrchaꞌ nekonaño allchaꞌña eꞌñe nepartsotwerr eꞌñe nekowenteñeshaꞌ.

³² Allempoñapaꞌ eꞌñech nesho apxherra allowen paꞌnamen acheñ ñeñth yexhaꞌyetsa arr patsro. Allempochña nellopaꞌtetstaterranet eꞌñe ateth pena ñeñth pamoꞌmteꞌ pen carnero, ñañapaꞌ oꞌch ellopaꞌtetstatenan carneroxhno ñamha cabraxhno.

³³ Acheñeneshaꞌña ñeñth eꞌñe kowenpaꞌ ñetñapaꞌ nekowenrothchaꞌ nenwerranet ñeñth eꞌñe ateth ñerraꞌm carneroxhno. Ñamha ñeñthña ama kowenayayepaꞌ ñetñapaꞌ neꞌchkotherothach nenwerranet ñeñth eꞌñe ateth ñerraꞌm cabraxhno.

³⁴ Naña allempoch atarr naꞌmhchaꞌtarethterrapaꞌ, atethchaꞌ noter ñeñth nekowenrontheꞌtsaꞌyen: “Sapaꞌ sonaxhaꞌt allowenes tharroꞌmar Nompor oꞌkaꞌye atarr bensareꞌtamperres. Theꞌña sapaꞌ oꞌch sagërr ñeñth oꞌpatatensa awathotheñ. Amaꞌt allempotheñ Nomporpaꞌ errteꞌ yexhkateneꞌ pats sañapaꞌ allempotheñ oꞌpatatasa atthoch saꞌmhchaꞌtarethtapretera.

³⁵ Tharroꞌmar napaꞌ allempo nachporreꞌthpaꞌ sakaꞌyeña nerratallmeꞌchayeꞌth. Allempo noꞌñpaꞌteꞌthpaꞌ sakaꞌyeña nonayesayeꞌth. Allempo nexhapoeꞌth sesho all ama nentare sañapaꞌ xhokma eꞌñe kowen sagapneꞌth.

³⁶ Allempo nemoelleꞌthpaꞌ sakaꞌyeña nepashtayeꞌth. Allempo natsnaꞌteꞌthpaꞌ sañapaꞌ xhokma sekwampesneꞌth. Allempo yottampesneteꞌthpaꞌ sakaꞌyeña eꞌñe kowen nemoꞌtayeꞌth.”

³⁷ Allempoña ñeñth eꞌñe kowen es nephaꞌyesayeꞌthpaꞌ ñetñapaꞌ atethchaꞌ oterrnet: “Taꞌm Partseshachaꞌ, ¿esempoꞌtña yentapeꞌth allempo phachporreꞌth allempo yerratallmeꞌchapeꞌth? ¿Esempoꞌtña yentapeꞌth allempo phoꞌñpaꞌteꞌth allempo yonapeꞌth?

³⁸ ¿Esempoꞌtña yentapeꞌth allempo pexhapoeꞌth yesho all ama pentare allempo eꞌñe kowen yagapapeꞌth? Taꞌm ¿esempotheꞌña yentapeꞌth allempo pemoelleꞌth allempo yepashtapeꞌth?

³⁹ ¿Esempoꞌt yentapeꞌthña allempo phatsnaꞌteꞌth ñamha allempo yottamphsapeteꞌth allempo yemoꞌtapeꞌth?”

⁴⁰ Allempoña na ñeñthen Partseshanpaꞌ atethchaꞌ noterres: “Theꞌ napaꞌ oꞌch notas: Poꞌñoxhpaꞌ allempo eꞌñe kowen ateth sephaꞌyesnaneꞌth na nemoꞌnasheñneshaꞌ naꞌnakaꞌyeña eꞌñe kowen ateth sepen. Amaꞌt poesheñarra ñeñth ama esosheꞌmayeꞌ entyeseꞌthe acheñeneshaꞌ allempo, tharraña saña allempopaꞌ attho eꞌñe kowen es sephaꞌyesaneteꞌth, naꞌnakaꞌyeña eꞌñe kowen ateth sepen allempo.”

⁴¹ ‘Allempoña ñeñth neꞌchkotherontheꞌtsenpaꞌ atethchaꞌ noterranet: “Sapaꞌ orrerres arroth, sapaꞌ aña soꞌpatenaya ñeñth atarr yoroxhen. Theꞌñapaꞌ orras all worten tsoꞌ errapharen ñeñth ama amayaño amaꞌt errponaña. Ñeñthña tsorpaꞌ añ oꞌpatateñet oneñeth eꞌñe poeyochreshowen.

⁴² Tharroꞌmar na allempo nachporreꞌthpaꞌ sapaꞌ amakaꞌye sayeꞌ nerratallmeꞌchayeꞌthe. Allempo noꞌñpaꞌteꞌthpaꞌ amakaꞌ sayeꞌña nonayeꞌthe.

⁴³ Allempo nexhapoeꞌth sesho all ama nentare sapaꞌ amakaꞌye kowenayeꞌ sagapneꞌthe. Allempo nemoelleꞌthpaꞌ sapaꞌ amakaꞌye sayeꞌ nepashtayeꞌthe. Allempo natsnaꞌteꞌth amaꞌt ñamha allempo yottampesneteꞌthpaꞌ sañapaꞌ amakaꞌye semoꞌtneꞌthe.”

⁴⁴ Allempoña ñetpaꞌ atethchaꞌ oterrnet: “¿Esempowañakaꞌye, Partseshachaꞌ, yentapeꞌth allempo phachporreꞌth ñamha allempo phoꞌñpaꞌteꞌth ñamha allempo pexhapoeꞌth yesho all ama pentare ñamha allempo pemoelleꞌth ñamha allempo phatsnaꞌteꞌth, ñamha allempo yottamphsapeteꞌth? ¿Esempoꞌtña yentapeꞌth ateth allempo yapaꞌ amaꞌt koñeꞌthapaꞌ ama es yapapeꞌthe?”

⁴⁵ Allempoña napaꞌ atethchaꞌ noterranet: “Theꞌpaꞌ oꞌch notas: Poꞌñoxh sa allempo ama aꞌkwaꞌphsenayeꞌ sentoneꞌthe allowen na nemoꞌnasheñneshaꞌ, naꞌnakaꞌyeña ateth senteꞌthña allempo.”

⁴⁶ Allempoña acheñeneshaꞌ ñeñth neꞌchkotherontheꞌtsen, ñetñapaꞌ awanerretchaꞌ allchaꞌ koñcherret eꞌñe errponowañen. Añña ñeñth eꞌñe kowen es phaꞌyestseꞌth ñetñapaꞌ awanerretchaꞌ Yomporesho allña ñetpaꞌ korretsetach poksheñeshokmañen errponañowen.